އެމެރިކާއިން ހޮރްމޫޒް ކަނޑުއޮޅިއަށް އަތްގަދަކުރަމުން ދަނިކޮށް ރަޝިޔާގެ ޚާރިޖީ ވަޒީރު ސެރްގެއި ލެވްރޯފް ބެއިޖިންގަށް ވަޑައިގެންފިއެވެ.

މީޑިއާގެ ރިޕޯޓްތައް ބުނާގޮތުން ލެވްރޯފް މިއަދު ބެއިޖިންއަށް ވަޑައިގަތުމުން ޗައިނާއިން ވަނީ އޭނާއަށް ވަނީ ހޫނު މަރުހަބާއެއް ކިޔާފައެވެ. ލެވްރޯފް ޗައިނާއަށް މިއަދު ވަޑައިގެންނެވިއިރު، އޭނާ ވަނީ ހޯމަ ދުވަހު އީރާނުގެ ޚާރިޖީ ވަޒީރު ޢައްބާސް ޢަރަޣްޗީއާ ފޯނުން މަޝްވަރާ ކުރައްވާފައެވެ.

މި ފޯނުކޯލާ ގުޅޭގޮތުން ރަޝިޔާގެ ޚާރިޖީ ވުޒާރާއިން ނެރުނު ބަޔާނެއްގައި ބުނީ، ހަތިޔާރު އެޅި ކުރިމަތިލުމެއް އަލުން ތަކުރާރުވިޔަ ނުދިނުމުގެ މުހިންމުކަން ލެވްރޯފް ފާހަގަކުރެއްވި ކަމަށެވެ. އަދި މި މައްސަލައަށް އަސްކަރީ ހައްލެއް ނެތް ކަމަށާއި ހައްލު ހޯދުމަށް ރަޝިޔާ އެހީތެރިވާން ތައްޔާރަށް އޮތް ކަމަށް ބަޔާނުގައި ބުންޏެވެ. ޢަރަޣްޗީ ވަނީ އެއްވެސް ކުރިއެރުމެއް ނުލިބުނު ޕާކިސްތާނުގައި ބޭއްވި އެމެރިކާ-އީރާން މަޝްވަރާތަކުގެ ތަފްސީލް ލެވްރޯފަށް ހިއްސާކުރައްވާފައެވެ.

އީރާނުގެ ބޮޑު ވިޔަފާރި ބައިވެރިއެއް ކަމަށްވާ ޗައިނާއަށް ވެސް މި ހަނގުރާމައިގެ ސަބަބުން އުފެދިފައިވާ ހަކަތައިގެ ކާރިސާގެ އިޤުތިޞާދީ އަސަރު ދަނީ ކުރަމުންނެވެ. އީރާނުގެ ބަނދަރުތަކަށް ވަންނަ އަދި ނުކުންނަ އުޅަނދުފަހަރު ބަންދުކުރުމަށް އެމެރިކާއިން ފެށި ސްކީމް ޗައިނާއިން ވަނީ ހަރުކަށިކޮށް ކުށްވެރިކޮށްފައެވެ.

"ހޮރްމޫޒް ކަނޑުއޮޅިއަކީ މުދަލާއި ހަކަތައިގެ މުހިންމު ބައިނަލްއަޤުވާމީ ވިޔަފާރި މަގެއް. އެ މަގުގެ ސަލާމަތާއި ހަމަޖެހުން ދެމެހެއްޓުމަކީ ބައިނަލްއަޤުވާމީ މުޖުތަމަޢުގެ މަޞްލަޙަތާ ގުޅިފައިވާ ކަމެއް" ކަމަށް ޗައިނާގެ ޚާރިޖީ ވުޒާރާގެ ތަރުޖަމާނު ގުއޯ ޖިއާކުން ހޯމަ ދުވަހު ވިދާޅުވިއެވެ.