ރައްޔިތުންގެ މަޖިލީސްގެ މެންބަރުންނާއި ކައުންސިލް މެންބަރުންގެ އިތުބާރުނެތްކަމުގެ ވޯޓެއް ނަގައި މަގާމުން ވަކި ކުރުމުގެ ބާރު ރައްޔިތުންނަށް ދޭ ގޮތަށް ގާނޫނަށް އިސްލާހު ހުށަހެޅުމަށް ގަސްދުކުރައްވާކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރޭ ވިދާޅުވެއްޖެއެވެ.

ރައީސުލްޖުމްހޫރިއްޔާ ޒުވާނުންނާއި ބައްދަލުކުރެއްވުމަށް ޔޫތް ހަބްގައި ބޭއްވި އިވެންޓްގައި ވާހަކަދައްކަވަމުން ވިދާޅުވީ، އެމަނިކުފާނު ހުށަހަޅުއްވާ އިސްލާހީ އެޖެންޑާގެ ތެރޭގައި މަޖިލީސް މެންބަރުންނާއި، ކައުންސިލް މެންބަރުންގެ ދައުރުގެ ތެރޭގައި ރީކޯލް ވޯޓު ނެގޭ ގޮތަށް ގާނޫނަށް ބަދަލު ގެންނަވަން ބޭނުންފުޅުވާ ކަމަށެވެ.

އެހެންކަމުން ރިޔާސީ އިންތިހާބާއި މަޖިލީސް އިންތިހާބު އެއް ދުވަހެއްގައި ބޭއްވި ނަމަވެސް، މެމްބަރުންނާއި ކައުންސިލަރުންގެ ދައުރު ތެރޭޭގައި، އެ އެކުލަވާލެވޭ ގާނޫނުގައި ކަނޑައަޅާފައިވާ ޝަރުތެއް ނޫނީ ކަމެއް މެންބަރުގެ ކިބައިން އުނިވެއްޖެނަމަ، އޭނާ އެ ގޮނޑިން ބޭރު ކުރަން ރައްޔިތުންނަށް ފުރުސަތު ލިބިގެންދާނެ ކަމަށް ރައީސް ވިދާޅުވިއެވެ.

ސަރުކާރުން ހުށަހަޅާ ކަންކަމާއެކުގައި، ސަރުކާރާއި، ކައުންސިލާއި މަޖިލިސްވެސް ހިނގާނީ ވަރަށް ހަރުދަނާ ކަމާއެކީގައި ރައްޔިތުންގެ ފުރިހަމަ ބައިވެރިވުނާއެކީގައި ކަމަށް ރައީސް ވިދާޅުވިއެވެ. އަދި އިންތިޚާބުތައްވެސް ބޭއްވޭނީ ހަގީގީ މާނާގައި ”ފްރީ އެންޑް ފެއާ“ ކޮށް ކަމަށް ވިދާޅުވިއެވެ.