ނިމިގެންދިޔަ އިންތިހާބުގައި ދާއިމީ ނަތީޖާ އިއުލާންކުރުން ލަސްވާ މައްސަލާގައި އެމްޑީޕީ ގެ ކުރީގެ ޗެއާޕާސަން ފައްޔާޒު އިސްމާއިލް، ކަންބޮޑުވުން ފާޅުކުރައްވައިފިއެވެ.
އެކްސްގައި ކުރެއްވި ޕޯސްޓެއްގައި ފައްޔާޒް ވިދާޅުވީ، ކައުންސިލް އިންތިހާބުގައި މާލޭގެ ދާއިރާތަކަށް ބެހެއްޓި ވޯޓު ފޮށިތަކުގެ ދާއިމީ ނަތީޖާ އިއުލާން ކުރުން ލަސްވަމުންދާ ދިއުމަކީ ބޮޑު ކަންބޮޑުވުމެއް ކަމަށެވެ. މާލޭގެ ދާއިރާތަކުގެ ނަތީޖާ އާންމުކުރުމުގައި މިހާރު ހުރި ލަސްތަކަށް އޭނާ ވަނީ އަލިއަޅުއްވާލައްވާފައެވެ.
އިންތިހާބުގެ ދާއިމީ ނަތީޖާ އިއުލާނުކުރުން ލަސްވާކަން ފާހަގަކުރަމުން ފައްޔާޒު ވަނީ އިލެކްޝަންސް ކޮމިޝަަނުން ވީހާވެސް އަވަހަށް ވޯޓު ފޮށިތަކުގެ ދާއިމީ ނަތީޖާ އިއުލާން ކުރުމަށް ގޮވާލައްވާފައެވެ.
ނަތީޖާ އިއުލާންކުރުން ލަސްވުމުގެ ސަބަބުން ކުރިމަތިވެދާނެ ނުރަނގަޅު ކަންތައްތަކަށްވެސް ފައްޔާޒު ވަނީ އިޝާރާތް ކުރައްވާފައެވެ. އެގޮތުން ނަތީޖާ އިއުލާން ކުރުން ލަސްނުކޮށް ނަތީޖާއަށް ނުފޫޒު ފޯރުމަށް ފުރުސަތު ނުދިނުމަށްވެސް ވަނީ ގޮވާލައްވާފައެވެ.
މިމަހުގެ ހަތަރުވަނަ ދުވަހު ބޭއްވި އިންތިހާބުތަކުގައި ސިޓީތަކުގެ ގޮނޑިތައް އެމްޑީޕީން ކާމިޔާބުކުރިއިރު އެޕާޓީން ވަނީ ކައުންސިލްތަކުގެވެސް ގިނަ ގޮނޑިތަކެއް ނަގާފައެވެ. މީގެ އިތުރުން ރިފަރަންޑަމް ވޯޓުގެ ނަތީޖާވެސް ނިކުމެފައިވަނީ އެމްޑީޕީން ވަކާލާތުކުރި ކޮޅަށެވެ. ސަރުކާރުން ހުށަހެޅީ ރައްޔިތުންގެ މަޖިލީހުގެ އިންތިހާބާއި، ރިޔާސީ އިންތިހާބު އެއްދުވަހެއްގައި ބޭއްވުމަށެވެ. ނަމަވެސް އެމްޑީޕީން އެކަމަށް ވަނީ ނޫނެކޭ ބުނެފައެވެ.
Advertisement
This content is created and paid for by advertisers and does not involve Voice Journalists
