ކުރީގެ ޤައުމީ ޓީމްގެ ކެޕްޓަން އަލީ އަޝްފާގް ހިމެނޭހެން ކުރިއަށްއޮތް ޖުބިލީ އިންވިޓޭޝަނަލް ކަޕުގައި ވާދަކުރާ ޤައުމީ ސްކޮޑް އިއުލާނުކޮށްފިއެވެ.

ޤައުމީ ފުޓްބޯޅަ ޓީމްގެ ސްކޮޑް އިއުލާނުކުރިއިރު، ސްކޮޑްގައި 32 ކުޅުންތެރިން ހިމެނެއެވެ. ސްކޮޑަސް ބަލާއިރު، އެންމެ ފާހަގަކޮށްލެވެނީ، އަލީ އަޝްފާގް ސްކޮޑްގައި ހިމަނާފައި ވުމެވެ. މިފަހަރުގެ ސްކޮޑް އެކުލަވާލިއިރު، ތަޖްރިބާކާރު ކުޅުންތެރިން ހިމަނާފައިވާއިރު، މީގެ ތެރޭގައި އަލީ އަޝްފާގްގެ އިތުރުން އަލީ ފާސިރު (ސެންޓޭ) އާއި އަމްދާން އަލީ (އޭންޑީ)، ސަމޫހު އަލީ (ސަމުއްޓެ) ގެ އިތުރުން އަހްމަދު އަބްދުﷲ (ލިލީ) ހިމެނެއެވެ.

ސްކޮޑްގައި ނިމިގެންދިޔަ ސާފް ޗެމްޕިއަންޝިޕް ޒުވާން ޓީމްގެ ސްކޮޑްގައި ހިމެނުނު މުހިންމު ކުޅުންތެރިން ހިމެނެއެވެ. މީގެ ތެރޭގައި އީތަން، އިލާން، ގޯލްކީޕަރު ޒަހްރާން އަދި ނައްސާހް ފާހަގަކޮށްލެވެއެވެ.

32 ކުޅުންތެރިންގެ ސްކޮޑް

ރާއްޖޭގައި ފުޓްބޯޅަ ކުޅެންފެށިތާ 75 އަހަރު ފުރުން ފާހަގަކުރުމުގެ މުނާސަބަތުގައި ބޭއްވުމަށް ނިންމާފައިވާ މުބާރާތް ކުރިއަށްދާނީ ޖޫންމަހުގެ 1 ވަނަ ދުވަހުން ފެށިގެން 10 ވަނަ ދުވަހުގެ ނިޔަލަށެވެ. މި މުބާރާތުގައި ރާއްޖޭގެ އިތުރުން އަވައްޓެރި ސްރީލަންކާ، ބަންގްލަދޭޝް، އަދި ޕާކިސްތާނުގެ ޓީމް ބައިވެރިވާނެއެވެ. މުބާރާތުގައި ބަންގްލަދޭޝްއިން ބައިވެރިވާނީ ޒުވާން ޓީމެވެ.

މުބާރާތުގައި ވާދަކުރާ ރާއްޖޭގެ ޓީމް ނިކުންނާނީ ޤައުމީ ޓީމްގެ ކޯސް އިސްތަވާން އުރުބާނީގެ އިރުޝާދުގެ ދަށުންނެވެ. މުބާރާތަށް ތައްޔާރުވުމުގެ ގޮތުން ޤައުމީޓީމްގެ ފަރިތަކުރުންތައް ފެށުމަށް ހަމަޖެހިފައިވަނީ މިމަހުގެ 26 ވަނަ ދުވަހުއެވެ.