ހުޅުމާލޭގައި ހުރި ޕާކިން ސްލޮޓްތައް އުސޫލާ ހިލާފަށް އެކި ފަރާތްތަކަށް ދޫކުރަމުންދާ ވާހަކަތައް އެޗްޑީސީން ދޮގުކޮށްފިއެވެ.

މިކަމާ ގުޅޭގޮތުން އެޗްޑީސީން މިއަދު ބުނީ، ހުޅުމާލޭގެ އެކި ސަރަހައްދުތަކުގައި ޕާކް ކުރުމަށް ހާއްސަކޮށްފައިވާ ޖާގަތައް އުސޫލުން ބޭރުން އެކި ފަރާތްތަކަށް ދޭކަމަށް ބައެއް މީޑިއާތަކުގައި ފަތުރަމުންދާ ވާހަކަތަކަކީ އެއްވެސް އަސާސްތަކެއް ނެތް ވާހަކަތަކެއްކަމަށެވެ.

ބައެއް މީޑިއާގައި ދައުރުވަމުންދާ މައުލޫމާތުތަކުގައި ބުނެފައިވަނީ ވަކި ބަޔަކަށް ނާޖާއިޒު މަންފާ ލިބޭ ގޮތަށް ޕާކިންގ ސްލޮޓުތައް ވިއްކަމުންދާ ކަމަށެވެ. އެޗްޑީސީން ބުނީ ޕާކިން ސްލޮޓްތައް ދޫކުރުމުގައި އެކުންފުނިން އަމަލުކުރަމުންދަނީ ކަނޑައެޅިފައިވާ އުސޫލްތަކާ އެއްގޮތަށް ކަމަށެވެ.

ޕާކިން ސްލޮޓްތައް ވިއްކުމަށް އެޗްޑީސީން ވަނީ އާއްމުކޮށް  ދެފަހަރެއްގެ މަތިން އިއުލާނުކޮށްފައެވެ. އަދި އެކަމަށް ކުރިމަތިލީ ފަރާތްތަކުގެ ތެރެއިން ޝަރުތު ހަމަވި ފަރާތްތަކުގެ ނަންތައް އާއްމުކުރި ކަަމަށްވެސް އެޗްޑީސީން ވަނީ ބުނެފައެވެ. 

އެޗްޑީސީން ވަނީ ހާމަކަން ބޮޑު ގޮތެއްގައި ޕާކިންގ ސްލޮޓުތައް ދޫކުރުމުގެ މަސައްކަތް ކުރަމުންދަނިކޮށް، މިކަމާއި ގުޅޭގޮތުން އާންމުންނަށް އޮޅުން އޮޅުން އަރާ ގޮތައް ހަގީގަތާ ހިލާފު މައުލޫމާތު ފަތުރަމުންދާތީ އެކަމާ ކަންބޮޑުވުން ފާޅުކޮށްފައެވެ. އަދި އެކަން ހަރުކަށި އިބާރާތުން ކުށްވެރިކުރާކަމަށާއި ހަޤީގަތާ ހިލާފަށް މައުލޫމާތު ނުފެތުރުމަށްވެސް އެޗްޑީސީން ވަނީ އިލްތިމާސްކޮށްފައެވެ.