ޤައުމާއި ރައްޔިތުންގެ ލާބައަށް ކުރިއަށްގެންދާ މަޝްރޫޢުތައް ކާމިޔާބުކަމާއެކު ނިންމާލެވޭނީ ސަރުކާރާއެކު އެއް ރޫހެއްގައި މަސައްކަތްކޮށްގެން ކަމަށް އެމްޓީސީސިގެ މެނޭޖިން ޑިރެކްޓަރު އަހުމަދު ސައުދީ ވިދާޅުވެއްޖެއެވެ.

ސަޢުދީ މިހެން ވިދާޅުވީ، މާލޭ ޓެކްސީ ލައިންގެ ޚިދުމަތް ފެށުމައް ބޭއްވި ރަސްމިއްޔާތުގައި ވާހަކަދައްކަވަމުންނެއެވެ.

ރައީސުލްޖުމްހޫރިއްޔާ ރައްޔިތުންނަށް ވެވަޑައިގެންފައިވާ ވަޢުދުފުޅުތައް ހަގީގަތަކަށް ހެއްދެވުމަށް ރާއްޖޭގެ އެކިކަންކޮޅުތަކުގައި ގިނަ މަޝްރޫޢުތަކެއް އެމްޓީސީސީން މިހާރުވެސް ކުރިއަށްގެންދާ ކަމަށެވެ. އެގޮތުން، ބަނދަރުތަކާއި، ސުކޫލް ތަކާއި، ހޮސްޕިޓަލުތަކާ، މަގުތަކާއި ކުޅިވަރު ޕާކުތައް ފަދަ ތަންތަން ރަށްރަށުގެ ރައްޔިތުން އެދޭ ގޮތަށް ކުރިއަށް ގެންދިޔުމަށް އެ ކުންފުންޏާ ހަވާލުލޮށްފައިވާކަން ފާހަގަކުރެއްވިއެވެ. 

މިއާއެކު ސަޢުދީ ވިދާޅުވީ، ތަރައްޤީއަށް ކުރެވޭ އެފަދަ ކޮންމެ މަސައްކަތަކީ އުޖާލާ މުސްތަޤުބަލެއް ހޯދައިދިނުމަށް ކުރެވޭ މަސައްކަތް ކަމަށެވެ. 

އެމްޓީސީސިގެ މެނޭޖިން ޑިރެކްޓަރު އަހުމަދު ސައުދީ

ސަރުކާރުގެ ޓެކްސީ ލައިނުގައި ބޭނުންކުރާނީ، %100 ތިމާވެއްޓާ ރައްޓެހި އުޅަނދުތަކެކެވެ. މީގެތެރޭގައި 3 ސައިޒެއްގެ އުޅަނދު ހިމެނޭއިރު، މި ޚިދުމަތަކީ 24 ގަޑިއިރު ދޭނެ ޚިދުމަތެއްކަން ސަޢުދީ ވަނީ ފާހަގަކުރައްވާފައެވެ.

ޓެކްސީ ލައިންގެ ފުރަތަމަ ހަފުތާގެ ޚިދުމަތަކީ ތަޖުރިބާ ދަތުރުތަކެއްކަމަށާއި، މި މުއްދަތުގައި އެއްވެސް އަގަކާ ނުލާ ޙިދުމަތް ލިބޭނެކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ، އެމްޓީސީސީން ބުނެފައިވެއެވެ.