އެމްޑީޕީގެ ލީޑާޝިޕްގައި މި ފަހަރު އުފެދުނު ހިޔާލުތަފާތުވުންތައް ހައްލުކޮށް ހުރިހާ ލީޑަރުންނަށް އެކީގައި ކުރިއަށް ދެވޭނެ ގޮތެއް ހޯދާފައިވާ ކަމަަށް އެ ޕާޓީގެ ކުރީގެ ރައީސް އަދި ރާއްޖޭގެ ކުރީގެ ރައީސް އިބްރާހިމް މުހައްމަދު ސޯލިހް ވިދާޅުވެއްޖެ އެވެ.
ސޯލިހް މިހެން ވިދާޅުވީ އެމަނިކުފާނުގެ އުފަން ރަަށް -- ޅ. ހިންނަވަރުގައި އޮތް އެމްޑީޕީގެ ޖަލްސާއެއްގައި ވާހަކަފުޅު ދައްކަވަމުންނެވެ. މި ފަހަރު ހިޔާލުތަފާތުން އުފެދުނީ އެމްޑީޕީއަށް ލިބުުނު ކާމިޔާބީ ފާހަގަ ކުރުމުގެ ޖަލްސާގައި ރައީސް ނަޝީދަށް ވާހަކަ ދައްކަވަން ފުރުސަތު ނެތުމުންނެވެ. އެ ހިޔާލުތަފާތުވުން ބޮޑެވެ ނަޝީދުގެ ފެކްޝަނުން ޖަލްސާ ބޮއިކޮޓް ކުރި އެވެ. ފަހުން ވަނީ ނަޝީދުގެ ވަފާތެރިން ކަމަށް ތުހުމަތުކޮށް ބައެއް ބޭފުޅުން މަގާމުތަކުން ވަކިކުރައްވާފަ އެވެ.
އަދި ނަޝީދު، ކެމްޕެއިނަށް ނިކުންނަވަން ދެކޮޅު ހެެއްދެވި ކަމަށް ވެސް ލީޑާޝިޕުން ތުހުމަތު ކުރެއްވި އެވެ. ނަޝީދުގެ ވަފާތެރީންގެ ނަޒަރުގައި ކާމިޔާބުގެ އަސްލަކީ އެމަނިކުފާނު ކެމްޕެއިނަށް ނިކުންނެވުމެވެ.
މިރޭ އޮތް ޖަލްސާގައި ރައީސް ސޯލިހް ވިދާޅުވީ އެމްޑީޕީ އަކީ ތަފާތު ފިކުރުތަކާއި ހިޔާލުތަކަށް ފުރުސަތު އޮތް ޕާޓީއެއް ކަމަށާ އަބަދުވެސް އެ ފުރުސަތު އޮންނާނެ ކަމަށެވެ.
އަދި ހިޔާލުތަައް އެއްގޮތް ކުރުވާ މެންބަރުން އެދޭ ގޮތަށް އެކިއެކީ ކުރިއަށް ދިއުމަށް ވަރަށް ގިނަ މަސައްކަތްތައް ކުރީން ވެސް ކޮށްފައި ހުންނާނެ ކަމަަށާ އޭގެ ނަތީޖާ ވެސް ފެނިފައިވާ ކަމަަށެވެ.
ސޯލިހް ވިދާޅުވީ މި ފަހަރުވެސް ދިމާވީ އަބަދުވެސް ދިމާވާ ކަހަލަ ހިޔާލުތަފާތުވުންތަކެއް ކަމަށެވެ. ނަމަވެސް މި ފަހަރު ދިމާވި ގޮތުން އާންމު މެންބަރުން ވަރަށް މާޔޫސްކުރުވި ކަމަކަަށް އެކަން ވެގެންދިޔަ ކަމަަށާ އެ ދުވަހުން ފެށިގެން އެކަންކަން ހައްލުކޮށް މެންބަރުން އެދޭފަދަ ގޮތްތަކެއް ހޯދުމަށް ކެނޑިނޭޅި ދިޔައީ މަސައްކަތް ކުރަމުން ކަމަށެވެ.
އެމަނިކުފާނު ވަނީ އާންމު މެންބަރުން އެދޭގޮތަށް ލީޑާޝިޕް އެކީގައި މަސައްކަތް ކުރެވޭނެ ގޮތްތަކެއް ހޯދިއްޖެ ކަމުގައި ވެސް އިއުލާނު ކުރައްވާފަ އެވެ. އަދި ވިދާޅުވީ 2028 ވަނަ އަހަރުގެ ރިޔާސީ އިންތިހާބު ކާމިޔާބު ކުރުމަށްޓަކައި އެމްޑީޕީ ނިކުންނާނީ ލީޑާޝިޕް އެކީގައި އޮވެގެން ކަމަށެވެ.
“މީގެ ދެ ދުވަސްކުރީން މި ޖެހުނު މައްސަލައާ އެކީގައި އަޅުގަނޑުމެން ހުރިހާ ލީޑަރުން، ޕާޓީގައި އިސްކޮށް މި ތިބި މީހުން މިދަނީ މަޝްވަރާކޮށް މިއަަށް ހައްލެއް ހޯދުމުގެ މަސައްކަތް ކުރަމުން. އިރާދަކުރެއްވިއްޔާ މިހާހިސާބަށް އާދެވުނުއިރުގައި އަޅުގަނޑުމެން މިވަނީ މިކަމަށް ހައްލެއް ހޯދާފައި،” ރައީސް ސޯލިހް ވިދާޅުވި އެވެ.
Advertisement
This content is created and paid for by advertisers and does not involve Voice Journalists
