އާސެނަލްގައި ކެރިއަރުގެ ބޮޑުބައި ހޭދަކުރި ވޭލްސްގެ މިޑްފިލްޑަރު އެރޮން ރަމްސީ ފުޓްބޯޅައިން ރިޓަޔަރކޮށްފިއެވެ.

އެރޮން ރަމްސީ ޕްރޮފެޝަނަލް ފުޓްބޯޅައިގެ ތެރެއަށް ނިކުތީ އިނގިރޭސިވިލާތުގެ ކާޑިފްސިޓީގެ ކުޅުންތެރިއެއްގެ ގޮތުގައެވެ. އެ ކްލަބްދޫކޮށް އޭނާ އާސެނަލް އާ ގުޅީފައިވަނީ 2008 ވަނަ އަހަރު އުމުރުން 17 އަހަރުގައެވެ. ރަމްސީ ވަނީ އާސެނަލްގައި 11 އަހަރު ހޭދަކޮށްފައެވެ. އޭނާ ވަނީ އާސެނަލްގެ އިތުރުން ޔުވެންޓަސް، ރޭންޖާސް، ނީސް އަށްވެސް ކުޅެފައެވެ.

ރަމްސީގެ ފުޓްބޯޅަ ކެރިއަރަށް ބަލާއިރު އޭނާ އެންމެ ފާހަގަވެގެން ގޮސްފައިވަނީ، އާސެނަލްގައި ހޭދަކުރި ދުވަސްވަރެވެ. އޭރު ރަމްސީއަކީ އެޓީމްގެ އެންމެ މުހިންމު ކުޅުންތެރިޔާއެވެ. ފުޓްބޯޅަ ކުޅުންތެރިންގެ ތެރެއިން ރަމްސީ ފާހަގަވެފައިވަނީ ތަދާއި ވޭނުގައި އުޅުމަށްފަހު ހިތްވަރާއެކު ދަނޑަށް ނިކުމެ ކާމިޔާބުހޯދި ކުޅުންތެރިއެއްގެ ގޮތުގައެވެ. 

ރަމްސީ އާސެނަލަށް ބަދަލުވި އަހަރު.. ފޮޓޯ: އާސެނަލް

2010 ވަނަ އަހަރު ސްޓޯކް ސިޓީއާ ދެކޮޅަށް ކުޅުނު މެޗެއްގައި ފަޔަށް ލިބުނު އަނިޔާއަކާ ގުޅިގެން ދެ އަހަރަށްވުރެ ގިނަ ދުވަހު ފަރުވާގައި ހުރުމަށްފަހު 2013 ވަނަ އަހަރު ކުޅުމުގެ ތެރެއަށް އެނބުރިއައިސް އެ ސީޒަނުގައި ރަމްސީ ވަނީ އާދަޔާހިލާފް މޮޅު ކުޅުމެއް ދައްކައި އާސެނަލަށް އެފްއޭކަޕް ހޯދައިދީފައެވެ. އާސެނަލް އާއެކު ޕްރިމިއާ ލީގް ނުހޯދުނު ނަމަވެސް އޭނާ ހިމެނިފައިވަނީ އާސެނަލްގެ ތާރީހުގައި އެ ކްލަބް ދުށް އެންމެ މޮޅު މިޑްފީލްޑަރުންގެ ތެރޭގައެވެ. 

ރަމްސީ އާސެނަލަށް ކުޅުނު 262 މެޗްގައި އޭނާ ވަނީ 40 ހަށްވުރެ ގިނަ ގޯލް ޖަހާފައެވެ. އާސެނަލްގައި ހޭދަކުރި ދުވަސްތަކުގައި އޭނާ ވަނީ އެ ކްލަބާއެކު އެފްއޭކަޕް ތިން ފަހަރު، ކޮމިޔުނިޓީ ޝީލްޑް ދެފަހަރެއްގެ މަތިން ހޯދާފައެވެ. ޔުވެންޓަސްގައި ހޭދަކުރި މުއްދަތުގައި އިތަލިއަން ސޭރިއާ، އިޓަލިއަންކަޕް ދެފަހަރެއްގެ މަތިން ވަނީ ހޯދާފައެވެ. 

އާސެނަލްގެ އިތުރުން ރަމްސީއަކީ ވޭލްސްގައި އުފެދުނު އެންމެ މޮޅުކުޅުންތެރިންގެ ތެރޭގައި ހިމެނޭ ކުޅުންތެރިއެކެވެ. އޭނާ ވަނީ ވޭލްސްގެ ޤައުމީޓީމަށް 86 މެޗްކުޅެދީ 21 ލަނޑު ޖަހައިދީފައެވެ. އުމުރުން 35 އަހަރުގައި ފުޓްބޯޅަ ކުޅުން ހުއްޓާލި ރަމްސީ މިހާރު މަސައްކަތްކުރަނީ އޭނާގެ އެންމެ ފުރަތަމަ ކްލަބް ކާޑިފްސިޓީގައެވެ.