އދ. ދިގުރަށުގައި ބިދޭސީން ދިރިއުޅޭ އެކޮމޮޑޭޝަން ބްލޮކެއްގައި ހިނގި ނުރައްކާތެރި އަލިފާނުގެ ހާދިސާއަށް މަހެއްހާ ދުވަސް ވެފައިވާއިރު، އެ މައްސަލަ ކަމާބެހޭ އިދާރާތަކުން ތަހުގީގު ކުރަމުންދާ މިންވަރު ބަލައިދިނުމަށް ރައްޔިތުންގެ މަޖިލީހުގައި މިއަދު އެދިއްޖެއެވެ.

މިކަމަށް އެދިވަޑައިގަތީ ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް (ކުޑޫ)، މަޖިލީހުގެ ރައީސް އަބްދުއްރަހީމް އަބްދުالله އަށް ފޮނުއްވި ސިޓީއެއްގައެވެ.

މިދިޔަ މަހުގެ 12 ވަނަ ދުވަހުގެ ރޭ ދަންވަރު 2:00 ހާއިރު ހިނގި މި ހާދިސާގައި އަށް މީހަކު ފިހިފައިވާއިރު، އޭގެ ތެރެއިން ފަސް މީހަކު ވަނީ މަރުވެފައެވެ. މި ހާދިސާގައި އަނިޔާވި މީހުންގެ ތެރެއިން ދެ މީހަކު އިތުރު ފަރުވާ ދޭން މާލެ ގެނައެވެ. އަދި ތިންވަނަ މީހާއަށް އެ ރަށުގައި ފަރުވާ ދިނުމަށްފަހު ވަނީ ދޫކޮށްލާފައެވެ. މެންބަރު އެދިވަޑައިގެންފައިވަނީ މަޖިލީހުގެ "ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީ" މެދުވެރިކޮށް މިކަމުގެ ތަފްސީލީ މައުލޫމާތު ސާފުކުރުމަށެވެ.

މަޖިލީހަށް ހުށަހެޅި މި މައްސަލައިގައި ބިދޭސީން ދިރިއުޅުނު ތަނުގެ ގާނޫނީ ހާލަތާ ގުޅޭ ގިނަ ކަންތައްތަކެއް ސާފުކުރަން ވަނީ އެދިފައެވެ. އޭގެ ތެރޭގައި އެއީ ގޯތިގެދޮރު ކުއްޔަށް ދިނުމާބެހޭ ގާނޫނާ އެއްގޮތަށް ދީފައިވާ ތަނެއްތޯ އާއި، "އެކްސްޕެޓްރިއޭޓް އެކޮމޮޑޭޝަން" ވިޔަފާރިއެއްގެ ގޮތުގައި ރަޖިސްޓްރީކޮށްފައިވާ ތަނެއްތޯ ބެލުން ހިމެނެއެވެ. އަދި ނިޔާވި މީހުންގެ ވޯކްޕާމިޓްގެ ސައްހަކަމާއި، އެމީހުން މަސައްކަތްކުރި ފަރާތްތަކުން އެކޮމޮޑޭޝަންގެ މިންގަނޑުތަކަށް ސަމާލުކަން ދީފައިވޭތޯ ސާފުކުރުމަށް ވެސް ވަނީ އެދިފައެވެ.

މީގެ އިތުރުން، މިނިސްޓްރީ އޮފް ހޯމްލޭންޑް ސެކިއުރިޓީ އިން މިފަދަ ތަންތަން ބެލުމުގައި ގެންގުޅޭ އުސޫލުތަކާއި، ނުރައްކާތެރި ހާދިސާއެއް ހިނގާފާނެ ފަދަ ތަންތަން ފާހަގަކުރުމަށް ކޮށްފައިވާ މަސައްކަތްތަކުގެ މައުލޫމާތު ހޯދުމަށްވެސް ސިޓީގައި އެދިފައިވެއެވެ. އަދި ފުލުހުންގެ ތަހުގީގުން ހާދިސާ ހިނގަން މެދުވެރިވި ސަބަބު ދެނެގަނެވިފައިވޭތޯ އާއި، އެއްވެސް ފަރާތެއްގެ އިހުމާލެއް އޮތްނަމަ އެޅި ފިޔަވަޅުތައް ސާފުކުރުމަކީވެސް މެންބަރު ބޭނުންފުޅުވާ މައުލޫމާތެކެވެ. ރަށު ކައުންސިލުން އެ އިމާރާތުގައި މީހުން އުޅުމުގެ ހުއްދަ ދީފައިވާ ގޮތާއި، އެއީ ނުރައްކާތެރި ތަނެއްގެ ގޮތުގައި ކުރިން ފާހަގަވެފައިވޭތޯ ބެލުމަށްވެސް ވަނީ ހުށަހަޅާފައެވެ.

ގާތްގަނޑަކަށް 30 އެއްހާ ބިދޭސީން އުޅުނު އެ އިމާރާތުގައި އަލިފާން ރޯވީ ގޭސް ލީކުވުމުގެ ސަބަބުންނެވެ. ނަމަވެސް، މިހާތަނަށް ސަރުކާރުގެ ރަސްމީ އިދާރާއަކުން އެކަން ކަށަވަރުކޮށްދީފައެއް ނުވެއެވެ. ރަށުން ވާހަކަދެއްކި މީހުން ބުނާ ގޮތުގައި ހާދިސާ ހިނގީ ދަންވަރު ދެ މީހަކު ކައްކަން އުޅެނިކޮށެވެ. ސޯޝަލް މީޑިއާގައި އާންމުވި ވީޑިއޯތަކުން ފެންނަ ގޮތުގައި، އަލިފާންގަނޑު ކޮންޓްރޯލް ނުވެގެން މީހުން ސަލާމަތް ކުރަން ޖެހުނީ ގޭގެ ފަހަތު ފާރު ތަޅާލައިގެންނެވެ.