ސަރުކާރުންދޭ ސޯޝަލް ހައުސިން ޔުނިޓްތައް އެޅުމަށް ނަގާފައިވާ ލޯނުދައްކާނީ ފުލެޓާއި ގޯތި ނުލިބޭ މީހުންގެ އަތުން ނަގާ ޓެކްސް ފައިސާއިން ކަމަށް ގާނޫނީ ވަކީލު އިބްރާހީމް އިސްމާޢީލް (އިބްރާ) ވިދާޅުވެއްޖެއެވެ.

ހުޅުމާލެ ދެވަނަ ފިޔަވަހީގައި ހުންނަ ހިޔާ ފުލެޓުތަކުގެ ދެ އަހަރުގެ ކުލި ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ން ދާދިފަހުން ވަނީ ކަނޑާލައިފައެވެ.

އެކަމާ ގުޅިގެން މީސްމީޑިއާގައި ކުރި ޕޯސްޓެއްގައި އިބްރާ ވިދާޅުވީ، ސަރުކާރުން މީހުނަށް ދޫކޮށްފައިހިރި ފްލެޓްތައް ހަދާފައިހުރީ ލޯނު ނަގައިގެން ކަމަށެވެ. އަދި  އެތަންތަނުގެ ކުލި ސަރުކާރުން މާފުކުރި ނަމަވެސް، ހަމަ އެއަހަރުތަކުގައިވެސް ލޯނުދައްކަންޖެހޭނެ ކަމަށެވެ.

އަދި ލޯނުދައްކާނީ ފްލެޓާ ގޯތި ނުލިބޭ މީހުން އަތުންވެސް ޓެކުސް ނަގައިގެން ކަން އޭނާ ފާހަގަކުރެއްވިއެވެ.

”މިއީވެސް ހަމަ އިންޞާފު ހެއްޔެވެ؟ މަވެސް ހަމަ އެކަމާ އުފަލުން ދުވަންވީ ހެއްޔެވެ؟ މަގޭ ބޯހިޔާކުރާނެ ގޮތެއްނެތި، މަކުރާ މަސައްކަތުން އެހެން ބައެއްގެ ގެދޮރަށް ފައިސާދައްކާއިރު، އެތަނުގެ ވެރިންތިބީ މަކަހަލަ އަނެކަކު އަތުން ކުލި ނަގައިގެން، ސަރުކާރަށް ކުލިނުދައްކައެވެ.“ އިބްރާ ވިދާޅުވިއެވެ.

މިއާއެކު އިބްރާ ވަނީ އެ ކުރެވެނީ ދެކޮޅުޖެހޭ ކަމެއްތޯ ސުވާލު ކުރައްވާފައެވެ. 

މިދިޔަ ބުރާސްފަތި ދުވަހު ހިޔާ ފުލެޓުތަކުގެ ވެރިންނަށް އެޗްޑީސީން ފޮނުވި ސިޓީއެއްގައި ވަނީ، އެ ޚަރަދު ސަރުކާރުން ދޭނެ ގޮތް ކިޔައިދީފައެވެ.

އެ ސިޓީގައި ވަނީ، ކޮންްމެ ފުލެޓެއްގެ ފިނިޝިންއަށް ކަނޑައަޅާފައިވާ ދެ ލައްކަ ރުފިޔާގެ ޑިސްކައުންޓަށް ނުދެއްކި އޮތް އަދަދުން, ކުއްޔަށް ނުދެއްކި ހުރި ފައިސާ އަންނަ ބުދަ ދުވަހުން ފެށިގެން އުނިކުރާނެ ކަމަށެވެ.

އެ އަދަދަށް ފަހު، ބާކީ ކުއްޔަށް ދައްކަން ޖެހޭ ފައިސާއެއް ނެތް ނަމަ، ޑިސްކައުންޓަށްވާ ބައި ހަމަވަންދެން މަހަކު 5،300 ރުފިޔާ ދައްކަން ނުޖެހޭނެ ކަމަށް އެ ސިޓީގައި ބުނެފައިވެއެވެެ. އަދި، މެނޭޖުމަންޓު ފީ ދައްކަން ޖެހުނު ނަމަވެސް ހިޔާ ފުލެޓުތަކުގެ ކުލި ދެން ދައްކަން ފަށަން ޖެހޭނީ މެއި އެކެއް، 2028ގައެވެ.

އެޗްޑީސީން އެ ސިޓީގައި ބުނި ގޮތުގައި، ދެ ލައްކަ ރުފިޔާގެ ޑިސްކައުންޓު ދީ ހަމަވުމުން، ފުލެޓުގެ އަގު ދައްކާ ޚަލާސްކުރެވެން ދެން މަހު ކުއްޔަކީ، 5،300 ރުފިޔާއެވެ.

މި ސަރުކާރުގައި މީގެ ކުރިން ވަނީ ހިޔާ ފުލެޓުތަކުގެ ޖޫރިމަނާ މާފުކޮށް، ހުޅުމާލޭ ފުރަތަމަ ފިޔަވަހީގެ ފުލެޓްތަކުގެ މަހު ކުލި 20 ޕަސެންޓާ ހަމައަށް ކުޑަކޮށް، ވިނަރެސް ފްލެޓްތަކުގެ ޑައުންޕޭމަންޓު 50 އިންސައްތަ ކުޑަކޮށް، މަހު ކުލި 12 ވަރަކަށް ހާސް ރުފިޔާއަށް ކުޑަކޮށްފައެވެ.