މި ހުކުރު 'ވޮއިސް' ގެ ބަދިގެއިން މި ގެނެސްދެނީ މީރުކޮށް ކުކުޅެއް ފިހެލާނެ ގޮތެވެ. މިއީ ތައްޔާރު ކޮށްލަން ވެސް ފަސޭހަ ޑިޝްއެކެވެ. މި ޑިޝް ޗިކަން ޑިޕިންގ އާއި އެކު ނުވަތަ ފަރާޓާ ނޫނީ ބަތާއި އެކު ކާލަންވެސް ވަރަށް މީރު ވާނެއެވެ. 

1ކިލޯ ކުކުޅު (ހަން ނުނޮޅައި، މެދުން ފަޅާލާފައި)

1 ބޮޑު ފިޔާ

3 ލޮނު މެދު

ހިކަނދިފަތް

1/2 އިންޗި އިނގުރު

ގިތެޔޮ މިރުސް

4 މޭޒުމަތީ ސަމުސާ މުގުރި މިރުސް

1 ސައި ސަމުސާ މުގުރި އަސޭމިރުސް

1/2 ސައިސަމުސާ ދިރި

3 ކާށި ފޮތި (ފިހެފައި)

ނޫޑްލްސް ސޫޕް ޕެކެޓެއް

3 ބިލިމަގު (ބޮޑު)

1 1/2 މޭޒުމަތީ ސަމުސާ ތަންޑޫރީ ޗިކަން މަސާލާ

1 1/2 ލުނބޯ

1 މޭޒުމަތީ ސަމުސާ ސޯޔާ ސޯސް

1 ސައި ސަމުސާ އޮއިސްޓާ ސޯސް 

1 ސައިސަމުސާ ލޮނު

6 މޭޒުމަތީ ސަމުސާ މެލްޓެޑް ބަޓަރު

1) ފިޔާ، ލޮނުމެދު، ހިކަނދިފަތް، އިނގުރު، ގިތެޔޮ މިރުސް، މުގުރި މިރުސް، ތަންދޫރީ ޗިކަން މަސާލާ، ބިލިމަގު، އަސޭމިރުސް، ދިރި، ކާށި އަދި ނޫޑްލްސް ސޫޕް ޕެކެޓް، އެއްކޮށް މިކްސަރުން ހިމުންކޮށް މުގުރާލާއި ލޮނު މިރުސް ގަނޑެއް ތައްޔާރު ކޮށްލާށެވެ. އެއަށްފަހު މިރުސްގަނޑު ތައްޓަކަށް އަޅާލައި ގާތްގަނޑަކަށް އެއް ސައިސަމްސާ ލޮނު އަޅާލައި އެކުލަވާލާށެވެ.

2) ދެން ކުކުޅުގައި ރަނގަޅަަށް ލޮނުމިރުސް އުނގުޅާލުމަށްފަހު ފްރިޖްއަށްލައި 2 ގަޑިއިރު ވަންދެން މެރިނޭޓް ކޮށްލާަށެވެ.

3) އެއަށްފަހު ސޯޔާ ސޯސް، އޮއިސްޓާ ސޯސް އަދި ބަޓަރު ވަކި ތައްޓެއްގައި އެކުލަވާލާފައި ބަހައްޓާށެވެ. 

4) ކުކުޅު މެރިނޭޓްވުމުން މައްޗަށް ލުނބޯހުތް ފިތާލައި ކުކުޅުގައި ރަނގަޅަށް އުނގުޅާލާށެވެ. ދެން 200 ޑިގްރީސް ސެލްސިއަސްއަށް 10 މިނެޓް ވަންދެން އަވަން ޕްރީ ހީޓް ކުރާށެވެ. 

5) އެއަށްފަހު ކުކުޅު ޓްރޭއަށް ލުމަށްފަހު، އަވަނަށް ފިހަން ލާށެވެ. ގާތްގަނޑަކަށް 30 މިނެޓްސް ވަންދެން ކުކުޅު ފިހެވުމުން، އަވަނުން ނެގުމަށްފަހު ތައްޔާރުކުރި ބަޓާރ މިކްސް ކުކުޅުގައި ރަނގަޅަށް އުނގުޅާލާށެވެ. 

6) ދެން އަނެއްކާވެސް ކުކުޅު އަވަނަށްލައި ރޯ ފިލަންދެން ފިހެލާށެވެ. ކުކުޅުގެ ރޯ ފިލައި ދިޔަގަނޑު އެއްކޮށް ނުހިކެނީސް އަވަނުން ނަގަންވާނެއެވެ. ނެގުމަށްފަހުގައި އެ ދިޔަގަނޑުވެސް ކުކުޅުމައްޗަށް އަޅައި ކުކުޅުގައި އުނގުޅާލަން ވާނެއެވެ. 

މިހާރު އެހުރީ ވަރަށް ޖޫސީ އެއަށްވުރެވެސް މީރު ފިހުނު ކުކުޅު ތައްޔާރުވެފައެވެ.