ދެހާސްފަސް ވަނަ އަހަރުން ފެށިގެން މިހާތަނަށް ބީއެމްއެލްގެ އޭޓީއެމް ނެޓްވާކްގައި ހިމެނޭ އޭޓީއެމް އަދަދު އޭގެ ކުރީ 24 އަހަރަށް ވުރެ ދެ ގުނަ އިތުރުވެފައިވާ ކަމަށް ބީއެމްއެލްގެ ސީއީއޯ އަދި އެމްޑީ މުހައްމަދު ޝަރީފް ވިދާޅުވެއްޖެ އެވެ.

އޭނާ މިހެން ވިދާޅުވީ ރޭ އެ ބޭންކުން ސިންކްރޮނައިޒްކޮށް އެއްފަހަރާ، 90 ކޭޝްރީސައިކްލާ އޭޓީއެމް ހުޅުވުމަށް ބޭއްވި ހަފްލާގައި ވާހަކަދައްކަވަމުންނެވެ.

ޝަރީފް ވިދާޅުވި ގޮތުގައި މިހާރު ރާއްޖޭގެ ހުރިހާ ރަށެއްގައި، 187 ރަށެއްގައި 340 އޭޓީއެމް އެބަހުއްޓެވެ.

"2025 އިން ފެށިގެން މިއަދު މިހުޅުވޭ އޭޓީއެމްތަކުގެ ޖުމްލަ އަދަދު އޭގެ ކުރީގައި ހުރި އަދަދަށް ވުރެ ދެ ގުނަ އިތުރު," ޝަރީފް ވިދާޅުވި އެވެ.

ޝަރީފް އިތުރަށް ވިދާޅުވީ، ސެލްފްސާވިސް ބޭންކިން އޭޓީއެމްގެ ހިދުމަތަކީ ހުރިހާ ރަށެއްގެ ރައްޔިތުން ވެސް އަބަދުވެސް ބޭނުންވާ ހިދުމަތެކެވެ. މާލެ އާއި ރާއްޖޭގެ މީހުން ދިރިއުޅޭ ކޮންމެ ރަށެއްގައި ގާއިމްކޮށްފައިވާ މި ސެލްފްސާވިސް ބޭންކިން އޭޓީއެމް ހިދުމަތް ބަލައިގެންފައިވާ މިންވަރު ހާމަކޮށްދެނީ މި ހިދުމަތް ބޭނުންކުރަމުންދާ މިންވަރުން ކަމަށެވެ.

މިދިޔަ އަހަރުގެ ތަފާސް ހިސާބު ހާމަކުރައްވަމުން ޝަރީފް ވިދާޅުވީ މުޅި އޭޓީއެމް ނެޓްވާކް މެދުވެރިކޮށް 2025 ވަނަ އަހަރު ވަނީ 17.1 ބިލިއަން ރުފިޔާ ޖަމާކޮށްފައިވާ ކަަމަށެވެ. އަދި 8.4 މިލިއަން މުއާމަލާތްކޮށްފައިވާ ކަމަށް ވިދާޅުވި އެެވެ.

މިދިޔަ އަހަރު ބޭންކުން 105 ރަށުގައި އަލަށް ބެހެއްޓި އޭޓީއެމްތަކުން މިދިޔަ އަހަރު 356 މިލިއަން ރުފިޔާ ޖަމާކޮށްފައިވެ އެވެ.