މިއަދު އެންމެ ހޫނު ގަދައީ މާލެ ސަރަަހައްދަށް ކަމަށް މޫސުމާ ބެހޭ ޤައުމީ އިދާރާ، މޯލްޑިވްސް މީޓިއޮލޮޖިކަލް ސެންޓަރުން ބުނެފިއެވެ.
މެޓް އޮފީހުން ނެރެފައިވާ ފިނިހޫނު މިނާއި، އިހްސާސްކުރެވޭ ފިނި ހޫނުމިނުގެ މިއަދުގެ ތަފާސްހިސާބަށް ބަލާއިރު، މާލެ ސަރަހައްދުގެ އިހްސާސް ކުރެވޭ ފިނިހޫނުމިން ހުރީ 38.2 ޑިގްރީ ސެލްސިއަސްގައެވެ. މާލެ ސަރަހައްދުގެ އިތުރުން އިހްސާސްކުރެވޭ ހޫނުމިން ދެން އެންމެ މައްޗަށް ގޮސްފައިވަނީ، ހދ ހަނިމާދޫ އާއި ލ.ކައްދޫއެވެ.
ހދ.ހަނިމާދޫގެ އިހްސާސްކުރެވޭ ހޫނުމިން 36.9 ޑިގްރީގައި ހުރިއިރު ކައްދޫ ސަރަހައްދުގައި އިހްސާސްކުރެވޭ ހޫނުމިން ހުރީ 35.9 ގައެވެ.
މޫސުމާ ބެހޭ އިދާރާއިން ނެރެފައިވާ މިއަދުގެ މޫސުމާ ބެހޭ ރިޕޯޓްގެ ތެރެއިން
މާޗް އަދި އޭޕްރިލްމަހަކީ ރާއްޖެއަށް އެންމެ ހޫނުގަދަވާ ދެ މަހެވެ. މެޓް އޮފީހުން ވަނީ ކުރިއަށްހުރި ދުވަސްތަކަކީވެސް ހޫނު ގަދަވާނެ ދުަވަސްތަކެއްކަން ފާހަގަކޮށްފައެވެ. އެންމެ ހޫނު ގަދަވާނެ ވަގުތަކީ ހެނދުނު 10 އަކުން ފެށިގެން ހަވީރު 4 ޖެހުމާ ހަމަޔަށެވެ.
ގަދަ ހޫނުން ރައްކާތެރިވުމަށް އެޗްޕީއޭއިން ވަނީ އަޅާނެ ބައެއް ފިޔަވަޅުތައް ފާހަގަކޮށްފައެވެ. އެގޮތުން ހޫނު އެންމެ ގަދަވާ ގަޑިތަކުގައި ބޭރަށް ނުނިކުތުމާއި، ބޭރަށް ނިކުންނަ ނަމަ އެކަށީގެންވާ ހެދުމެއް ލުމާއި، ގިނަގިނައިން ދިޔާ އެއްޗެހި ބުއިމަށް ވަނީ ހަނދާންކޮށްދީފައެވެ. މީގެ އިތުރުން ބޮލުގައި ރިއްސައި، ވަރުދެރަވާނަމަ ސިއްހީ މާހިރެއްގެ ލަފާ ހޯދުމަށް ވަނީ ލަފާދީފައެވެ.
Advertisement
This content is created and paid for by advertisers and does not involve Voice Journalists
