އެމެރިކާގެ ރައީސް ޑޮނަލްޑް ޓްރަމްޕް ޞުލްޙައަށް ހުރަސްއަޅާނަމަ، ޔަމަނުގެ އައްސޭރިފަށުގައި އޮންނަ މުހިންމު ކަނޑުއޮޅިއެއް ކަމަށްވާ ބާބުލް މަންދަބު ބަންދުކޮށްފާނެކަމުގެ ވަރުގަދަ އިންޒާރެއް ޔަމަނުގެ ސަންޢާގައި އޮންނަ ހޫޘީ ސަރުކާރުގެ ޑެޕިއުޓީ ފޮރިން މިނިސްޓަރު ޙުސައިން އަލްޢިއްޒީ ދެއްވައިފިއެވެ.
އެކްސްގައި ކުރެއްވި ޕޯސްޓެއްގައި އަލްޢިއްޒީ ވިދާޅުވީ، ސަންޢާ އިން ބާބުލް މަންދަބު ބަންދުކުރުމަށް ނިންމައިފިނަމަ، އެތަން އަލުން ހުޅުވުމުގެ ”ބާރު އިންސާނުންނާއި ޖިންނީންނަށްވެސް ލިބިގެން ނުވާނެ“ ކަމަށެވެ. އަދި ޓްރަމްޕާއި އޭނާއަށް ވާގިވެރިވާ ފަރާތްތަކުން ޞުލްޙައަށް ހުރަސްއަޅާ ސިޔާސަތުތައް ވަގުތުން ހުއްޓާލައި، ޔަމަނުގެ ރައްޔިތުންނާއި އުންމަތުގެ ޙައްޤުތަކަށް އިޙްތިރާމް ކުރުމަށް އޭނާ ގޮވާލެއްވިއެވެ.
ބާބުލް މަންދަބަކީ ރަތްކަނޑާއި އަދަން ކަނޑުއޮޅި ގުޅުވައިދޭ، ދުނިޔޭގެ ވިޔަފާރީގެ މުހިންމު މަގަކަށްވާ ސުއޭޒް ކަނަލްއަށް ދަތުރުކުރާ އުޅަނދުފަހަރުގެ މައިގަނޑު މަގެވެ. އެންމެ ހަނި ހިސާބުގައި 29 ކިލޯމީޓަރު (18 މޭލު) ހުންނަ މި ކަނޑުއޮޅިއަކީ މުޅި ދުނިޔޭގެ ތެލާއި ގޭހުގެ ވިޔަފާރީގައި ނުހަނު މުހިންމު ދައުރެއް އަދާކުރާ ސަރަޙައްދެކެވެ. ޚާއްޞަކޮށް ޚަލީޖުގެ ޤައުމުތަކުން މެދުތެރޭ ކަނޑުގެ ސަރަޙައްދަށާއި، ރަޝިޔާއިން އޭޝިއާގެ ޤައުމުތަކަށް ތެޔޮ އެކްސްޕޯޓު ކުރުމުގައި މި މަގު ބޭނުންކުރެއެވެ.
މީގެ އިތުރުން، އީރާނުންވެސް ވަނީ އެމެރިކާއިން އެޤައުމުގެ ބަނދަރުތައް ބަންދުކޮށްފައި އޮތް އޮތުން ނިމުމަކަށް ނުގެންނަނީސް ހޯރްމުޒް ކަނޑުއޮޅި ނުހުޅުވާނެ ކަމަށް ބުނެފައެވެ. އީރާނުގެ ޑެޕިއުޓީ ފޮރިން މިނިސްޓަރު ސައީދު ޚާތިބުޒާދާ ވިދާޅުވީ، އެމެރިކާއިން ގެންގުޅޭ ހަރުކަށި އުޞޫލުތައް ދޫކޮށްނުލާތީ، އެމެރިކާއާއެކު ބާއްވާ މަޝްވަރާތަކުގެ އައު ބުރެއް ފެށުމަށް އަދި ތާރީޚެއް ކަނޑައެޅިފައި ނުވާ ކަމަށެވެ.
ނަމަވެސް، ރައީސް ޓްރަމްޕް ވަނީ އީރާނާއެކު އެއްބަސްވުމަކަށް އާދެވެންދެން ބަނދަރުތައް ބަންދުކޮށްފައި އޮތް އޮތުން ދަމަހައްޓާނެ ކަމަށާއި، އީރާނުގެ ބިރުދެއްކުންތަކަށް ދޫނުދޭނެ ކަމަށް ބުނެފައެވެ.
މެދުއިރުމަތީގެ މަސްރަޙު މިހާ ބޮޑަށް ނުތަނަވަސްވެފައިވާއިރު، އިސްރާއީލުން ދަނީ ލުބުނާނުގައި އިޢުލާންކޮށްފައިވާ ހަނގުރާމަ ހުއްޓާލުމުގެ އެއްބަސްވުމާ ޚިލާފަށް އެޤައުމުގެ ދެކުނުގެ ސަރަޙައްދުތަކަށް ޙަމަލާދެމުންނެވެ. އިސްރާއީލުން ބުނާ ގޮތުގައި އެޤައުމުން މިހާރު ވަނީ ޣައްޒާގައިވެސް ހަދާފައިވާ ފަދަ "ޔެލޯ ލައިން" އެއް ލުބުނާނުގައިވެސް ކަނޑައަޅާފައެވެ.
މި ދަނޑިވަޅުގައި ފަރަންސޭސި ރައީސް އެމަނުއެލް މެކްރޯން ވަނީ ލުބުނާނުގައި ހަރަކާތްތެރިވި ފަރަންސޭސި ސުލްޙަ ބަލަހައްޓާ ސިފައިންގެ މީހަކު މަރުވި ޙަމަލާގެ ޒިންމާ ހިޒްބުاللهގެ ބޮލުގައި އަޅުވާފައެވެ. ނަމަވެސް ހިޒްބުالله އިން ވަނީ މި ތުހުމަތުތައް ދޮގުކޮށްފައެވެ. މުޅި ސަރަޙައްދުގައި ހިނގަމުންދާ މި ހަމަނުޖެހުންތަކުގައި މަރުވާ މީހުންގެ އަދަދު ދަނީ ދުވަހުން ދުވަހަށް އިތުރުވަމުންނެވެ.
Advertisement
This content is created and paid for by advertisers and does not involve Voice Journalists
