މުދާ އެއްކޮށް، އޭގެ ޒަކާތް ނުދައްކާ ތިބޭ މީހުންނަށް އާޚިރަތް ދުވަހުން ވޭންދެނިވި އަޒާބު ލިބޭނެކަމުގެ އިންޒާރު މިއަދުގެ ހުކުރު ޚުތުބާގައި ދީފިއެވެ.
މިއަދުގެ ޚުތުބާ ބިނާކޮށްފައިވަނީ އިސްލާމްދީނުގެ މުހިންމު ރުކުނެއް ކަމުގައިވާ މުދަލު ޒަކާތުގެ މައްޗަށެވެ.
ޚުތުބާގައި ބަޔާންކުރި ގޮތުގައި، މުދަލު ޒަކާތަކީ ހަމައެކަނި އަދާކޮށްލާ ދީނީ ވާޖިބެއް ނުވަތަ ދެވޭ ޞަދަޤާތެއް ނޫނެވެ. އަދި އެއީ ނިކަމެތީންނަށް ވެދެވޭ އިޙުސާންތެރިކަމެއް ނޫން ކަމަށާއި، އެއީ މާތް الله ފަރުޟުކުރައްވައިފައިވާ އިސްލާމް ދީނުގެ ބިންގަލާ ގުޅިފައިވާ، ޢަދުލުވެރިކަމުގެ މަތިވެރި އިލާހީ ނިޒާމެއްކަން ޚުތުބާގައި ފާހަގަކުރިއެވެ.
ކީރިތި ޤުރްއާނުގެ އަށާވީހަކަށް އާޔަތުގައި ނަމާދާ ގުޅުވައިގެން ޒަކާތުގެ ވާހަކަ އައިސްފައިވާކަން ފާހަގަކޮށް ޚުތުބާގައި ބުނީ، ނަމާދަކީ އަޅާއާ ޚާލިޤުވަންތަ اللهއާ ދެމެދު އޮންނަ ގުޅުން ބަދަހިކޮށްދޭ އަޅުކަމަކަށް ވާ ފަދައިން، ޒަކާތަކީ اللهގެ މަޚްލޫޤުންނާ އަޅާއާ ގުޅުވައިދޭ މުހިންމު ވަސީލަތެއް ކަމަށެވެ. އަދި ޒަކާތުގެ މާނައަކީ ޠާހިރުވުމާއި އިތުރުވުން ކަމަށްވާތީ، ޒަކާތް ނެރުމަކީ ނަފުސު ދަހިވެތިކަމުން ޠާހިރުކޮށްދީ، މުދަލުގައި ބަރަކާތްލައްވާނެ ކަމެއް ކަމަށްވެސް ބުންޏެވެ.
ޚުތުބާގައި އިތުރަށް ބުނީ، ޒަކާތަކީ މުދަލުގެ ތެރޭގައި ހިމެނޭ "ކަނޑައެޅިގެންވާ ޙައްޤެއް" ކަމަށެވެ. މުދަލުގެ ނިޞާބު ހަމަވެ، އަހަރު ފުރިހަމަވުމުން ނެރެންޖެހޭ 2.5 އިންސައްތައަކީ އެތައް މިލިއަން ބަޔަކު ފަޤީރުކަމުން ސަލާމަތްކުރުމަށް ފުދޭ މިންވަރެއް ކަމަށް ޚުތުބާގައި ބުންޏެވެ. މިސާލެއްގެ ގޮތުން، އިންޑޮނޭޝިއާގައި 2024 ވަނަ އަހަރު އެކަނިވެސް 1.35 މިލިއަނަށް ވުރެ ގިނަ މީހުން ޒަކާތުގެ ސަބަބުން ފަޤީރުކަމުން ސަލާމަތްވެފައިވާކަން ޚުތުބާގައި ފާހަގަކުރިއެވެ.
މުދާ އެއްކޮށް ޒަކާތް ނުދައްކާ މީހުންނަށް އޮތް އިންޒާރު ބަޔާންކުރަމުން ޚުތުބާގައި ބުނީ، އެފަދަ މީހުން އެއްކުރި ރަނާއި ރިހި ނަރަކައިގެ އަލިފާނުން ދޮންކުރައްވައި، އެ މީހުންގެ ނިތްކުރިތަކާއި އަރިކަށިތަކުގައި ފާހަގަލައްވާނެ ކަމަށެވެ.
މާތް الله ވަޙީކުރައްވައިފައިވާ ބަސްފުޅެއްގެ މާނައިގައި ވެއެވެ. "އަދި ރަނާއި ރިހި خَزَانَةކޮށް، اللهގެ މަގުގައި އެ ތަކެތި ހޭދަނުކޮށް ތިބޭ މީހުން (ދަންނާށެވެ!) ފަހެ، ވޭންދެނިވި عَذَابُހުރިކަމުގެ خَبَرُ، އެއުރެންނަށް ކަލޭގެފާނު ދެއްވާށެވެ! (އެގޮތުގެމަތީން) އޭނާ، އެއްކޮށް خَزَانَةކުޅަ، ރަންރިހި، އެދުވަހުން ނަރަކައިގެ އަލިފާނުން ދޮންކުރައްވައި، އެތަކެތީން، އެއުރެންގެ ނިތްކުރިތަކުގައްޔާއި، އަރިކަށިތަކުގައްޔާއި، ބުރިކަށިތަކުގައި، ފާހަގަލައްވަމުން ގެންދަވާނެތެވެ. (އަދި އަންގަވާނެތެވެ.) މިހިރީ، ތިޔަބައިމީހުންގެ އަމިއްލަ نَفْسُތަކަށް ޓަކައި، ތިޔަބައިމީހުން އެއްކޮށް خَزَانَةކުޅަ ތަކެއްޗެވެ. ފަހެ، ތިޔަބައިމީހުން خَزَانَةކޮށް އުޅުނު ތަކެތީގެ ރަހަ ދެކެބަލާށެވެ!"
ޚުތުބާގައި ބުނީ، ޒަކާތް ނުދީ ހިފެހެއްޓުމަކީ މުދާ ރައްކާތެރިކޮށްދޭނޭ ކަމެއް ނޫން ކަމަށާ އެއީ މުދަލުން ބަރަކާތް ކެނޑޭނޭ ކަމެއް ކަމަށެވެ.
އެހެންކަމުން، ދިރިއުޅުމުގެ މަޝްޣޫލުކަމަކީ ޒަކާތް ދެއްކުން ފަސްކުރުމަށް އޮތް އުޒުރެއް ކަމަށް ނުހެދުމަށާއި، ލަސްނުކޮށް ޒަކާތް އަދާކުރުމަށް މިއަދުގެ ޚުތުބާގައި ހުރިހާ މުސްލިމުންނަށް ގޮވައިލިއެވެ.
Advertisement
This content is created and paid for by advertisers and does not involve Voice Journalists
