ޔުއެފާ ޗެމްޕިއަންސްލީގް ސެމީފައިނަލުގެ ޖާގައެއް ހަނިގޮތަކަށް އިނގިރޭސިވިލާތުގެ އާސެނަލް ހޯދައިފިއެވެ.
މުބާރާތުގެ ސެމީގެ ޖާގައެއް އާސެނަލް ކަށަވަރުކޮށްފައިވަނީ، ރޭ ޕޯޗްގަލްގެ ސްޕޯޓިން ލިސްބަން އާ ދެކޮޅަށް ކުޅުނު މެޗަށްފަހުއެވެ. އާސެނަލްގެ އެމިރޭޓްސް ސްޓޭޑިއަމްގައި ކުޅުނު މިމެޗްގައި އެއްވެސް ޓީމަކަށް ލަނޑެއް ނުޖެހުނު ނަމަވެސް ޕޯޗްގަލްގައި ކުޅުނު ފުރަތަމަ ލެގްގެ މެޗް 0-1 ގެ ނަތީޖާއަކުން ކާމިޔާބުކުރީ އާސެނަލް އެވެ.
ޗެމްޕިއަންސްލީގް ސެމީގެ ޖާގައެއް އާސެނަލަސް ކަށަވަރުވީ ދެމެޗެގް ޖުމްލަ ނަތީޖާއަށް ބަލައި 0-1 ގެ ނަތީޖާއިން ކުރިހޯދައިގެންނެވެ. އާސެނަލް ރޭގެ މެޗަށް ނިކުތްއިރު އެޓީމްގެ ފޯމް ވަނީ ގެއްލިފައެވެ. އެގޮތުން އެންމެފަހުން އާސެނަލް ކުޅުނު ފަސް މެޗަށް ބަލާއިރު އެޓީމް މޮޅުވެފައިވަނީ އެންމެ މެޗަކުންނެވެ.
އާސެނަލް އާއި ސްޕޯޓިން ލިސްބަން ބައްދަލުކުރިމެޗްގެ ތެރެއިން... ފޮޓޯ: އާސެނަލް
ރޭގެ މެޗަށް އާސެނަލް ނިކުތީ އަނިޔާގެ ސަބަބުން ބުކާޔޯ ސާކާ، މާޓިން އޮޑެގާޑް، ޔޫރިއެން ޓިމްބާ އަދި ރިކާޑޯ ކަލަފިއޯރީ ނުލައެވެ. މެޗްގައި އާސެނަލްގެ ޑެކްލަން ރައިސް ފެނުނު ނަމަވެސް އޭނާ އުޅެނީ ބަލިވެއެވެ. ރޭގެ މެޗްގައި އާސެނަލަށް ކުރިމަތިވި އެންމެބޮޑު ބޮލުގެ ރިހުމަކީ، ވިންގާ ނޯނީ ގެ ކަކުލަށް އަނިޔާވެގެން ބަދަލުކުރަން ޖެހުމެވެ. ކުރިއަށް އޮތީ ޕްރިމިއާ ލީގްގައި މެންޗެސްތަރ ސިޓީ އާ ދެކޮޅަށް ކުޅެންޖެހޭ މެޗްކަމުން މިއީ އާސެނަލްގެ ކޯޗް މިކޭލް އަޓޭޓާއަށް ކުރިމަތިވި ނުތަނަވަސްކަމެކެވެ.
ޗެމްޕިއަންސްލީގް ސެމީފައިނަލުގައި އާސެނަލް ނިކުންނާނީ ސްޕެއިންގެ އެތްލެޓިކޯ މެޑްރިޑާ ދެކޮޅަށެވެ.
Advertisement
This content is created and paid for by advertisers and does not involve Voice Journalists
