ގދ. މަޑަވެލީގައި ދިރިއުޅޭ ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލައަށް ހައްލެއް ހޯދުމުގެ ގޮތުން، އެ ރަށުގައި ތަރައްޤީކުރާ 50 ހައުސިންގ ޔުނިޓްގެ މަޝްރޫޢުގެ އަމަލީ މަސައްކަތް ރަސްމީކޮށް މިއަދު ފަށައިފިއެވެ.
މަޑަވެލީގައި ބޭއްވުނު ޚާއްޞަ ރަސްމިއްޔާތުގައި، ހައުސިންގ ޔުނިޓްތަކުގެ މަސައްކަތް ކުރިއަށްދާނެ ސައިޓުގައި ބިންގާ އަޅުއްވައިދެއްވީ ނައިބު ރައީސް އަލްއުސްތާޛު ޙުސެއިން މުޙައްމަދު ލަޠީފް އެވެ.
މި ރަސްމިއްޔާތުގައި ދައުލަތުގެ އިސް ބޭފުޅުންނާއި ދާއިރާގެ މަޖިލިސް މެންބަރުން ބައިވެރިވެވަޑައިގެންނެވިއެވެ. އެގޮތުން ސްޓޭޓް މިނިސްޓަރު އިސްމާޢީލް ޙަމީދު އަދި ރައްޔިތުންގެ މަޖިލީހުގެ މަޑަވެލި ދާއިރާގެ މެންބަރު މުޙައްމަދު ޝަމީޒް މި އިވެންޓުގައި ބައިވެރިވެވަޑައިގެންނެވިއެވެ.
މީގެ އިތުރުން، މި މަޝްރޫޢުގެ މަސައްކަތް ހަވާލުކޮށްފައިވާ މިމްސް ކޮންސްޓްރަކްޝަންގެ މެނޭޖިންގ ޑިރެކްޓަރ އަދި ތިނަދޫ އުތުރު ދާއިރާގެ މެންބަރު ސައުދުﷲ ޙިލްމީ ވެސް މި ރަސްމިއްޔާތުގައި ބައިވެރިވެވަޑައިގެންނެވިއެވެ. މި މަޝްރޫޢުގެ މަސައްކަތް ކުރިއަށްދާނީ އެ ކުންފުނީގެ ބެލުމުގެ ދަށުންނެވެ.
ހައުސިން މިނިސްޓްރީން ބުނީ މި 50 ހައުސިންގ ޔުނިޓް ނިމުމުން، ރަށުގެ ގިނަ އާއިލާތަކަކަށް ދިމާވެފައިވާ ބޯހިޔާވަހިކަމުގެ ދަތިކަމަށް ބޮޑު ލުޔެއް ލިބިގެންދާނޭކަމަށެވެ.
Advertisement
This content is created and paid for by advertisers and does not involve Voice Journalists
