ކ. ހުރާ ގެއެއްގައި ރޭ ހިނގި އަލިފާނުގެ ހާދިސާ ފުލުހުން ތަހުގީގުކުރަންފަށައިފިއެވެ.

ފުލުހުން ބުނީ، މި ހާދިސާ ހިނގައިގެން އުޅޭކަމުގެ މައުލޫމާތު ލިބުނީ ރޭ ދަންވަރު 01:18 އެހައިކަންހާއިރު ކަމަށެވެ. 

އަދި ފުލުހުންނާއި އާންމު ރައްޔިތުން ގުޅިގެން ކުރި މަސައްކަތުން އަލިފާންގަނޑު އެއްކޮށް ނިއްވާލެވުނު ކަމަށެވެ.

ފުލުހުން އިތުރަށް ބުނީ، ހާދިސާގެ ސަބަބުން ނަފްސާނީގޮތުން އަސަރުކުރި ދިވެހި އަންހެނަކަށް ކ. ހުރާ ހެލްތު ސެންޓަރުގައި ފަރުވާދިނުމަށްފަހު، އިތުރު ފަރުވާއަށް މިހާރު މާލެ ގެނެވިފައިވާ ކަމަށެވެ.

އަދި މި ހާދިސާގައި އެ ގޭގެ އިމާރާތަށާއި މުދަލަށް އެކިވަރުގެ ގެއްލުންތައް ލިބިފައިވާ ކަމަށްވެސް ބުންޏެވެ.

މި މައްސަލަ ފުލުހުން ގެންދަނީ ތަހުގީގު ކުރަމުންނެވެ.

މި ހާދިސާއާގުޅިގެން ހުރާ ކައުންސިލުގެ ރައީސް ޢީސާ އަހުމަދު ”ވޮއިސް“ އަށް މައުލޫމާތު ދެއްވި ގޮތުގައި އަލިފާން ރޯވެފައިވަނީ ރޭ ގާތްގަނޑަކަށް 12:30 ކަންހާއިރުއެވެ. އަދި އަލިފާން ނިއްވައިލެވުނީ 2 ޖަހާ ދިޔަފަހުންނެވެ. 

ފުރަތަމަ އަލިފާން ރޯވީ މަންމަ އަކާއި އޭނާގެ ދެ ދަރިން ނިދާފައި އޮތް ކޮޓަރީގައެވެ. އަދި އެ ކޮޓަރީގައި ރޯވި ސަބަބު އަދި ޔަގީން ނުވި ނަމަވެސް، ބޮޑަށް ބެލެވެނީ ޗާޖަށް ޖަހާފައި އޮތް ފޯނު ހޫނުވެ ދިމާވި ކަމަކުން ކަމަށް ވިދާޅުވިއެވެ. 

”ބެލެވެނީ ޗާޖަށް ޖަހާފައި އޮތް ފޯނު ގޮވައިގެން ދިމާވި ކަމެއް ކަމަށް. ރޯވި އިރު އެ ކޮޓަރީގައި ތިބީ މަންމަ އާއި އޭނާގެ ދެ ދަރިން. މާތް اللهގެ އިރާދަފުޅުން ކުދިންނަށް އަނިޔާއެއް ނުވެ ސަލާމަތް ކުރެވުނު. ކުދިންގެ މަންމަގެ އަތުގެ އިނގިލިތައް ފިހުނު. ޖިސްމާނީ އަނިޔާއެއް ނުލިބުނު ނަމަވެސް ނަފްސާނީ ގޮތުން ވަރަށް އަސަރު ކޮށްފައި ހުރީ މަންމައަށް. ވާހަކައެއްވެސް ނުދައްކާ އަދިވެސް. ހުއްޓިފަ ހުންނަނީ. އެހެންވެ މާލެއަށް ފޮނުވާލާފައި ވަނީ މިހާރު..“ ހުރާ ކައުންސިލުގެ ރައީސް ވިދާޅުވިއެވެ.

ރޭގެ ވަގުތެއްގައި ހިނގި މި އަލިފާނުގެ ހާދިސާގައި އެ ކޮޓަރީގައި ހުރި ހުރިހާ ތަކެތި ވަނީ ބޭނުން ނުކުރެވޭ ވަރަށް އަނދާފައެވެ. އަދި މުޅި އެ ގެވެސް އަނދާފައިވާ ކަމަށް އެންޑީއެމްއޭއިން ބުނެއެވެ.

އަދި، މި އަލިފާނުގެ ސަބަބުން އެގޭގައި ދިރިއުޅުނު 15 ފަރާތަކަށް އިންސާނީ އެހީތެރިކަން ފޯރުކޮށްދިނުމުގެ މަސައްކަތް އެ އޮތޯރިޓީން ކައުންސިލާ ގުޅިގެން ކުރަމުންދާ ކަމަށްވެސް އެ އޮތޯރިޓީން ބުނެފައިވެއެވެ.