ޕާޓީގެ ވަގުތީ ބެލެނިވެރިން އިތުރު މީހުން ޕާޓީއަށް ވަނުމަށް ހުރަސްއެޅުމުގެ ނިޔަތުގައި ވަގުތު ކުޑަކުރިކަމަށް ވިދާޅުވެ، އެއީ ވަރަށް ދެރަ އަދި ހިތާމަވެރި ކަމެއްކަމަށް ރައީސް ނަޝީދު ވިދާޅުވެއްޖެއެވެ.

ރައީސް ނަޝީދު މިހެން ވިދާޅުވެފައިވަނީ، މިއަދު އެކްސްގައި ހިއްސާ ކުރެއްވި ވީޑިއޯއެއްގައި ވާހަކަދައްކަވަމުންނެވެ.

އެމްޑީޕީގެ ޗެއަރޕާސަން ހޮވުމަށްޓަކައި ބާއްވާ އިންތިޚާބަށް ވޯޓުލެވޭނީ ރޭ 12 ގެ ކުރިން ޕާޓީއާށް ވަންނަ މީހުންނަށް ކަމަށް އެމްޑީޕީގެ ވަގުތީ ލީޑަރޝިޕުން އިއުލާން ކުރުމުން، އިއްޔެ ވަނީ ވަރަށް ގިނަ އަދަދެއްގެ މީހުން އެ ޕާޓީއާއި ގުޅިފައެވެ.

އެގޮތުން، ރައީސް ނަޝީދު ވިދާޅުވި ގޮތުގައި އެމްޑީޕީއަށް އިއްޔެ ވަނީ 10،000 އާއި ގާތް އަދަދަކަށް މީހުން ގުޅިފައެވެ. ނަމަވެސް، އެހާ ކުރު މުއްދަތެއް ދިނުމުން ރައީސް ނަޝީދު ވަނީ، އެއީ ވަރަށް ހިތާމަވެރި އަދި ދެރަ ކަމެއް ކަމުގައި ވިދާޅުވެފައެވެ.

މީގެ އިތުރުން، ރައީސް ނަޝީދު ވިދާޅުވިގޮތުގައި ޕާޓީގެ އެތެރޭގައި ވާދަވެރި އިންތިޚާބުތައް ބޭއްވުމުގެ އެންމެ ބޮޑު އެއް މަގުސަދަކީ ޕާޓީގެ މެންބަރުންގެ އަދަދު އިތުރުކުރުމެވެ. އަދި ރައީސް ނަޝީދު ވަނީ އިއްޔެ އެމްޑީޕީއާއި އަލަށް ގުޅުނު ބޭފުޅުންނަށް މަރުހަބާ ވިދާޅުވެފައެވެ.

ރައީސް ނަޝީދު އާއި ފައްޔާޒު އިސްމާއިލް ގުޅިގެން ވަނީ މި ހަފުތާގެ ކުރީކޮޅު "ބޮޑު ބަދަލު" ގެ ނަމުން ހުށެހެޅުމެއް ހުށަހަޅަން ނިންމަވާފައިވާކަން އިއުލާންކޮށްފައެވެ. މި ހުށެހެޅުމަކީ ދިވެހިރާއްޖޭގެ ގާނޫނުއަސާސީއަށް ބޮޑެތި ބަދަލުތަކެއް ގެންނަން ހުށަހަޅާފައިވާ ހުށެހެޅުމެކެވެ. އެގޮތުން، ރާއްޖޭގައި ވެރިކަން ކުރާ ނިޒާމައްވެސް ބޮޑެތި ބަދަލުތަކެއް ގެންނަން މި ހުށެހެޅުމުގައި ހިމެނިފައިވެއެވެ. ރައީސް ނަޝީދު އާއި ފައްޔާޟު އިސްމާއީލް ވިދާޅުވާ ގޮތުގައި، މި ހުށެހެޅުމުގެ ބޭނުމަކީ ރައްޔިތުން އިތުރަށް ބާރުވެރިކުރުމެވެ. އަދި މި ހުށެހެޅުމުގައި ސަރުކާރުގެ އިސްވެރިޔެއްގެ އިތުރުން ދައުލަތުގެ އިސްވެރިޔަކު ހިމެނިވަޑައިގަންނަވައެވެ.

އެގޮތުން، ރައީސް ނަޝީދު ވަނީ ދައުލަތުގެ އިސްވެރިޔެއްގެ މަގާމު އަދާ ކުރުމަށް ޝައުގުވެރިކަން ފައުޅުކުރައްވާ، ކުރިއަތް އޮތް ރިޔާސީ އިންތިޚާބުގައި ފައްޔާޟު އިސްމާއިލަށް ތާއިދުކުރައްވަން ނިންމަވާފައިވާކަން އިއުލާންކޮށްފައެވެ. 

ކުރިއަށް އޮތް އެމްޑީޕީގެ ޗެއަރޕާސަން ހޮވުމުގެ އިންތިޚާބުގައި ރައީސް ނަޝީދު ވާދަކުރައްވާއިރު، ކުރީގެ މަޖިލީސް މެންބަރު އަލްހާން ފަހްމީއާއި މިހާރުގެ ގަލޮޅު ދެކުނު ދާއިރާގެ މަޖިލީސް މެންބަރެއް ކަމުގައިވާ މީކާއިލް އަޙްމަދު ނަސީމް ވެސް ވާދަކުރައްވާނެއެވެ.

އިއްޔެ އެމްޑީޕީއާއި އަލަށް ގުޅުނު މެންބަރުންނާއި އެކު އެ ޕާޓީގެ މެންބަރުންގެ އަދަދު މިހާރު 50،000 މީހުންނާއި ގާތްކޮށްފައިވާ ކަމަށް ފައްޔާޒު ވިދާޅުވެއެވެ.