އިރާނުގެ ކުރީގެ ޚާރިޖީ ވަޒީރު އަދި އެޤައުމުގެ ސްޓްރެޓީޖިކް ކައުންސިލް އޮން ފޮރިން ރިލޭޝަންސްގެ ރައީސް, ކަމާލް ޚަރާޒީގެ ގެއަށް އަމާޒުކޮށް އިސްރާއީލުން ވައިގެ ހަމަލާތަކެއް ދީފިއެވެ.
އަލްޖަޒީރާއިން ރިޕޯޓްކުރި ގޮތުގައި ކަމާލް ކަރާޒީއަށް ދިން މި އުދުއާނުގައި ބޮޑެތި އަނިޔާތަކެއް ލިބި، ހާލުކޮޅު ވަނީ ވަރަށް ސީރިއަސްއެވެ. ތެހެރާންގައި ހުންނަ އޭނާގެ ދިރިއުޅުއްވާ ގެއަށް މި ހަމަލާ އަމާޒުވީ ބުދަ ދުވަހުގެ ރޭގަނޑުގެ ވަގުތެއްގައެވެ.
ރިޕޯޓްތައް ބުނާގޮތުގައި މި ހަމަލާގައި ކަމާލް ޚަރާޒީގެ އަނބިކަނބަލުން ވަނީ އަވަހާރަވެފައެވެ. ޚަރާޒީއަށް ލިބުނު އަނިޔާތަކަށް ހޮސްޕިޓަލުގައި ފަރުވާދެމުންދާއިރު، މި ހަމަލާއަކީ އެމެރިކާ އާއި އިސްރާއީލުން ގުޅިގެން ދިން ހަމަލާއެއް ކަމަށް އިރާނުގެ މީޑިއާތަކުން ވަނީ ރިޕޯޓްކޮށްފައެވެ.
ޚަރާޒީއަށް މި ހަމަލާ އަމާޒުވިއިރު، އޭނާއަކީ އެމެރިކާގެ ނައިބު ރައީސް ޖޭޑީ ފާންސްއާއެކު ސުލްހައިގެ މަޝްވަރާތަކެއް ބޭއްވުމަށް ޕާކިސްތާން މެދުވެރިކޮށް މަސައްކަތް ކުރައްވަމުން ގެންދެވި މުހިންމު ބޭފުޅެކެވެ. މަސްްރަހު ދިރާސާކުރާ ފަރާތްތަކުން ބުނާގޮތުގައި މި ހަމަލާގެ މަގްސަދަކީ ދެ ގައުމުގެ ދެމެދުގައި ކުރިއަށްދާ ޑިޕްލޮމެޓިކް މަސައްކަތްތަކަށް ހުރަސް އެޅުމެވެ.
ކަމާލް ޚަރާޒީއަކީ 1997 އިން 2005 އަށް އިރާނުގެ ފޮރިން މިނިސްޓަރުކަން ކުރެއްވި، އެގައުމުގެ ޚާރިޖީ ސިޔާސަތުގައި ނުފޫޒުގަދަ ބޭފުޅެކެވެ. އޭނާއަކީ އަވަހާރަވެފައިވާ އިރާނުގެ އެންމެ މަތީ ލީޑަރު އަލީ ޚާމަނާއީގެ އަރިސް މުޝީރެއްގެ އިތުރުން، މިހާރުގެ ލީޑަރު މުޖްތަބާ ޚާމަނާއީގެ ވެސް އިތުބާރު އޮތް އެޑްވައިޒަރެކެވެ.
މި ހަމަލާއާ ގުޅިގެން އިރާނުގެ ދިފާއީ ވުޒާރާއިން ބުނެފައިވަނީ، މިއީ އެގައުމުގެ އިސްވެރިންނަށް އަމާޒުކޮށް ހިންގާ ޖަރީމާއެއް ކަމަށާއި، މިފަދަ ހަމަލާތަކުގެ ސަބަބުން އެގައުމުގެ އަޒުމަށް ބަދަލު ނާންނާނެ ކަމަށެވެ.
Advertisement
This content is created and paid for by advertisers and does not involve Voice Journalists
