ނިމިގެންދިޔަ ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމެޓީތަކުގެ އިންތިހާބު އަދި ފެންނަ ނުފެންނަ ވޯޓްގައި އެމްޑީޕީން ކާމިޔާބު ހޯދީ ވަކި ބަޔަކު އެ ޕާޓީއަށް އެނބުރިއައިސްގެން ނޫން ކަމަށް ކުރީގެ ރައީސް އިބްރާހިމް މުހައްމަދު ސޯލިހްގެ އަނބިކަނބަލުން ފަޒްނާ މުހައްމަދުގެ ކޮއްކޮ, ނަޒީހާ އަހްމަދު ވިދާޅުވެއްޖެ އެވެ.

ނަޒީހާ މިހެން ވިދާޅުވީ އެކްސްގައި ކުރެއްވި ޕޯސްޓެއްގަ އެވެ. އެ ޕޯސްޓްގައި ނަޒީހާ ވިދާޅުވީ އިންތިހާބުން މޮޅުވީ އެމްޑީޕީގެ މެންބަރުން އެކުގައި ނިކުމެ މަސައްކަތް ކުރީމަ ކަމަށެވެ. އެއީ ވަކި ބަޔަކު އެނބުރި އައިސްގެން ވީކަމެއް ނޫން ކަމަށް ވިދާޅުވި އެވެ.

ނަޒީހާ މިހެން ވިދާޅުވީ ކުރީގެ ރައީސް މުހައްމަދު ނަޝީދާއި އެމަނިކުފާނާއެކު އެނބުރި އެމްޑީޕީއަށް އައި ޓީމަށް ކަމަށް ބެލެވެ އެވެ. ކުރީގެ ރައީސް ސޯލިހްގެ ވެރިކަމުގައި ދެ ރައީސުންގެ ގުޅުން ގޯސްވެ އެތައް ތުހުމަތުތަކެއް ކުރެއްވުމަށް ފަހު ނަޝީދު ވަނީ އެމްޑީޕީން ވަކިވެވަޑައިގެންފަ އެވެ. ނަޝީދުގެ ވަފާތެރީން ވަނީ ދަ ޑިމޮކްރެޓްސް ނަމުގައި ޕާޓީއެއް އުފައްދާފަ އެވެ. އެމަނިކުފާނު އޭރު ވަނީ އެމްޑީޕީ "ރޫޅާލާނެ" ކަމަށް ވިދާޅުވެފަ އެވެ.

ނަމަވެސް ދަ ޑިމޮކްރެޓްސްއަށް ސިޔާސީ މައިދާނުގައި ބޮޑު ކާމިޔާބީއެއް ނުހޯދުނެވެ. އެމްޑީޕީ ދިޔައީ ވަރުގަދަ ވަމުންނެވެ. އާހިރުގައި އެމަނިކުފާނާއި މުޅި ޓީމު ވަނީ ދަ ޑިމޮކްޓެސް ދޫކޮށް އަލުން އެމްޑީޕީއާ ގުޅިފަ އެެވެ.

މި މަހުގެ ހަތަރުވަނަ ދުވަހު އޮތް އިންތިހާބަކީ ނަޝީދު އެނބުރި ވަޑައިގެންނެވި ފަހުން އޮތް ފުރަތަމަ އިންތިހާބެވެ. މި އިންތިހާބުގެ ކެމްޕެއިނަށް ނަޝީދު ވަނީ ގިނަ ރަށްތަކަކަށް ވަޑައިގެންފަ އެވެ.

ނަޒީހާގެ މި ވާހަކަތަކާއި ގުޅިގެން ނަޝީދުގެ ވަފާތެރި ބައެއް މެންބަރުން ވަނީ ފާޑުވިދާޅުވެފަ އެވެ.