އެމެރިކާގެ ނިއުކްލިއާ ހަތިޔާރާއި ގުޅޭ ސިއްރު ދިރާސާތަކުގައި މަސައްކަތްކުރާ އިތުރު މީހަކު އެއްވެސް ނިޝާނެއް ނެތި ގެއްލިއްޖެ ކަމަށް ރިޕޯޓުތައް ބުނެފިއެވެ.

"ޑެއިލީ މެއިލް" އިން ރިޕޯޓުކޮށްފައިވާ ގޮތުގައި، މިއީ އެމެރިކާގެ ނިއުކްލިއާ އަދި ޖައްވީ ސިއްރުތަކާ ގުޅުންހުރި މީހުންގެ ތެރެއިން މިފަހަކަށް އައިސް ކުއްލި ގޮތަކަށް ގެއްލުނު ނުވަތަ މަރުވި 10 ވަނަ މީހާއެވެ.

މިފަހަރު ގެއްލިފައިވަނީ ނިއު މެކްސިކޯގެ އަލްބަކާކީގައި ހުންނަ ކެންސަސް ސިޓީ ނޭޝަނަލް ސެކިއުރިޓީ ކެމްޕަސް ގައި ސަރުކާރުގެ ކޮންޓްރެކްޓަރެއްގެ ގޮތުގައި މަސައްކަތްކުރި އުމުރުން 48 އަހަރުގެ ސްޓީވަަން ގާސިއާއެވެ. އޭނާ އެންމެ ފަހުން ފެނިފައިވަނީ އޮގަސްޓް 28، 2025 ގައި އޭނާގެ ގެއިން އަތުބަޑިއެއް ހިފައިގެން ނުކުމެގެން ދަނިކޮށެވެ. ގާސިއާއަކީ އެމެރިކާގެ އަސްކަރިއްޔާއިން ބޭނުންކުރާ ނިއުކްލިއާ ހަތިޔާރުތަކުގެ ގިނަ އަދަދެއްގެ ސާމާނުތައް ބަލަހައްޓާ މަރުކަޒެއްގައި އިސް މަގާމެއް ފުރަަމުންދިޔަ މީހެކެވެ.

މި މަރުކަޒަކީ ނިއުކްލިއާ ހަތިޔާރުތަކަށް ބޭނުންވާ ނޮން-ނިއުކްލިއާ ކޮމްޕޯނަންޓްތަކުގެ 80 އިންސައްތަ އުފައްދާ ތަނެވެ. ގާސިއާގެ އާއިލާއާއި ގާތް ފަރާތްތަކުން ބުނާ ގޮތުގައި އޭނާއަކީ ނަފްސާނީ ގޮތުން ދުޅަހެޔޮ މީހެކެވެ. ނަމަވެސް އޭނާ ގެއްލުނު ފަހުން އޭނާގެ މަސައްކަތުގެ ކޮމްޕިއުޓަރުތަކާއި އީމެއިލްތައް ބެލި ބެލުމުން އެއްވެސް އިޝާރާތެއް ފެނިފައެއް ނުވެއެވެ.

މި ސިލްސިލާގައި ހިމެނޭ އެހެން މީހުންގެ ތެރޭގައި ލޮސް އަލާމޯސް ނޭޝަނަލް ލެބޯޓްރީގެ މުވައްޒަފުން ކަމަށްވާ އެންތަނީ ޗާވޭޒް އާއި މެލިސާ ކޭސިއަސް ހިމެނެއެވެ. މީގެ އިތުރުން އެމެރިކާގެ އެއާފޯސް ރިސާޗް ލެބޯޓްރީގެ ކުރީގެ ކޮމާންޑަރު، ރިޓަޔާޑް މޭޖާ ޖެނެރަލް ވިލިއަމް ނީލް މެކްކަސްލޭންޑް ވެސް ވަނީ 2026 ވަނަ އަހަރުގެ ފެބްރުއަރީ މަހު އެއްވެސް ނިޝާނެއް ނެތި ގެއްލިފައެވެ. މި ހުރިހާ މީހުންނަކީ ވެސް އެމެރިކާގެ ގައުމީ ސަލާމަތާ ގުޅުންހުރި ނާޒުކު މަސައްކަތްތަކެއްގައި އުޅުނު މީހުންނެވެ.

މި މައްސަލަތަކާ ގުޅިގެން އެމެރިކާގެ ބައެއް ސިޔާސީ ބޭފުޅުން ވަނީ ކަންބޮޑުވުން ފާޅުކޮށް، އެފްބީއައި މެދުވެރިކޮށް މިކަން ތަހުގީގު ކުރުމަށް ގޮވާލާފައެވެ. ގެއްލުނު ބައެއް މީހުންގެ ފޯނުތައް ފެނުނު އިރު، އެ ފޯނުތަކުގައި ހުރި ހުރިހާ މައުލޫމާތެއް ވަނީ ފޮހެލާފައެވެ. މި ހާދިސާތަކުގެ ފަހަތުގައި އެއްވެސް ގުޅުމެއް އޮތްކަން ރަސްމީ ފަރާތްތަކުން އަދި ކަށަވަރުކޮށްދީފައެއް ނުވެއެވެ.