2026 ވަނަ އަހަރުގެ ފީފާ ވޯލްޑް ކަޕްގެ ފަހު ޖާގަތައް އިއްޔެ ހަ ޤައުމަކުން ކަށަވަރުކުރުމާ ގުޅިގެން، މުބާރާތުގެ ގްރޫޕްތައް މިހާރު ވަނީ މުޅިން ފައިނަލްވެފައެވެ. 

މިއަހަރުގެ މުބާރާތަކީ 48 ޤައުމަކުން ވާދަކުރާ ފުރަތަމަ ވޯލްޑް ކަޕެވެ. މުބާރާތުގެ ގްރޫޕް ސްޓޭޖް ބަހާލެވިފައިވަނީ ޖުމްލަ 12 ގްރޫޕަކަށެވެ. ކޮންމެ ގްރޫޕެއްގައި ހަތަރު ޓީމު ހިމެނޭގޮތަށް ބަހާލެވިފައިވާ މި މުބާރާތް ފެށުމަށް ހަމަޖެހިފައިވަނީ އަންނަ ޖޫން މަހުގެ 11 ވަނަ ދުވަހުއެވެ.

މިފަހަރުގެ ވޯލްޑް ކަޕް ބޭއްވުމަށް ހަމަޖެހިފައިވަނީ ކެނެޑާ، މެކްސިކޯ އަދި އެމެރިކާގައެވެ. މިއީ ތިން ޤައުމެއްގައި މި މުބާރާތް ބާއްވާ ފުރަތަމަ ފަހަރެވެ. ގްރޫޕް އޭގައި ހިމެނެނީ މެކްސިކޯ، ދެކުނު އެފްރިކާ، ދެކުނު ކޮރެއާ އަދި ޗެކް ރިޕަބްލިކެވެ. ގްރޫޕް ބީގައި ކެނެޑާ، ބޮސްނިއާ އެންޑް ހަރްޒެގޮވީނާ، ޤަޠަރު އަދި ސްވިޒަލޭންޑް ހިމެނޭއިރު، ގްރޫޕް ސީގައި ބްރެޒިލް، މޮރޮކޯ، ހެއިޓީ އަދި ސްކޮޓްލޭންޑް ހިމެނެއެވެ.

ގްރޫޕް ޑީގައި އެމެރިކާ، ޕެރަގުއޭ، އޮސްޓްރޭލިއާ އަދި ތުރުކީ ހިމެނޭއިރު، ގްރޫޕް އީގައި ޖަރުމަނު، ކުރަސާއޯ، އައިވަރީ ކޯސްޓް އަދި އިކުއެޑޯ ހިމެނެއެވެ. ގްރޫޕް އެފްގައި ނެދަލޭންޑްސް، ޖަޕާން، ސްވިޑަން އަދި ޓިއުނީޝިއާ ހިމެނޭއިރު، ގްރޫޕް ޖީގައި ބެލްޖިއަމް، މިޞްރު، އީރާން އަދި ނިއުޒީލޭންޑް ހިމެނެއެވެ. ގްރޫޕް އެޗްގައި ސްޕެއިން، ކޭޕް ވާޑޭ، ސައުދީ އަރަބިއްޔާ އަދި އުރުގުއޭ ހިމެނެއެވެ.

މުބާރާތުގެ ފަހު ހަތަރު ގްރޫޕަށް ބަލާއިރު، ގްރޫޕް އައިގައި ފްރާންސް، ސެނެގާލް، އިރާޤު އަދި ނޯވޭ ހިމެނެއެވެ. ގްރޫޕް ޖޭގައި އާޖެންޓީނާ، އަލްޖީރިއާ، އޮސްޓްރިއާ އަދި އުރުދުން ހިމެނޭއިރު، ގްރޫޕް ކޭގައި ޕޯޗުގަލް، ކޮންގޯ ޑީއާރު، އުޒްބެކިސްތާން އަދި ކޮލަމްބިއާ ހިމެނެއެވެ. އެންމެ ފަހު ގްރޫޕް ކަމަށްވާ ގްރޫޕް އެލްގައި ހިމެނެނީ އިންގްލޭންޑް، ކްރޮއޭޝިއާ، ގާނާ އަދި ޕެނަމާއެވެ.