އީރާނުން ސައުދީ އަރަބިއްޔާގެ ހަކަތައިގެ މަރުކަޒުތަކަށް ދިން ނުރައްކާތެރި ހަމަލާތަކާ ގުޅިގެން މެދުކެނޑުނު މަސައްކަތްތައް އަލުން ފަށައި، ދުނިޔޭގެ ބާޒާރަށް މެދުކެނޑުމެއްނެތި ހަކަތަ ފޯރުކޮށްދޭނެކަމުގެ ޔަގީންކަން ސައުދީ އަރަބިއްޔާއިން ދީފިއެވެ.

މިދިޔަ އަންގާރަ ދުވަހު ޖިއްދާގައި ބޭއްވުނު ސައުދީ ވަޒީރުންގެ މަޖިލީހުގެ ބައްދަލުވުމުގައި ރިޔާސަތު ބެލެހެއްޓެވީ ވަލީއަހުދު އަދި ބޮޑުވަޒީރު މުޙައްމަދު ބިން ސަލްމާނެވެ.

މި ބައްދަލުވުމަށްފަހު މީޑިއާ މިނިސްޓަރު ސަލްމާން އަލް-ދޯސަރީ ވިދާޅުވީ، ހަމަލާތަކުގެ ސަބަބުން ގެއްލުންލިބުނު މަރުކަޒުތަކުގެ އުފެއްދުންތެރިކަން އަލުން އިއާދަކުރުމުގައި ޓެކްނިކަލް ޓީމުތަކުން ހޯދި ކާމިޔާބީއަށް ކެބިނެޓުން ތައުރީފުކޮށްފައިވާ ކަމަށެވެ. އަދި މި އަވަސް ރިކަވަރީއަކީ ސައުދީގެ ހަކަތައިގެ ދާއިރާގެ ވަރުގަދަކަމާއި، ކާރިސާތައް މެނޭޖުކުރުމުގެ ގާބިލުކަން ހުރި މިންވަރު ހާމަކޮށްދޭ ކަމެއް ކަމަށް އޭނާ ވިދާޅުވިއެވެ.

ވަޒީރުންގެ މަޖިލީހުން ވަނީ ގައުމުގެ ސިޔާދަތަށް އަރައިގަތުމަށް ކުރާ ކޮންމެ މަސައްކަތެއް ހަރުކަށި އިބާރާތުން ކުށްވެރިކޮށްފައެވެ. ވަކިން ހާއްސަކޮށް އިރާގުގެ ސަރަހައްދުތައް ބޭނުންކޮށްގެން ޑްރޯން ހަމަލާތައް ދިނުން ކުށްވެރިކޮށް، އެފަދަ ނުރައްކާތަކާ ދެކޮޅަށް އިރާގު ސަރުކާރުން ޒިންމާދާރު ފިޔަވަޅުތައް އެޅުމަށް ވަނީ ގޮވާލާފައެވެ.

މީގެ އިތުރުން، އިއްޔެގެ ބައްދަލުވުމުގައި ހައްޖު މޫސުމާ ދިމާކޮށް ގެންނަ ޖަނަވާރުންގެ ޓެކުހާއި ކަސްޓަމްސް ޑިއުޓީ ސަރުކާރުން ބަލައިގަންނަ ގޮތަށް ވަނީ ހަމަޖައްސާފައެވެ. އަދި ލަގްޒެމްބާގް، ޓެންޒޭނިއާ، ޗައިނާ، ހޮންކޮންގް އަދި ގަތަރާއެކު އެކި ދާއިރާތަކުން ގުޅުން ބަދަލުކުރުމުގެ އެއްބަސްވުންތަކެއްގައި ވަނީ ސޮއިކޮށްފައެވެ. ސައުދީ ޕޯސްޓާއި އެމެރިކާގެ ޕޯސްޓަލް ސާވިސްއާ ދެމެދު ކަސްޓަމްސް ޑޭޓާ އިލެކްޓްރޯނިކްކޮށް ބަދަލުކުރުމުގެ އެއްބަސްވުމެއްވެސް ވަނީ ފާސްކޮށްފައެވެ.