ޙުރުމަތްތެރިވެގެންވާ މައްސަރުތަކުގައި ފާފަތަކަށް އަރައިގަތުމުގެ ނުބައިކަން މާ ބޮޑުވެގެންވާ ކަމަށް މިއަދުގެ ހުކުރު ޚުޠުބާގައި ބުނެފިއެވެ. 

އިސްލާމީ އުޞޫލުތަކާއި މާތް الله ކަނޑައަޅުއްވާފައިވާ މާތް މައްސަރުތަކަށް އިޙުތިރާމްކުރުމުގެ މުހިންމުކަމުގެ މައްޗަށް އަލިއަޅުވާލައި، "ޙުރުމަތްތެރިވެގެންވާ މައްސަރުތައް" މި މައުޟޫޢަށް މިއަދު ރާއްޖޭގެ އެކިކަންކޮޅުތަކުގައި އިއްވި ޚުތުބާގައި ބުނެފައިވާ ގޮތުގައި، އަހަރުގެ ބާރަ މަހުގެ ތެރެއިން ހަތަރު މަހެއް މާތް الله ވަނީ ޙުރުމަތްތެރި ކުރައްވާފައެވެ. އެއީ ޛުލްޤަޢިދާ، ޛުލްޙިއްޖާ، މުޙައްރަމް އަދި ރަޖަބު މަހެވެ. މި މައްސަރުތަކަކީ އަޅުތަކުން މާތް الله އަށް ކުއްތަންވުމަށާއި، އެކަލާނގެ ޝިޢާރުތައް މަތިވެރިކުރުކމަށް ޚާއްޞަ ކުރައްވާފައިވާ ދުވަސްތަކެއްކަން ޚުތުބާގައި ފާހަގަކުރިއެވެ.

ޚުތުބާގައި ބުނެފައިވަނީ، ކޮންމެ ވަގުތެއްގައިވެސް ފާފަކުރުމަކީ މާތް الله ކޯފާ ޙައްޤުވާނޭ ކަމެއް ނަމަވެސް، ޙުރުމަތްތެރިވެގެންވާ މައްސަރުތަކުގައި ކުރެވޭ ފާފަތަކުގެ ނުބައިކަން މާ ބޮޑުވެގެންވާ ކަމަށެވެ. އެއީ އެފަދަ ޢަމަލަކީ މާތް الله މަތިވެރިކުރައްވާފައިވާ ކަންކަމުގެ ޙުރުމަތް ކަނޑައި، އެކަލާނގެއަށް އުރެދުން ކަމުގައި ވާތީއެވެ. އިބްނު ޢައްބާސް (ރަޟިޔަالله ޢަންހު) ގެ ބަސްފުޅާ ޙަވާލާދީ ޚުތުބާގައި ބުނީ، މި މައްސަރުތަކުގައި ކުރާ ފާފައިގެ ފާފަވެރިކަން ބޮޑުވާ ފަދައިން، ކުރާ ހެޔޮ ޢަމަލުތަކުގެ ދަރުމައާއި ޘަވާބުވެސް އިތުރުވާނެ ކަމަށެވެ.

ޖާހިލިއްޔަ ޒަމާނުގައި މި މައްސަރުތަކަށް އުނި އިތުރު ގެނައި ނަމަވެސް، ރަސޫލާ ﷺ ވަނީ ޙައްޖަތުލްވަދާޢުގައި މި މައްސަރުތަކަކީ ކޮބައިކަން ސާފުކޮށް އުންމަތަށް ބަޔާންކޮށްދެއްވާފައެވެ.

މުއުމިނު އަޅާގެ މައްޗަށް އޮތީ މިފަދަ މަތިވެރި ދުވަސްތަކުގައި އަޅުކަމުގައި ހީވާގިވުން ކަމަށް ޚުތުބާގައި ނަޞޭޙަތްތެރިވިއެވެ. އެގޮތުން ގިނަގިނައިން ޛިކުރުކުރުމާއި، ކީރިތި ޤުރްއާން ކިޔެވުމާއި، ރޯދަހިފުމާއި، ޞަދަޤާތްކުރުމުގެ އިތުރުން ނިކަމެތީންނަށް އެހީތެރިވުން ފަދަ ހެޔޮ ޢަމަލުތައް ގިނަކުރުމަށް ގޮވާލާފައިވެއެވެ. އަދި ހިތްތައް ޠާހިރުކޮށް، ޣީބަބުނުމާއި، ދޮގުހެދުމާއި، މީހުންނަށް އިހާނެތިކޮށް ހިތުން ފަދަ ފާފަތަކުން ދުރުހެލިވުމަށްވެސް ބާރުއަޅާފައިވެއެވެ.

ޚުތުބާ ނިންމާލަމުން ވަނީ، ފާއިތުވެދިޔަ ތަނުގައި އުނިވެފައިވާ ކަންކަން ރަނގަޅުކޮށް، ކުރިއަށް އޮތް ބަރަކާތްތެރި ވަގުތުތަކުގެ ބޭނުން ހެޔޮގޮތުގައި ހިފައި، މާތް الله އަށް ތަޤުވާވެރިވުމަށް އެންމެހައި މުސްލިމުންނަށް އިލްތިމާސްކޮށްފައެވެ. އަދި ދީނަށް އަލަށް ގެންނަ ބިދުޢަތަކުން ދުރުހެލިވެ، ރަސޫލާ ﷺ ގެ ސުންނަތުގައި ސާބިތުވެ ތިބުމަށްވެސް ގޮވާލާފައިވެއެވެ.