ނާސާގެ އާރްޓެމިސް 2 މިޝަންގައި ބައިވެރިވާ ހަތަރު އެސްޓްރޮނޯޓުން، ބިމުން ފެށިގެން އިންސާނުން މިހާތަނަށް ދަތުރުކޮށްފައިވާ އެންމެ ދުރު ރެކޯޑް މުގުރާލައިފިއެވެ.

ހަނދަށް ދަތުރުކުރަމުންދާ މި ކުރޫއިން ވަނީ 1970 ވަނަ އަހަރުގެ އެޕޯލޯ 13 މިޝަންއިން ގާއިމްކޮށްފައިވާ 248,655 މޭލުގެ ރެކޯޑް ފަހަނައަޅައި ގޮސްފައެވެ.

މި ތާރީޚީ މައިލްސްޓޯންއާ ހަމައަށް ކުރޫއިންނަށް ވާސިލްވެވުނީ މިދިޔަ ހޯމަ ދުވަހުއެވެ. މި ދަތުރުގައި އުޅަނދު އެންމެ ދުރަށް ދިޔަ ވަގުތު ބިމާ ދެމެދު ހުރި ދުރުމިނަކީ 252,756 މޭލެވެ. މިއީ ކުރީގެ ރެކޯޑަށްވުރެ ގާތްގަނޑަކަށް 4,100 މޭލު އިތުރު އަދަދެކެވެ.

މި މިޝަންގެ ތެރެއިން އެސްޓްރޮނޯޓުން ވަނީ ހަނދުގެ ބުރަކަށި ފަރާތް ނުވަތަ "ފާ ސައިޑް" ގެ ބައެއް ސަރަހައްދުތައް އަމިއްލަ ލޮލުން ފެނުނު ފުރަތަމަ އިންސާނުންގެ ޝަރަފުވެސް ހޯދާފައެވެ. ހަނދާ އެންމެ ކައިރިވި ވަގުތު އުޅަނދު އޮތީ ހަނދުގެ ސަތަހައާ ގާތްގަނޑަކަށް 4,067 މޭލު ކައިރީގައެވެ. މީގެ އިތުރުން، އޭޕްރީލް 7 ވީ އަންގާރަ ދުވަހު ހަނދު އިރުގެ ކުރިމައްޗަށް އެރުމުގެ ސަބަބުން ކުރިމަތިވި ސޯލާ އެކްލިޕްސް ނުވަތަ އިރުކެނޑުމުގެ މަންޒަރުވެސް ކުރޫއިން ވަނީ ފަޒާގެ ތެރެއިން ތަޖުރިބާކޮށްފައެވެ.

މި ދަތުރުގައި ކުރޫއިން ވަނީ ހަނދުން ފެނުނު ދެ ކްރޭޓަރެއް ނުވަތަ ވަޅުގަނޑަކަށް ނަން ދިނުމަށްވެސް ނިންމާފައެވެ. މީގެ ތެރެއިން އެއް ވަޅުގަނޑަށް ދީފައިވާ ނަމަކީ އުޅަނދަށް ނިސްބަތްކޮށް "އިންޓެގްރިޓީ" އެވެ. އަދި ދެވަނަ ވަޅުގަނޑަށް ނަން ދީފައިވަނީ އެސްޓްރޮނޯޓް ރީޑް ވައިޒްމަންގެ އަނބިކަނބަލުން ކެރޯލްގެ ހަނދާނުގައެވެ.

މިދިޔަ އޭޕްރީލް 1 ވަނަ ދުވަހު ފެށި 10 ދުވަހުގެ މި މިޝަން މިހާރު ވަނީ އެނބުރި ބިމަށް އައުމުގެ ދަތުރު ފަށާފައެވެ. ނާސާއިން ހާމަކުރާ ގޮތުގައި އަންނަ ހުކުރު ދުވަހު (އޭޕްރީލް 10 ގައި) އޮރަޔަން އުޅަނދު ކެލިފޯނިއާގެ އައްސޭރިފަށަށް ޖައްސާނެއެވެ. މި މިޝަންއަކީ ކުރިމަގުގައި ހަނދުގައި ދާއިމީ ބޭހެއް ގާއިމްކުރުމަށް ނާސާއިން ކުރާ މަސައްކަތުގެ މުހިންމު ފިޔަވަޅެކެވެ.