މިއަދު ބޭއްވިގެންދިޔަ އިންތިހާބުން ދައްކުވައިދިނީ ސަރުކާރުން ގެންގުޅޭ ދޯހަޅި ސިޔާސަތަސް ރައްޔިތުން ނުރުހޭކަން ކަމަށް އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ.
ލޯކަލް ކައުންސިލާއި މޭޔަރު ގޮނޑީގެ ވޯޓުން މިހާތަނަށް ދެއްކި ނަތިޖާއިން ކުރި ހޯދާފައިވަނީ އިދިކޮޅު އެމްޑީޕީއެވެ. މިކަމާ ގުޅިގެން އެކްސްގައި ކުރެއްވި ޕޯސްޓެއްގައި ޝާހިދު ވިދާޅުވީ، މިއަދު މިފެނުނީ މުޅި ރާއްޖެ އަލުން ރަންރީނދޫ ވެގެން ދިޔަ މަންޒަރުކަމަށެވެ.
އެގޮތުން ފެނިގެން މިދިޔައީ، ސަރުކާރުން ގެންގުޅޭ ދޯހަޅި އަދި ދެއުޅިއެއްނުވާ ސިޔާސަތަށް ރައްޔިތުން ނުރުހޭ ކަމުގެ ސާފުމެސެޖެއް ކަމަށް ޝާހިދު ވިދާޅުވިއެވެ.
ޝާހިދު ވަނީ ކެމްޕެއިންގައި އެމްޑީޕީއަށް ބަޔަތުހިފައިގެން ކުރިއަށްދިޔަ ހުރިހާ ފަރާތްތަކަށް ޝުކުރު އަދާކުރައްވައި ސާބަސްދެއްވާފައެވެ. ޝާހިދު ވިދާޅުވީ އެމްޑީޕީ އަބަދުވެސް ދެމިއޮންނާނީ ދިވެހިރައްޔިތުންގެ ވިންދާއި ޚިޔާލާއި މަޝްވަރާއާއި އެކު ރައްޔިތުންގެ ޚިދުމަތުގައި ކަމަށެވެ.
މިހާތަނަށް ގުނި ފޮށިތަކުގެ ނަތީޖާތައް ދައްކާގޮތުން އެމްޑީޕީން ވަނީ މާލެ، ކުޅުދުއްފުށިސިޓީ، ތިނަދޫސިޓީ، އައްޑޫ އަދި ފުވައްމުލަކު ސިޓީގެ މޭޔަރު ގޮނޑި ކާމިޔާބުކޮށްފައެވެ. މީގެ އިތުރުން އެމްޑީޕީން ވަނީ ކައުންސިލްގެ ގިނަ އަދަދެއްގެ ގޮނޑިތައްވެސް ކާމިޔާބުކޮށް، އަންހެނުންގެ ތަރައްޤީއަށް މަސައްކަތްކުރާ ގިނަ ގޮނޑިތަކެއްވެސް ނަގާފައެވެ.
Advertisement
This content is created and paid for by advertisers and does not involve Voice Journalists
