އޯޓިޒަމް ހުންނަ ފަރާތްތަކުގެ ހުނަރުތައް ތަރައްޤީކޮށް، އަމިއްލަ ފައިމައްޗަށް ތެދުވުމުގެ ފުރުޞަތު ދިނުމަކީ މުޅި ޤައުމުގެ އިޖުތިމާޢީ އޮނިގަނޑު ވަރުގަދަވެގެންދާނެ ކަމެއް ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.
ދުނިޔޭގެ އޯޓިޒަމް ހޭލުންތެރިކަމުގެ ދުވަހާ ގުޅިގެން، ރައީސް މުޢިއްޒު މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ، އޯޓިޒަމް ހުންނަ ފަރާތްތަކަކީ މުޖުތަމަޢުގެ މުހިންމު ބައެއް ކަމަށާއި، ކޮންމެ މީހަކަށްމެ އިޙްތިރާމާއި، އޯގާތެރިކަމާއި، އުނގެނުމާއި ކުރިއެރުމުގެ ހަމަހަމަ ފުރުޞަތުތައް ލިބެންޖެހޭ ކަމަށެވެ.
އަދި ގޭތެރެއާއި، ސުކޫލުތަކާއި، މަސައްކަތުގެ މާޙައުލާއި، އާންމު ތަންތަނުގައި އެފަރާތްތައް ބައިވެރިކުރުވުން ފެށެނީ ހޭލުންތެރިކަމާއި، އޯގާތެރިކަމާއި، އަދި އަމަލީ މަސައްކަތުން ކަމަށްވެސް ރައީސް ފާހަގަކުރެއްވިއެވެ.
މިއާއެކު އޯޓިޒަމް ހުންނަ ކުދިންނަށް ކުރީބައިގައި އެހީތެރިކަން ފޯރުކޮށްދިނުމާއި އެންމެން ބައިވެރިކޮށްގެން ދެވޭ ތަޢުލީމާއި، މުޖުތަމަޢުގެ ބަލައިގަތުން އިތުރުކުރުމުގެ މުހިންމުކަމަށް ރައީސް އަލިއަޅުއްވާލެއްވިއެވެ.
މީގެ އިތުރުން، އެފަރާތްތަކުގެ ހުނަރުތައް ތަރައްޤީކޮށް، އަމިއްލަ ފައިމައްޗަށް ތެދުވުމުގެ ފުރުޞަތު ދިނުމަކީ މުޅި ޤައުމުގެ އިޖުތިމާޢީ އޮނިގަނޑު ވަރުގަދަވެގެންދާނެ ކަމެއް ކަމުގައި އެމަނިކުފާނު ވިދާޅުވިއެވެ.
ސަރުކާރުން ކުރަމުންދާ މަސައްކަތްތަކާ ގުޅޭގޮތުން ރައީސް ވިދާޅުވީ، ސުކޫލުތަކުގެ ތަޢުލީމީ އޮނިގަނޑު އެންމެން ބައިވެރިކުރެވޭނެ ފަދަ ގޮތަކަށް ހަރުދަނާކުރުމަށާއި، މަސައްކަތްތެރިކަމުގެ ތަމްރީނުތައް ފުޅާކުރުމަށާއި، އޯޓިޒަމް ހުންނަ ފަރާތްތަކަށް ކުރިމަތިވާ ގޮންޖެހުންތަކަށް ޙައްލު ހޯދައިދިނުމަށް މުހިންމު ފިޔަވަޅުތަކެއް އަޅަމުންދާ ކަމަށެވެ.
އަދި އޯޓިޒަމް ހުންނަ ކޮންމެ ފަރާތަކީވެސް އިޙްތިރާމާއި، މަޤްޞަދެއް އޮތް އަދި މުޖުތަމަޢުގެ ބައެއްގެ ގޮތުގައި އިޙްސާސް ކުރެވޭނެ ފަދަ ދިރިއުޅުމެއް އުޅުމުގެ ޙައްޤު ލިބިގެންވާ ބައެއްކަމަށްވެސް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
