މަސްދޯނި ފަހަރުތަކަށް ތެއޮ ލިބުން ދަތިކަމަށް ދެކެވޭ ވާހަކަ މަސްވެރިކަމާ ބެހޭ ވަޒީރު އަހުމަދު ޝިޔާމް ދޮގުކުރައްވައިފިއެވެ.

މަސްވެރިންނަށް ތެއޮ ލިބުން ދަތިވެފައިވާކަމަށް މީޑިއާއަކުން ޝާއިއުކުރި ލިޔުމަކާ ގުޅޭގޮތުން މިއަދު އެކްސްގައި ކުރެއްވި ޕޯސްޓެއްގައި ވަޒީރު ޝިޔާމް ވިދާޅުވީ، ދުނިޔޭގެ ބާޒާރުގައި ތެލުގެ އަގުތައް އިންތިހާއަށް އުފުލެމުންދާ މި ދަނޑިވަޅުގައިވެސް، ދިވެހި މަސްވެރިންނަށް އެކަމުގެ ބުރަ ނުޖައްސާ ސަރުކާރުން ތެލުގެ ކަންކަން އެންމެ ރަނގަޅަށް މެނޭޖުކުރަމުންދާކަމަށެވެ. އަދި އެކަމުގެ ޔަގީންކަން ދޭކަމަށްވެސް ޝިޔާމް ވިދާޅުވިއެވެ.

ވަޒީރު ވިދާޅުވީ މަސްވެރިކަމާ ގުޅޭ މި ބާވަތުގެ ކަންކަމުގައި ސަރުކާރުން އަޅުއްވަމުން ގެންދަވާ ފިޔަވަޅުތައް މަސްވެރިން ޝުކުރުވެރިކަމާއެކު ބަލައިގަންނަ ކަމަށެވެ.

މަސްވެރިކަމުގެ މިހާރުގެ ހާލަތަށް އަލިއަޅުއްވާލައްވަމުން މިނިސްޓަރު ވިދާޅުވީ، ގިނަ ދުވަސްތަކެއް ވަންދެން އެންވެރިކަން ދަށްވެފައި އޮތުމަށްފަހު، މިހާރު މުޅި ރާއްޖެއަށްވެސް އެންވެރިކަން ރަނގަޅުވާން ފަށާފައިވާ ކަމަށެވެ. މަސްވެރިކަންވެސް ވަރަށް ބޮޑަށް ރަނގަޅުވަމުން އަންނަކަން ފާހަގަކުރައްވަމުން ވަޒީރު ވިދާޅުވީ، މަސްވެރިކަން ރަނގަޅު ސަރަހައްދުތަކަށް ބޯޓުފަހަރު ފޮނުވުމުގެ މަސައްކަތްވެސް ކުރިއަށްދާނޭ ކަމަށް މިނިސްޓަރު ވިދާޅުވިއެވެ.

ސަރުކާރުގެ އަމާޒަކީ މަސްވެރިންގެ ކަންކަން ގާތުން ބަލައި، މަސްވެރިންނަށް އެންމެ ފައިދާހުރި ގޮތްތަކަށް މަސައްކަތް ކޮށްދިނުން ކަމަށް ވަޒީރު ވިދާޅުވިއެވެ. ހަމައެހެންމެ، މަސްވެރިކަމުގެ ސިނާއަތުގައި ހަރަކާތްތެރިވާ ކުންފުނިތަކަށް ދިމާވެފައިވާ ގޮންޖެހުންތަކަށް ހައްލު ހޯދައިދިނުމަށް އިންޑަސްޓްރީގެ މަޝްވަރާއާއެކު ގިނަ މަސައްކަތްތަކެއް ކުރަމުންދާކަންވެސް ވަޒީރު ވިދާޅުވިއެވެ.

ސަރުކާރުން މިވަގުތު އެންމެ ބޮޑު އިސްކަމެއް ދެނީ މި ދަތި ހާލަތުގައިވެސް މަސްވެރިންނަށް މަސްކަނޑުތަކަށް ނުކުމެވޭނެކަން ކަށަވަރުކުރުންކަމަށާއި، އެކަން ކުރުމަށް ހުއްޓުމެއްނެތި މަސައްކަތް ކުރަމުންދާކަމަށްވެސް ވަޒީރު ވަނީ ވިދާޅުވެފައެވެ.

މެދުއިރުމަތީގެ ހަނގުރާމައާ ގުޅިގެން ތެލުގެ އަގު ބޮޑުވިނަމަވެސް މަސްވެރިންނަށާއި އާއްމުނަށް ތެއޮ ދެނީ ސަބްސިޑީގެ ތެރެއިންކަން ފާހަގަކޮށްލެވެއެވެ.