އީފާސް މެދުވެރިކޮށް ބޭހަށް އޯޑަރުކުރެވޭނެ އިންތިޒާމު ސްޓޭޓްފާމާއިން ހަމަޖައްސައިފި
އީފާސް ބޭނުންކޮށްގެން ރައްޔިތުންނަށް ފަސޭހަކަމާއެކު ބޭހަށް އޯޑަރު ކުރެވޭނެ އިންތިޒާމު ސްޓޭޓްފާމާގެ ޕޯޓަލް މެދުވެރިކޮށް ހަމަޖައްސައިފިއެވެ.
އެމްއެމްޓީވީގެ "އަދާހަމަ" ޕްރޮގްރާމަށް ދެއްވި އިންޓަވިއުއެއްގައި އެ ކުންފުނީގެ މެނޭޖިންގ ޑިރެކްޓަރ ޑރ.ޝާހް ވިދާޅުވި ގޮތުގައި، މި ޕްލެޓްފޯމް މެދުވެރިކޮށް ބޭސް ސިޓީ އަޕްލޯޑް ކުރުމާއި ބޭހަށް އޯޑަރު ދިނުމުގެ މަސައްކަތް ކުރެވޭނެއެވެ. މީގެ އިތުރުން، އޯޑަރު ޑެލިވަރީގެ ކަންކަން ކުރިއަށްދާ ގޮތްވެސް ހަމަ އެ ތަނަކުން ބަލައިލުމުގެ ފުރުސަތު އާންމުންނަށް ލިބިގެންދާނެއެވެ.
ބޭސް ފޯރުކޮށްދިނުމުގެ ޚިދުމަތް އިތުރަށް ފުޅާކުރުމުގެ ގޮތުން ސްޓޭޓްފާމާއިން ވަނީ 24 ގަޑިއިރު ޚިދުމަތްދޭ ހޮޓްލައިން ނަންބަރެއް ކަމަށްވާ 1505 ވެސް ތައާރަފްކޮށްފައެވެ. މި ހޮޓްލައިންގެ މައިގަނޑު ބޭނުމަކީ މުހިއްމު ބޭސްތައް ހޯދުމުގައި ރައްޔިތުންނަށް ބޭނުންވާ އަވަސް އެހީތެރިކަން ފޯރުކޮށްދިނުން ކަމަށް އެ ކުންފުނިން ބުނެއެވެ.
ސްޓޭޓްފާމާގެ އަމާޒަކީ ރާއްޖޭގެ ހުރިހާ ހިސާބަކަށްވެސް ބޭސް ލިބުމުގެ ކަންކަން ދެމެހެއްޓެނިވި ގޮތެއްގައި ހަރުދަނާކުރުމެވެ. މި މައްސަލައަށް ވަގުތީ ހައްލެއް ހޯދުމުގެ ބަދަލުގައި، ބޭސް ލިބުމުގައި ހުރި ދަތިތައް ނައްތާލުމަށްޓަކައި ޒަމާނީ އަދި ހަރުދަނާ ނިޒާމެއް ބިނާކުރުމުގެ މަސައްކަތް އެ ކުންފުނިން އަންނަނީ ކުރަމުންނެވެ.
ސްޓޭޓްފާމާ އަކީ ރާއްޖޭގެ ބޭހުގެ ނިޒާމަށް ދިމާވެފައިވާ ގޮންޖެހުންތަކަށް ހައްލު ހޯދުމަށްޓަކައި ރައީސުލްޖުމްހޫރިއްޔާގެ ގަރާރަކުން އުފައްދާފައިވާ ސަރުކާރުގެ ކުންފުންޏެކެވެ. މި ކުންފުނީގެ އެންމެ ބޮޑު މަޤްޞަދަކީ މުޅި ރާއްޖޭގައި ބޭސް ލިބުމުގެ އިންތިޒާމުތައް އިތުރަށް ފަސޭހަކޮށްދިނުމެވެ.
Advertisement
This content is created and paid for by advertisers and does not involve Voice Journalists
