ރައީސުލްޖުމްހޫރިއްޔާގެ ހާއްސަ ސްކޮލާޝިޕްގައި ތައުލީމު ހާސިލްކުރުމުގެ ފުރުސަތު ލިބޭ ދަރިވަރުން، ބޭނުންވާ ކޮންމެ ރޮނގަކުން ކިޔެވުމުގެ ފުރުސަތު ދޭގޮތަށް، އުސޫލަށް ބަދަލު ގެނެސްފި އެވެ.
އެ ބަދަލު ގެނެސް މިހާރު ވަނީ ދިވެހި ސަރުކާރުގެ ގެޒެޓްގައި ޝާއިއު ކޮށްފަ އެވެ. އައު އުސޫލުގައި ބުނެފައިވަނީ ރައީސުލްޖުމްހޫރިއްޔާގެ ހާއްސަ ސްކޮލާޝިޕްގައި ތައުލީމު ހާސިލްކުރުމުގެ ފުރުސަތު ލިބޭ ދަރިވަރުން، ބޭނުންވާ ކޮންމެ ދާއިރާއެއްގައި ކިޔެވުމުގެ ފުރުސަތު ދޭނެ ކަމަށެވެ.
މި ސްކޮލާޝިޕްގެ ދަށުން ކިޔެވުމުގެ ފުރުސަތު ދޭނީ ރާއްޖޭގައި ހުރެގެން ކިޔެވުމަށާއި ރާއްޖެއާއެކު ޑިޕްލޮމެޓިކް ގުޅުން ގާއިމުކޮށްފައިވާ ގައުމުތަކުގެ ތެރެއިން ދަރިވަރުން ކިޔަވަން ތިބުމަށް ރައްކާތެރިކަމަށް ކަނޑައަޅާފައިވާ ގައުމުތަކާއި މޯލްޑިވްސް ކޮލިފިކޭޝަން އޮތޯރިޓީން ގަބޫލުކުރާ މަތީ ތައުލީމާއި ތަމްރީނުދޭ މަރުކަޒުތަކުގައި ކަމަށް ވެސް އުސޫލުގައިވެ އެވެ.
އައު އުސޫލުގައިވާ ގޮތުން ދެ މަރުކަޒެއް ގުޅިގެން އެއް ގައުމަށްވުރެ ގިނަ ގައުމުތަކުގައި ކިޔަވާ ގޮތަށް ހަމަޖެހިފައިވާ "ޓްވިނިން" ޕްރަގްރާމްތަކުގައި ކިޔެވުމަށް ދަރިވަރުންނަށް ފުރުސަތު ދޭނެ އެވެ.
މީގެ އިތުރުން އިންޓާންޝިޕް, ދަރިވަރުގެ ޕްރަގްރާމް ފުރިހަމަ ކުރާ ޤައުމުގައި ކުރިއަށް ގެންދެވެން ނެތް ހާލަތެއްގައި ނުވަތަ އެ ގައުމަށް ވުރެ ހަރަދުކުޑަކޮށް އެހެން ގައުމެއްގައި އިންޓާންޝިޕް ހެދެން އޮތް ނަމަ މިނިސްޓްރީގެ ހުއްދަޔާއެކު ރާއްޖޭގައި ނުވަތަ ދެވަނަ އެހެން ގައުމެއްގައި އިންޓާޝިޕް ފުރިހަމަ ކުރުމުގެ ފުރުސަތު ދޭނެ ކަމަށްވެސް ބުނެފައިވެ އެވެ.
މި އުސޫލު ގެޒެޓްކުރުމާއެކު ކުރީން އޮތް އުސޫލު ވަނީ ބާތިލުކޮށްފަ އެވެ.
Advertisement
This content is created and paid for by advertisers and does not involve Voice Journalists
