ފީޑިން ޓިޔުބް ލިބުން ލަސްވެ، ޙާލު ދެރަވެގެން ކުއްޖަކު ނިޔާވި މައްސަލަ ބަލަން ފަށައިފި
ކާންދޭން ބޭނުންކުރާ ފީޑިން ޓިޔުބް ލިބުން ލަސްވެ، ހާލު ދެރަވެގެން އިއްޔެ ނިޔާވި މ. ޗީޒް، އިބްރާހީމް އަޛާން ސުހައިލް ނިޔާވި ހާދިސާއާ ގުޅިގެން ބަލަންޖެހޭ ކަންކަން ކަމާގުޅުންހުރި އިދާރާތަކާ ގުޅިގެން ބަލަމުންދާ ކަމަށް މިނިސްޓްރީ އޮފް ހެލްތުން ހާމަކޮށްފިއެވެ.
އަޛާން އަކީ "ސެރެބްރަލް ޕަލްސީ" ބަލި ތަހައްމަލު ކުރަމުންދިޔަ ކުއްޖެކެވެ. އޭނާއަށް ކާންބޯން ދެނީ ބަނޑަށް ލައްވާފައިވާ ޕެގް ޓިއުބެއް މެދުވެރިކޮށެވެ.
އަޛާންގެ މަންމަ ފޭސްބުކްގައި ބުނެފައިވާ ގޮތުގައި، މިދިޔަ އަހަރުގެ އޯގަސްޓް މަހުން ފެށިގެން އެސްޓީއޯ މެދުވެރިކޮށް ޕެގް ޓިއުބަކަށް އޯޑަރު ދީފައިވީ ނަމަވެސް، އަށް މަސް ދުވަސް ވެގެންދިޔައިރުވެސް އެ ލިބިފައެއް ނުވެއެވެ.
އަދި އެސްޓީއޯ ހުޅުމާލެ ފާމަސީއަށް އެތައް ފަހަރަކު ގޮސް، އެންސްޕާއިން އެކަން އެޕްރޫވް ނުކުރާކަމުގެ ޖަވާބު ލިބިފައިވާ ކަމަށް އޭނާ ބުނެފައިވެއެވެ.
"މިއީ މި ކުއްޖާގެ ކެއިންބުއިން އެތެރެވާ ހަމައެކަނި މަގު. އެސްޓީއޯއިން މިހާ ދުވަސްވީއިރު މި ޖަވާބު ނުދެވި އޮތީ ކީއްވެގެންތޯ؟ އަދި އެންސްޕާއިން މިއީ އެޕްރޫވް ނުކޮށްދެވޭނެ އެއްޗަކަށް ވާންޖެހޭ ސަބަބަކީ ކޮބައިތޯ؟" ސުވާލު އުފައްދަމުން އަޛާންގެ މަންމަ ލިޔެފައިވެއެވެ.
އަޛާން ނިޔާވީ އިއްޔެގެ ވަގުތެއްގައެވެ. މައުލޫމާތު ލިބިފައިވާ ގޮތުން އައު ޕެގް ޓިއުބް ލިބުނުއިރު އަޛާންގެ ހާލު މާބޮޑަށް ގޯސްވެފައިވުމުގެ ސަބަބުން އެ ލެއްވޭގޮތް ނުވީއެވެ.
މި ހާދިސާއާ ގުޅިގެން އާންމުންގެ ފާޑުކިޔުން ސަރުކާރުގެ ކަމާބެހޭ އިދާރާތަކަށް ވަނީ އަމާޒުވެފައެވެ.
Advertisement
This content is created and paid for by advertisers and does not involve Voice Journalists
