ދުނިޔޭގެ އެންމެބޮޑު އާބާދީއެއް އޮންނަ އިންޑިއާގައި ބޯހިމެނުމުގެ މަސައްކަތް ފަށައިފިއެވެ،

އިންޑިއާގައި އެންމެފަހުން ބޯހިމެނުމުގެ މަސައްކަތް ކުރިއަށްގެންދިއުމަށް ނިންމާފައި އޮތީ 2021 ވަނަ އަހަރެވެ. ނަމަވެސް ކޮވިދް ބަލިމަޑުކަމާހެދި ތާރީހު ފަސްކުރީއެވެ. އެޤައުމުގައި ބޯހިމެނުމުގެ މަސައްކަތް ކުރިއަށް ގެންދަނީ ޑިޖިިޓަލްކޮށެވެ. 

އިންޑިއާގައި މިފަހަރުގެ ބޯހިމެނުން ކުރިއަށް ގެންދިއުމަށް ހަމަޖެހިފައިވަނީ މައިގަނޑު ދެ މަރުހަލާއަކަށް ބަހާލައިގެންނެވެ. ފުރަތަމަ މަރުހަލާގައި ކުރިއަށްދާނީ ގޭބިސީތަކުގެ ދަފްތަރު އެކުލަވާލުމާއި ދިރިއުޅޭ ތަންތަނުގެ ހާލަތު ދެނެގަތުމުގެ މަސައްކަތެވެ. މި މަރުހަލާ އޭޕްރީލް 1، 2026 އިން ފެށިގެން ސެޕްޓެމްބަރު މަހުގެ ނިޔަލަށް ކުރިއަށްދާއިރު، ދެވަނަ މަރުހަލާ ކަމަށްވާ މީހުންގެ އަދަދު ކަނޑައެޅުމުގެ މަސައްކަތް ކުރިއަށްދާނީ ފެބްރުއަރީ 2027 ގައެވެ.

މި ބޯހިމެނުމުގެ މަސައްކަތް ފެށިއިރު މިފަހަރު އެންމެ ހާއްސަ ކަމަކީ ބޯހިމެނުމުގެ މަސައްކަތުގައި ބޭނުންކުރުމަށް އަލަށް ތައާރަފްކުރި ޑިޖިޓަލް ނިޒާމެވެ. މައުލޫމާތު އެއްކުރުމަށް ކަރުދާސް ފޯމުގެ ބަދަލުގައި ބޭނުންކުރަނީ ހާއްސަ މޯބައިލް އެޕްލިކޭޝަނެކެވެ. މީގެ އިތުރުން، އާންމު ރައްޔިތުންނަށް އަމިއްލައަށް މައުލޫމާތު ހުށަހެޅޭ ގޮތަށް "ސެލްފް އެނިއުމަރޭޝަން" ޕޯޓަލްއެއް ވަނީ ގާއިމްކޮށްފައެވެ. މި ޕޯޓަލް މެދުވެރިކޮށް 16 ބަހަކުން މައުލޫމާތު ފުރިހަމަކުރުމުގެ ފުރުސަތު އޮންލައިންކޮށް ލިބިގެންދާނެއެވެ.

ބޯހިމެނުމުގެ މަސައްކަތްތައް މުޅި އިންޑިއާގެ ހުރިހާ ސްޓޭޓްތަކެއްގައި ފެށިފައިވާއިރު، ފުރަތަމަ މަރުހަލާގައި 33 ސުވާލެއް ކުރެވޭނެއެވެ. އޭގެ ތެރޭގައި ގޭގެ ހާލަތާއި، ލިބިފައިވާ އަސާސީ ހިދުމަތްތަކާއި، ގޭބިސީގައި ބޭނުންކުރާ ސާމާނުތަކާ ގުޅޭ މައުލޫމާތު ހިމެނެއެވެ. މި ބިޔަ މަސައްކަތުގައި 3 މިލިއަނަށްވުރެ ގިނަ މުވައްޒަފުން ހަރަކާތްތެރިވަމުންދާއިރު، އިންޑިއާގެ ރައީސާއި ބޮޑުވަޒީރު ވަނީ މިހާރު އަމިއްލައަށް މައުލޫމާތު ހުށަހަޅުއްވާފައެވެ.

ސަރުކާރުން ބުނެފައިވަނީ، މި މަސައްކަތަށް ޖުމްލަ 11،718 ކްރޯޑް ރުޕީސް ހަރަދުވާނެއެވެ. ބޯހިމެނުމުގެ މައިގަނޑު އަމާޒަކީ ގައުމުގެ ތަރައްގީގެ ޕްލޭންތައް އެކުލަވާލުމަށް ބޭނުންވާ ސައްހަ މައުލޫމާތު އެއްކުރުމެވެ. މި ފަހަރުގެ ބޯހިމެނުމުގެ ނަތީޖާ އިއުލާންކުރުމަށް ހަމަޖެހިފައިވަނީ 2027 ވަނަ އަހަރުއެވެ.