އިއްޔެ ބޭއްވި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބުގައި، މާލެސިޓީގެ އެ ކޮމިޓީގެ ރައީސާގެ މަގާމަށް އިންތިޚާބުނުވި ނަމަވެސް އެ ދަތުރުގައި ބޮޑު ކާމިޔާބީތަކެއް ލިބިފައިވާ ކަމަށް ޕީީއެންސީގެ ފަރާތުން ވާދަކުރެއްވި ކެނޑިޑޭޓް އާއިޝަތު އަލައިކާ ވިދާޅުވެއްޖެއެވެ.

އިއްޔެ ބޭއްވި އިންތިޚާބުގައި މާލޭ އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ ރައީސާގެ ގޮނޑި ކާމިޔާބު ކުރީ އެމްޑީޕީގެ ކެންޑިޑޭޓް ޢާއިޝަތު ރީޝާއެވެ. 

އިންތިޚާބުގެ ނަތީޖާ ގަބޫލުކުރައްވައި، އަލައިކާ އެކްސްގައި ކުރެއްވި ޕޯސްޓެއްގައި ވިދާޅުވީ، އިންތިޚާބުގެ ގޮނޑި ކާމިޔާބު ނުކުރެވުނު ނަމަވެސް، މި ދަތުރުން އޭނާއަށް ލިބުނީ މާ މަތިވެރި އަދި ދެމިގެންދާނެ ކާމިޔާބީއެއް ކަމަށެވެ. އެއީ ގިނަ ބައެއްގެ އިތުބާރާއި، ލޯތްބާއި، ޔަގީންކަން ކަމަށާއި، މިއީ އޭނާ ނުހަނު އުފަލާއެކު ބަލައިގަންނަ ބޮޑު ކާމިޔާބީއެއް ކަމަށް ވިދާޅުވިއެވެ.

އަލައިކާ ފާހަގަކުރެއްވި ގޮތުގައި އޭނާގެ މި ދަތުރަކީ ހަމައެކަނި މަޤާމެއް ހޯދުމަށް ކުރި މަސައްކަތެއް ނޫނެވެ. އެއީ ގިނަ އާއިލާތަކެއްގެ ޙައްޤުގައި، އަދި ހަމަހަމަ ފުރުޞަތުތަކާއި މާލީ މިނިވަންކަން ހޯދައިދިނުމަށް ކުރެވުނު އިޚްލާޞްތެރި މަސައްކަތެކެވެ. އިޤްތިޞާދީ ގޮތުން އަންހެނުން ބާރުވެރިކުރުވުމަކީ ހަމައެކަނި ލިބޭ އިނާޔަތެއް ނޫން ކަމަށާއި، އެއީ އެންމެންނަށް ލިބިގެންވާ ޙައްޤެއް ކަމަށްވެސް އޭނާ ވިދާޅުވިއެވެ.

ސިޔާސީ ދާއިރާގައި ކުރިމަތިވި ގޮންޖެހުންތަކަށް އަލިއަޅުވާލައްވަމުން އަލައިކާ ވިދާޅުވީ، މި ދަތުރުގައި މާޔޫސްކަމާއި ބައެއް ފަރާތްތަކުގެ ކެހިވެރިކަން ކުރިމަތިވި ކަމަށެވެ. އަދި އޭނާގެ ނިޔަތާއި މަސައްކަތް އޮޅޭގޮތަށް ތަފާތު ލޭބަލްތައް އެޅުވުނު ނަމަވެސް، އޭނާ ހުރީ ސާބިތުކަމާއެކު އޭނާ ގަބޫލުކުރާ އުޞޫލުތަކުގެ މަތީގައި ކަމަށް ވިދާޅުވިއެވެ.

މިއަދަކީ މި މަސައްކަތުގެ ނިމުން ނޫންކަން ފާހަގަކުރައްވަމުން، އަލައިކާ ވިދާޅުވީ މިއީ އާ ހިތްވަރަކާއެކު މަސައްކަތް ކުރިއަށް ގެންދިއުމަށް ލިބުނު ފުރުޞަތެއް ކަމަށެވެ. އަދި ކުރިއަށް އޮތް ތަނުގައިވެސް އިޚްލާޞްތެރިކަމާއެކު ޤައުމީ ޚިދުމަތުގައި ދެމިހުންނާނެ ކަމުގެ ޔަގީންކަން އޭނާ ވަނީ ދެއްވާފައެވެ.