ފެނަކަ ކޯޕަރޭޝަނުން ޔުޓިލިޓީގެ ހިދުމަތްތައް ދެމުންއައި ތިން އަތޮޅެއްގެ ޔުޓިލިޓީ ޤައުމީ ކަރަންޓް ކުންފުނި، ސްޓެލްކޯއާ ހަވާލުކޮށްފިއެވެ.
ސްޓެލްކޯއާ ހަވާލުކޮށްފައިވަނީ، ބ،މ އަދި މ އަތޮޅުގެ ރަށްތަކުގެ ޔުޓިލިޓީ ހިދުމަތްތަކެވެ. މިކަމަށްޓަކައި މިއަދު ސްޓެލްކޯގައި ބޭއްވި ރަސްމިއްޔާތުގައި ފެނަކަ ކޯޕަރޭޝަންގެ ފަރާތުން އެއްބަސްވުމުގައި ސޮއިކުރެއްވީ، ޑެޕިއުޓީ މެނޭޖިން ޑިރެކްޓަރ އާދަމް ތައުފީޤެވެ. ސްޓެލްކޯގެ ފަރާތުން ސޮއިކުރެއްވީ، އެކުންފުނީގެ ޑެޕިއުޓީ މެނޭޖިން ޑިރެކްޓަރ ޑރ.އަލީ އަޒުހަރުއެވެ.
ސަރުކާރުން ބުނެފައިވަނީ މި ބަދަލު ގެނައުމަށް ނިންމީ، ރައްޔިތުންނަށް ދެމުންގެންދާ ޚިދުމަތްތައް އިތުރަށް ތަރައްޤީކޮށް، ދެމެހެއްޓެނިވި އަދި ފެންވަރު ރަނގަޅު ޚިދުމަތެއް ފޯރުކޮށްދިނުމަށްޓަކައެވެ. މިއަދު ވެވުނު އެއްބަސްވުމާއެކު، ބ، ޅ އަދި މ އަތޮޅުގެ 25 ރަށުގެ ކަރަންޓާއި ފެން އަދި ނަރުދަމާގެ ޚިދުމަތްދިނުމުގެ ކަންކަން ކުރިއަށްގެންދާނީ ސްޓެލްކޯއިންނެވެ.
އެއްބަސްވުމުގައި ސޮއިކުރުމުގެ ރަސްމިއްޔާތުގައި ވާހަކަދައްކަވަމުން ފެނަކައިގެ ޑެޕިއުޓީ މެނޭޖިންގ ޑިރެކްޓަރު އާދަމް ތައުފީގް ވިދާޅުވެފައިވަނީ، މި އެއްބަސްވުމާއެކު ފެނާއި ނަރުދަމާގެ ކަންކަން ސްޓެލްކޯއިން ދެމެހެއްޓެނިވިގޮތެއްގައި ރައްޔިތުން އެދޭގޮތަށް ހިދުމަތްތައް ދެމުންދާނޭކަން ޔަގީންކުރައްވާކަމަށެވެ.
ސްޓެލްކޯގެ ޑެޕިއުޓީ މެނޭޖިން ޑިރެކްޓަރ ޑރ.އަލީ އަޒުހަރު ވިދާޅުވީ ސްޓެލްކޯއިން އެ ރަށްރަށުގެ ޔުޓިލިޓީއާ ހަވާލުވުމާއެކު ކުރިއަށްއޮތްތަނުގައި ހިދުމަތްތައް އިތުރަށް ތަރައްޤީވެގެން ދާނޭކަމަށެވެ.
ސްޓެލްކޯއިން ބުނެފައިވަނީ މިއަދު އިތުރު ރަށްތަކެއްގެ ޔުޓިލިޓީގެ ހިދުމަތްތަކާ ހަވާލުވުމާއެކު ގްރޭޓަރމާލެ ސަރަހައްދާއެކު ބ، ޅ، ކ، އއ، އދ، ވ އަދި މ އަތޮޅު ހިމެނޭގޮތަށް ސްޓެލްކޯއިން ޚިދުމަތްދޭ ރަށްތަކުގެ އަދަދު 61 ރަށަށް ފުޅާވެގެންދާނެ ކަމަށެވެ.
Advertisement
This content is created and paid for by advertisers and does not involve Voice Journalists
