ސާފުތާހިރުވުމުގެ ނަމުގައި ކުރާ "ވެކްސް" ނުވަތަ "ލޭޒާ ޓުރީޓްމެންޓު" ފަދަ ކަންކަން ކުރުމަށްޓަކައި، ދީނީ ގޮތުން ހުއްދަ ނޫން މީހުންގެ ކުރިމަތީގައި ޢައުރަ ކަޝްފުކުރުމަކީ ހުއްދަ ކަމެއް ނޫން ކަމަށް މިއަދުގެ ހުކުރު ޚުތުބާގައި ބުނެފިއެވެ.

"ސާފުތާހިރުކަމާއި ޒީނަތްތެރިކަން" މި މައުޟޫއަށް ރާއްޖޭގެ އެކި ކަންކޮޅުތަކުގައި މިއަދު އިއްވި ހުކުރު ޚުތުބާގައި ބުނީ، މިއަދުގެ ޒަމާނީ ވަސީލަތްތަކާއެކު ސާފުތާހިރުވުމުގެ ނަމުގައި ބައެއް ފަހަރު ދީނީ އިންތަކުން ބޭރުވާތަން ފެންނަމުންދާ ކަމަށެވެ. އެގޮތުން ސެލޫންތަކަށް ގޮސް ހުއްދަ ނޫން މީހުންގެ ކުރިމަތީގައި ޢައުރަ ހާމަކުރުމަކީ ދީނީ ގޮތުން ނުރައްކާތެރި ކަމެއްގެ ގޮތުގައި ޚުތުބާގައި ފާހަގަކުރިއެވެ. މިފަދަ ކަމެއް ހުއްދަވާނީ ހަމައެކަނި ޞިއްޙީ ފަރުވާއެއް ފަދަ ޟަރޫރީ ޙާލަތެއްގައި އެކަނި ކަމަށްވެސް ބުނެފައިވެއެވެ.

އިސްލާމްދީނަކީ ސާފުތާހިރުކަމުގެ ދީންކަން ފާހަގަކުރަމުން ޚުތުބާގައި ބުނީ، އެހެން ޙަޟާރަތްތަކާ ޚިލާފަށް އިސްލާމްދީން ބަލަނީ ހަމައެކަނި ބޭރުފުށުގެ ރީތިކަމަށް ނޫން ކަމަށާއި، އެތެރެފުށާއި ބޭރުފުށުގެ ތާހިރުކަމަށް ކަމަށެވެ. އަދި ތާހިރުކަމަކީ އީމާންކަމުގެ ދެބައިކުޅަ އެއްބައި ކަމަށާއި، ޙަޤީޤީ ތާހިރުކަމަކީ ޝިރުކާއި ޙަސަދައާއި ޝައްކުތަކުން ހިތް ސާފުކުރުން ކަމަށްވެސް ބުންޏެވެ.

ޚުތުބާގައި އިތުރަށް ބުނިގޮތުގައި، ފިޠުރަތުގެ ސުންނަތްތަކުގެ ތެރޭގައި ހިމެނޭ ޚިތާނުކުރުމާއި، ފޫޅުންތިރީ އިސްތަށި ބޭލުމާއި، ނިޔަފަތި ކެނޑުން ފަދަ ކަންކަމަށް ފަރުވާކުޑަކުރުމަކީ ޖަރާސީމު އުފެދި ނުބައިވަސް ދުވުމަށް މެދުވެރިވާ ކަމެކެވެ. މީގެއިތުރުން، މިސްކިތްތަކަށްދާއިރު ދުންފަތުގެ އިސްތިއުމާލުކުރުމާއި، ފިޔާ ނުވަތަ ލޮނުމެދު ކައިގެން އަނގައިން ނުބައިވަސް ދުވާ ޙާލުގައި ނުދިޔުމަށްވެސް ވަނީ ނަސޭހަތްތެރިވެފައެވެ.

ހެދުން އެޅުމާއި ޒީނަތްތެރިވުމާ ގުޅޭގޮތުން ވާހަކަދައްކަމުން ޚުތުބާގައި ބުނީ، ބުރުގާ އެޅުމުގެ އަޞްލު މަޤުޞަދަކީ ޢައުރަ ނިވައިކުރުން ކަމަށާއި، ނަމަވެސް ބުރުގާގެ ތެރެއިން ކަންފަތް ނުވަތަ ކަނދުރާ ފެންނަގޮތަށް ހެދުން އެޅުމަކީ ޙިޖާބުގެ މަޤުޞަދު ގެއްލޭ ކަމެއް ކަމަށެވެ. އަދި ފިރިހެނުންވެސް ކުޅިވަރުގެ މައިދާނުގައި ޢައުރަ ހާމަކުރުމުން ދުރުހެލިވުމަށް ވަނީ ގޮވާލާފައެވެ.

ޒީނަތްތެރިވުމުގެ ނަމުގައި الله އުފެއްދެވި ސިފަ ބަދަލުކުރުމަކީ ޝައިޠާނާގެ މަޅިއެއް ކަމަށާއި، ޓެޓޫ ޖެހުމާއި ބުމަ ހެދުން ފަދަ ކަންކަމަކީ اللهގެ ލަޢުނަތް ހުރި ކަންކަން ކަމުގައިވެސް ޚުތުބާގައި ހަނދާންކޮށްދިނެވެ. އަދި ވުޟޫކުރާއިރު ފެން ނުޖެހޭ ފަދަ އެއްޗެހި ބޭނުންކުރުމުން ނަމާދު ޞައްޙަ ނުވާނެކަމުގެ އިންޒާރުވެސް ވަނީ ދީފައެވެ.

ޚުތުބާ ނިންމާލަމުން ބުނީ، ޒީނަތްތެރިވުން އެންމެ އައުލާވެގެންވަނީ ދެމަފިރީން އެކަކު އަނެކަކަށް ކަމަށާއި، އެންމެ ރީތި ހެދުމާއި މީރުވަސްދުވާ ތަކެތި ބޭނުންކުރަންވީ ބޭރަށް ނުކުންނައިރު ނޫން ކަމަށެވެ. އަދި އަނބިދަރިންނަށް ދީނީ ކަންކަމުގައި ނަސޭހަތްތެރިވުމުގައި ހަރުކަށިކަން ދޫކޮށް، ލޯތްބާއި ހިކުމަތްތެރިކަން އިސްކުރުމަށް ހުރިހާ މުސްލިމުންނަށް އިލްތިމާސްކުރިއެވެ.