މާލެ ސިޓީގެ މޭޔަރުކަމުގެ މަޤާމަށް ވާދަކުރައްވާ މޫސާ ޢަލީ ޖަލީލަށް ތާއީދުކުރައްވާކަން، ޖުމްހޫރީ ޕާޓީގެ ލީޑަރު އަދި ވިލާ ގްރޫޕްގެ ޗެއަރމަން ޤާސިމް އިބްރާހީމް ރަސްމީކޮށް އިޢުލާން ކުރައްވައިފިއެވެ.

ޤާސިމް ވިދާޅުވީ މޫސާ ޢަލީ ޖަލީލަކީ ޤައުމީ ޚިދުމަތުގެ ފަޚުރުވެރި ރެކޯޑެއް އޮތް، މި ޤައުމުގެ ދިފާޢުގައި އަގުހުރި މަސައްކަތްތަކެއް ކުރައްވާފައިވާ ބޭފުޅެއް ކަމަށެވެ.

ޚާއްޞަ ގޮތެއްގައި 1988 ނޮވެންބަރު 3 ގެ އުދުވާނީ ހަމަލާއިން ޤައުމު ސަލާމަތްކުރުމަށް މޫސާ ޢަލީ ޖަލީލު ކުރެއްވި ހިތްވަރުގަދަ މަސައްކަތްޕުޅު ޤާސިމް ފާހަގަކުރެއްވިއެވެ. އެދުވަހު ދުޝްމަނުންގެ ކުރިމައްޗަށް ނުކުމެވަޑައިގަތީ އަމިއްލަ މޭފުޅު އައްޑަނައެއްގެ ގޮތުގައި ބޭނުންކުރައްވައިގެން ކަމަށާއި، އެއީ އެމަނިކުފާނުގެ ޤައުމީ ޢަޒުމާއި އިޚްލާޞްތެރިކަން ހުރި މިންވަރު ސާބިތުކޮށްދޭ ކަމެއް ކަމަށް ޤާސިމް ވިދާޅުވިއެވެ.

މޫސާ ޢަލީ ޖަލީލަކީ ދައުލަތުން އަރުވާފައިވާ "ނިޝާން ޢަސްކަރީގެ ޢިއްޒަތުގެ ވެރިއެއް" ކަން ފާހަގަކުރައްވަމުން، ޤާސިމް ވިދާޅުވީ އެމަނިކުފާނަކީ ކޮންމެ ސަރުކާރަކުން ހަވާލުކުރެއްވި ވަޒީފާއެއްގެ ވާޖިބުވެސް ތެދުވެރިކަމާއެކު އަދާކުރެއްވި ބޭފުޅެއް ކަމަށެވެ. އަދި އެމަނިކުފާނުގެ ފަސްބައިގައި އެއްވެސް ކިލަނބުކަމެއް ނެތް ކަމަށާއި، އެއީ އެންމެންގެ ލޯބި ލިބިވަޑައިގެންފައިވާ ތަޖްރިބާކާރު ޝަޚްޞިއްޔަތެއް ކަމަށްވެސް ވިދާޅުވިއެވެ.

ޤާސިމް އިތުރަށް ވިދާޅުވި ގޮތުގައި، މާލެ ސިޓީ ހިންގުމުގެ އެންމެ އިސް މަޤާމަށް މޫސާ ޢަލީ ޖަލީލަށްވުރެ ތަޖްރިބާކާރު، އަމާނާތްތެރި، އަދި ޤާބިލް އެހެން ކެންޑިޑޭޓަކު ނެތްކަން ޔަގީންވާ ކަމަށެވެ. މާލެ ސިޓީއަށް މިވަގުތު ބޭނުންވަނީ މުރާލި އަދި ދުރުވިސްނޭ މާލިމީއެއް ކަމަށް ޤާސިމް ފާހަގަކުރެއްވިއެވެ.

މި ހުރިހާ ސަބަބުތަކަށްޓަކައި، މާލޭގެ ރައްޔިތުންނާއި ޤާސިމްގެ ބަސް ގަބޫލުކުރައްވާ އެންމެހާ ފަރާތްތަކުން، ކުރިއަށް އޮތް އިންތިޚާބުގައި މާލެ ސިޓީގެ މޭޔަރުކަމަށް ވާދަކުރައްވާ ކެންޑިޑޭޓް ނަންބަރު 4، މޫސާ ޢަލީ ޖަލީލަށް ވޯޓު ދެއްވުމަށް ޤާސިމް އިބްރާހީމް ވަނީ އިލްތިމާސް ކުރައްވާފައެވެ.