މާލޭ ސަރަޙައްދުގައި ރޭސިންގ ޓްރެކެއް އެޅުމުގެ ގޮތުން ސިނަމާލެ ބްރިޖާ ގުޅިފައިވާ ހައިވޭ ބޭރުހިއްކުމުގެ މަސައްކަތް ފެށުމަށް ތައްޔާރުވަމުން އަންނަކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ޒުވާނުންނާއެކު ބޭއްވި ބައްދަލުކުރެއްވުމުގައި މާލެ ސަރަހައްދުގައި ޒުވާނުނަށްޓަކައި ސަރުކާރުން ގާއިމްކުރުމަށް ނިންމާފައިވާ ކުޅިވަރުގެ އިންފްރާސްޓަކްޗަރ ޕްރޮގްރާމްތަކާ ގުޅޭގޮތުން ރައީސް ޑރ.މުއިއްޒު މިރޭ ވަނީ ބައެއް މަޝްރޫޢުތައް ކުރިއަށްގޮސްފައިވާ ހިސާބު ސާފުކޮށްދެއްވާފައެވެ. އެގޮތުން ރޭސިން ޓްރެކް އެޅުމަށް ބޭނުންވާ ބިން ހިއްކުމުގެ މަސައްކަތް ކުރިއަށްއޮތް ހަފްތާއެއްހާ ދުވަހުގެ ތެރޭގައި ފެށިގެންދާނޭކަމަށް ރައީސް ވިދާޅުވިއެވެ.

ރައީސް ޑރ.މުއިއްޒު މިރޭ ޒުވާނުންނާއެކު ބޭއްވި ބައްދަލުވުމުގެ ތެރެއިން.. ފޮޓޯ: ރައީސް އޮފީސް

ރޭސިން ޓްރެކް ހެދުމަށް ސަރުކާރުން ނިންމާފައިވަނީ ހައިވޭ ބޭރު ހިއްކައިގެންނެވެ. ރޭސިން ޓްރެކްގެ މަސައްކަތަކީ އެމްއޭސީއެލުން ހަރަދުކޮށްގެން ކުރިއަށްގެންދިއުމަށް ނިންމާފައިވާ މަސައްކަތެކެވެ. ރައީސް ވިދާޅުވީ، މި މަސައްކަތް ހަމަޖެހިފައިވާ ގޮތަށް ކުރިއަށްދާނޭކަމަށެވެ.

ރޭސިންއަކީ ބައެއް ޒުވާނުން ވަރަށް ޝައުގުވެރިކަން ހުންނަ ކުޅިވަރެއްނަމަވެސް މާލެ ސަރަހައްދުގައި މިކަން ކުރިއަށް ގެންދާނެ ތަނެއް ނެތުމަކީ ޒުވާނުންގެ ކަންބޮޑުވުމެކެވެ. 

ހައިވޭގެ ބޭރުގައި ރޭސިން ޓްރެކެއް ގާއިމްކުރުމަށް ނިންމީ މީހުން އުޅޭ ސަރަހައްދުގައި އެފަދަ ކަންކަން ކުރުމަކީ އެންމެ ރައްކާތެރިގޮތްކަމަށް ނުވާތީއެވެ. ހައިވޭ ބޭރު ހިއްކައިގެން ރޭސިން ޓްރެކެއް އެޅުމަށް ނިންމީ ރޭސިން ޓްރެކެއް އެޅުމަށް އެތަނުން އެކަށީގެންވާ ދިގުމިނެއް ލިބޭތީކަމަށް ސަރުކާރުން ވަނީ ބުނެފައެވެ.

ރައީސް ވިދާޅުވީ ރޭސިން ޓްރެކްގެ އިތުރުން ސާފިން ސްޓޭޑިއަމެއް ތަރައްޤީކުރުމަށް ބިން ބަޔަކާ ހަވާލުކޮށްފައިވާކަމަށެވެ. މީގެ އިތުރުންވެސް ޒުވާނުންނަށް ބޭނުންވާ އާކޭޑް ގޭމް ސެންޓަރާއި، ބޯލިން އެރީނާ ޤާއިމްކުރުމަށް ސްޕޯޓްސް މިނިސްތްރީއާ ބިން ހަވާލުކޮށްފައިވާކަން ރައީސް މިރޭ ވިދާޅުވިއެވެ.