މީހަކު މަރާލަން ހަމަލާދިން ކަމުގެ ކުށް ސާބިތުވެ 10 އަހަރުގެ ޖަލު ހުކުމެއް ތަންފީޒު ކުރަމުންދިޔަ އިސްމާއިލް އާސިފް މިނިވަންވެފައިވަނީ، ނިމިދިޔަ ރިޔާސީ އިންތިޚާބުގެ ކެމްޕެއިން ދުވަސްވަރު އޭރުގެ ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު އޭނާއަށް މައާފްދެއްވުމުންކަން ހާމަވެއްޖެއެވެ.

އާސިފްގެ މައްޗަށް މި ހުކުމް އިއްވާފައިވަނީ 2022 ވަނަ އަހަރުގެ ސެޕްޓެމްބަރު މަހު ކްރިމިނަލް ކޯޓުންނެވެ.

މި މައްސަލައަކީ 2019 ވަނަ އަހަރު އއ. މާޅޮހު ކައިރީގައި އޮތް 'ޖަރީ' ނަމަކަށް ކިޔާ ދޯންޏެއްގެ ތެރޭގައި ހިނގި ދީނީ ދެބަސްވުމަކާ ގުޅިގެން، އިސްމާއިލް ހައްމާދު ނަމަކަށް ކިޔާ މީހަކު މަރާލަން އާސިފް ހަމަލާދިން މައްސަލައެކެވެ. އެ ހާދިސާގައި އާސިފް ވަނީ ހައްމާދުގެ ހަށިގަނޑުގެ އެކި ތަންތަނަށް ވަޅިން ހަމަލާދީ ބޮޑެތި ޒަހަމްތަކެއް ދިނުމަށްފަހު އޭނާ މޫދަށް އެއްލާލާފައެވެ.

މިހާތަނަށް ވޮއިސްއަށް މައުލުމާތު ލިބުނު ގޮތުގައި އާސިފަށް ރައީސް ސާލިހު ލުއި ދެއްވާފައިވަނީ 2023 ވަނަ އަހަރުގެ ސެޕްޓެމްބަރު 19 ވަނަ ދުވަހުއެވެ. އެއީ ރިޔާސީ އިންތިޚާބުގެ ދެވަނަ ބުރުގެ ވޯޓުލުން ބޭއްވުމާ ދާދި ގާތްވެފައި ވަނިކޮށެވެ. ރައީސްގެ އެ ނިންމުމާއެކު އޭނާގެ ހުކުމުގެ މުއްދަތު ފަސް ދުވަހަށް ކުރުކޮށްދެއްވައި، 25 ސެޕްޓެމްބަރު 2023 ގައި އޭނާ ވަނީ މިނިވަންކޮށްފައެވެ.

ޖަލުން މިނިވަންވުމަށްފަހު ވެސް އާސިފްގެ ފަރާތުން ނުރައްކާތެރި އަމަލުތައް ފެނިފައިވާކަން ފާހަގަކުރެވެއެވެ. އެގޮތުން، މިދިޔަ އަހަރުގެ ތެރޭގައި އޭނާގެ އަމިއްލަ ބޭބެގެ ބޮލަށް ކަތިވަޅިއަކުން ހަމަލާދިން މައްސަލައެއްގައި އާސިފް ވަނީ ހައްޔަރުކޮށްފައެވެ. މީގެ އިތުރުން، މާލޭގެ ގެއަކުން ހަތަރު މިލިއަން ރުފިޔާ ވަގަށް ނެގި މައްސަލައިގައި ވެސް 36 އަހަރުގެ އާސިފް މިހާރު ހުރީ ފުލުހުންގެ ބަންދުގައެވެ.

ރައީސް ސާލިހުގެ ދައުރު ނިމެން ކައިރިވެފައި ވަނިކޮށް، އާސިފްގެ އިތުރުން ދައުލަތަށް ބޮޑެތި ޚިޔާނާތްތައް ފަޅާއެރުމުން ހުކުމް ތަންފީޒު ކުރަމުންދިޔަ ކުރީގެ ނައިބު ރައީސް އަހުމަދު އަދީބާއި، އެމްއެމްޕީއާރުސީގެ ކުރީގެ މެނޭޖިން ޑިރެކްޓަރު އަބްދުﷲ ޒިޔަތަށް ވެސް ރައީސް ސާލިހު ވަނީ މައާފްދެއްވައި މިނިވަން ކުރައްވާފައެވެ.