ރާއްޖެއަށް ޕެޓްރޯލް ޝިޕްމަންޓް އަންނާނީ 20 އޭޕްރީލް، 8 މޭ، 26 މޭ އަދި 14 ޖޫން ގައި ކަމަށް މިނިސްޓަރ އޮފް އިކޮނޮމިކް ޑެވަލޮޕްމަންޓް އެންޑް ޓްރޭޑް، ސަޢީދު ވިދާޅުވެއްޖެއެވެ.
މިނިސްޓަރ މިހެން ވިދާޅުވެފައިވަނީ، މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުންނެވެ.
އަޅުގަނޑުމެންނަށް އެސް.ޓީ.އޯ އިން ދެއްވާ މައުލޫމާތުގައި، 20 އޭޕްރީލް، 8 މޭ، 26 މޭ، 14 ޖޫން، އެއީ ޕެޓްރޯލް ޝިޕްމަންޓްތައް އަންނާނެ ތާރީޚު. ޑީސެލް އަށް ބަލާއިރުގައި 17 އޭޕްރިލް، 30 އޭޕްރިލް، 7 މޭ، 15 މޭގައި ޝިޕްމަންޓް އަންނާނެ.
މިނިސްޓަރ ވިދާޅުވިއެވެ.
މެދުއިރުމަތީގައި ހިނގަމުންދާ ހަނގުރާމައާއި ގުޅިގެން ދިވެހި ސަރުކާރުން ދަނީ ރައްޔިތުންނަށް ދަތިނުވާނެހެން ގިނަ މަސައްކަތެއް ކުރަމުންނެވެ. އެގޮތުން، ރާއްޖެއަށް އަންނަ ތެޔޮ އަދި ޑީސެލްގެ ޝިޕްމަންޓްތަކަށް މެދުކެނޑުމެއް ނާންނާނެކަމުގެ ޔަގީންކަން މިނިސްޓްރީން ދަނީ ރައްޔިތުންނަށް ދެމުންނެވެ.
ނަމަވެސް، ހަނގުރާމައިގެ ސަބަބުން ރާއްޖޭގެ އެކި ކަންކޮޅުތަކުގައި ތެލާއި ޑީސެލްގެ އަގު ދަނީ އުފުލެމުންނެވެ. މީގެ އިތުރުން، މާލެއިން ތެލާއި ޑީސެލް ލިބޭ އަގާއި ރާއްޖެތެރެ ރަށްތަކުން ތެލާއި ޑީސެލް ލިބޭ އަގުގައި ވަރަށް ބޮޑު ފަރަގެއް ހުންނަކަން ފާހަގަކުރެވެއެވެ.
ރައީސް ޑރ.މުޙައްމަދު މުޢިއްޒު މެދުއިރުމަތީގައި ހިނގަމުންދާ ހަނގުރާމައާއި ގުޅޭގޮތުން އުފެއްދެވި ވަޒީރުންގެ ހާއްސަ ކޮމިޓީން ބޭއްވި ނޫސްވެރިންގެ ބައްދަލުވުމެއްގައި ނޫސްވެރިޔަކު ސުވާލު ކުރެއްވުމުން، ކޮމިޓީން ވިދާޅުވީ މި ފަރަގު ހުންނަނީ އަމިއްލަ ފަރާތްތަކުން ހިންގާ ޕެޓްރޯލް އަދި ޑީސެލް އަޅާ ތަންތަނުގައެވެ. އަދި އެސް.ޓީ.އޯ އިން ވިއްކާ ތެލާއި ޑީސެލްގެ އަގު ރާއްޖޭގެ ހުރިހާ ކަންކޮޅެއްގައިވެސް އެއް އަގެއްގައި ވިއްކަމުންދާނެ ކަމުގެ ޔަގީންކަން ކޮމިޓީން ވަނީ ރައްޔިތުންނަށް ދެއްވާފައެވެ.
އެމެރިކާ-އިސްރާއިލް އަދި އީރާނުން މިހާރު 2 ހަފުތާގެ މުއްދަތަކަށް ހަނގުރާމަ ހުއްޓާލުމަށް އެއްބަސްވި ނަމަވެސް، އެމެރިކާއިން މިހާރު ވަނީ ހޯރްމޫޒް ކަނޑުއޮޅީގައި "ނޭވަލް ބްލޮކޭޑް" ގާއިމުކޮށްފައެވެ. މިކަމުގެ ސަބަބުން އަނެއްކާވެސް ހޯރްމޫޒް ކަނޑުއޮޅިން ދަތުރު ކުރުން ވަނީ ދަތިވެފައެވެ.
ރާއްޖެއިން ތެލާއި ޑީސެލް އޮމާނުން އެތެރެކުރުމުގެ ސަބަބުން ޝިޕްމަންޓްއަށް އެހާ ބޮޑު އަސަރެއް ނުކުރުރި ނަމަވެސް، ދުނިޔޭގެ ބާޒާރުގައި ތެލުގެ އަގު އުފުލުމުގެ ސީދާ އަސަރު ރާއްޖެއަށް ދަނީ ކުރަމުންނެވެ.
Advertisement
This content is created and paid for by advertisers and does not involve Voice Journalists
