އިއްޔެ ބޭއްވި ލޯކަލް ކައުންސިލް އިންތިޚާބުގައި ކ. މާފުށީގެ ކައުންސިލް ރައީސްގެ މަގާމު ވެރިކަންކުރާ ޕީއެންސީން ކަށަވަރުކޮށްފިއެވެ. މިއީ މި މަގާމު އެމްޑީޕީއަށް ނުލިބުނު ފުރަތަމަ ފަހަރެވެ.
އިންތިޚާބުގެ ވަގުތީ ނަތީޖާ ދައްކާ ގޮތުން މާފުށީ ކައުންސިލްގެ ރައީސްގެ މަގާމަށް އިންތިހާބު ވެވަޑައިގަތީ ޕީއެންސީގެ ޓިކެޓުގައި ކުރިމަތިލެއްވި އަލީ ޝައްމޫނެވެ. މިހާތަނަށް ގުނި ވޯޓު ފޮށިތަކުގެ ވަގުތީ ނަތީޖާ ދައްކާ ގޮތުން ޝައްމޫނަށް 670 ވޯޓު ލިބުނެވެ.
އެމްޑީޕީގެ ޓިކެޓްގައި އޭނާއާ ވާދަކުރެއްވީ މިހާރު ވެސް ކައުންސިލްގެ ރައީސްއަކަށް ހުންނެވި ހަސަން ސޮލާހެވެ. ވަގުތީ ނަތީޖާ ދައްކާގޮތުން ސޮލާހަށް ލިބުނީ 487 ވޯޓެވެ.
މީގެ ކުރިން އެމްޑީޕީގެ މެޖޯރިޓީ ނަގާ މާފުށީ ކައުންސިލްގެ ވަގުތީ ނަތީޖާ ދައްކާގޮތުން އެ ކައުންސިލްގައި ހިމެނޭ ފަސް ގޮނޑީގެ ތެރެއިން ތިން ގޮނޑި ނެގީ ޕީއެންސީންނެވެ. އަނެއް ދެގޮނޑީގެ ތެރެއިން އެއް ގޮނޑި އެމްޑީޕީ އަށް ލިބުނުއިރު، އަމިއްލަ ގޮތުން ވާދަކުރެއްވި ކެންޑިޑޭޓަކު ވެސް ގޮނޑިއެއް ކަށަވަރު ކުރިއެވެ.
މީގެ އިތުރުން، މާފުށީ އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ މެޖޯރިޓީވެސް ނަގާފައިވަނީ ޕީއެންސީންނެވެ. އެގޮތުން ކޮމިޓީގެ ރައީސަކަށް އިންތިހާބުވެވަޑައިގެންފައި ވަނީ ޕީއެންސީގެ ކެންޑިޑޭޓު ސަމްސީނާ މުހައްމަދެވެ. ބާކީ ހުރި ހަތަރު ގޮނޑީގެ ތެރެއިން ދެ ގޮނޑި ޕީއެންސީން ހޯދިއިރު، އެއް ގޮނޑި އެމްޑީޕީ އަދި އަނެއް ގޮނޑި އަމިއްލަ ގޮތުން ވާދަކުރެއްވި ކެންޑިޑޭޓަކަށް ވަނީ ލިބިފައެވެ.
Advertisement
This content is created and paid for by advertisers and does not involve Voice Journalists
