އެމެރިކާ އާށއި އީރާނާ ދެމެދު ހަމަލާތައް ބަދަލުކުރުން ހުއްޓާލާފައިވަނިކޮށް އިސްރާއީލަށް ނިސްބަތްވާ ޑްރޯނެއް އީރާނުގެ ސަރަހައްދުގެ ތެރެއަށް ވަތް މައްސަލައެއް ހޫނުވެއްޖެއެވެ.
އަލްޖަޒީރާއިން ބުނެފައިވަނީ، ހަމަލާތައް ބަދަލުކުރުން ހުއްޓާލާފައިވަނިކޮށް އީރާނުގެ ހުޅަނގު ދެކުނު ފާރްސް ޕްރޮވިންސްގެ ލާރް ސިޓީގެ ވައިގެ ސަރަހައްދަށް "ހާމީސް 900" މަރުކާގެ ޑްރޯނެއް ވަތްކަމަށް އެޢޤައުމުން ބުނެފައިވާކަމަށެވެ. އީރާނުން ވަނީ އެ ޑްރޯން ހަލާކުކޮށްލާފައެވެ. މި ޑްރޯނަކީ އިސްރާއީލުން އުފައްދައި އާއްމުކޮށް އެމީހުން ބޭނުންކުރާ ޒާތުގެ ޑްރޯނެކެވެ.
މިކަމާ ގުޅޭގޮތުން އެ ގައުމުގެ އިސްލާމިކް ރިވެލޫޝަނަރީ ގާޑް ކޯޕްސް (އައި.އާރު.ޖީ.ސީ) އިން ބުނީ، އަސްކަރީ އެއްވެސް ހަރަކާތެއް ނުހިންގި ކަމުގައި ވިޔަސް، އިސްރާއީލް އަދި އެމެރިކާގެ އުޅަނދެއް ވަނުމަކީ އެއްބަސްވުމާ ހިލާފްވުންކަމަށެވެ. އަދި އެފަދަ އަމަލަކަށް ވަރުގަދަ ބަދަލަކުން ބަދަލު ހިފާނޭކަމަށް އައިއާރުޖީސީން ވަނީ ބުނެފައެވެ.
އެމެރިކާ އާއި އިސްރާއީލުން އިސްވެ އީރާނަށް ދެމުންދާ ހަމަލާތައް ވަގުތީގޮތުން ހުއްޓާލުމުގެ މަސައްކަތް ފަށާފައިވަނީ އެމެރިކާއިންނެވެ. އޭގެ ކުރިން އެމެރިކާގެ ރައީސް ޓްރަމްޕް އިއްޔެ ވަނީ އީރާނުގެ ޖީލެއް ނައްތާލަން ޖެހުނަސް ހަމަލާތައް ދޭނޭކަމަށް ބުނެފައެވެ. އެގޮތުން ހަމަލާތައް ދޭނޭކަމުގެ ސުންގަޑި ކަނޑައެޅީ ރޭގެ ނިޔަލަށެވެ. ނަމަވެސް ހަމަލާތައް ދޭން ބުނި ގަޑި ކައިރިވިތަނުން ޓްރަމްޕް ވަނީ އީރާނަށް ދިން އިންޒާރު ކެންސަލްކޮށް ސުލްހަވާން ނިންމާފައެވެ.
އީރާނުގެ ސަރަހައްދުން ޑްރޯން ފެނުނު މައްސަލާގައި އެޤައުމުން ކަންތައް ކުރާނޭގޮތެއް އަދި މިހާތަނަށް ހާމަކޮށްފައެއް ނުވެއެވެ.
Advertisement
This content is created and paid for by advertisers and does not involve Voice Journalists
