އިންޑިއާގެ ރިޒާވް ބޭންކާއެކު މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ވެފައިވާ އެއްބަސްވުމުގެ ދަށުން ރާއްޖެއިން ނަގާފައިވާ 400 މިލިއަން އެމެރިކާ ޑޮލަރުގެ ކަރަންސީ ސްވޮޕް ފެސިލިޓީ ދައްކައި ހަލާސްކުރުމާ ގުޅިގެން، ކުރީގެ ރައީސް މުޙައްމަދު ނަޝީދު އިންޑިއާ ސަރުކާރަށް ޝުކުރު އަދާކުރައްވައިފިއެވެ.

މިކަމާ ގުޅޭގޮތުން އެކްސްގައި ކުރެއްވި ޕޯސްޓެއްގައި ރައީސް ނަޝީދު ވިދާޅުވީ، 23 އެޕްރީލް 2026 ގައި ދައްކަންޖެހޭ 400 މިލިއަން ޑޮލަރުގެ ދަރަނި ދިވެހި ސަރުކާރުން ހަލާސްކޮށްފައިވާ ކަމަށެވެ. އަދި ހަމަ އެ ދުވަހު އިންޑިއާ އިން ވަނީ އަލުން 30 ބިލިއަން އިންޑިއަން ރޫޕީސްގެ އާ ފެސިލިޓީއެއް ރާއްޖެއަށް ހަމަޖައްސައިދީފައެވެ.

ނަޝީދު ފާހަގަކުރެއްވި ގޮތުގައި، ދަރަނި ދައްކަންޖެހޭ ދުވަހު އާ ފަންޑިންއެއް ހަމަޖެހިގެން ދިއުމަކީ ގައުމުތަކުން އާންމުކޮށް "ސްވޮޕް ރޯލްއޯވަރ" ކުރާ ގޮތެވެ. އެއީ ކުރީގެ ދަރަނި އާ ދަރަންޏަކުން ބަދަލުކުރުމެވެ. ނަމަވެސް، ރާއްޖޭގެ ފަތުރުވެރިކަމުގެ އާމްދަނީ 30 އިންސައްތަ ދަށްވެފައިވާއިރު، ސަރުކާރުގެ ޚަރަދުތައް ހުރީ އިސްރާފުވާ މިންވަރަށް މަތީގައި ކަމަށް އެމަނިކުފާނު ވިދާޅުވުއެވެ.

އަދި، ދަރަނި މެނޭޖްކުރުމުގެ ދެމެހެއްޓެނިވި ޕްލޭނެއް ސަރުކާރަށް މުހިންމު ކަމަށް އެމަނިކުފާނު ވިދާޅުވިއެވެ.

ފޮރިން މިނިސްޓްރީން ހާމަކޮށްފައިވާ ގޮތުގައި، މި 400 މިލިއަން ޑޮލަރުގެ ކަރަންސީ ސްވޮޕް ދައްކައި ހަލާސްކުރުމަކީ ދިވެހި އިގްތިސާދު ރަނގަޅުވެ، ރާއްޖޭގެ މާލީ ހާލަތުގެ ދުޅަހެޔޮކަން ޔަގީންކޮށްދޭ ކަމެކެވެ. މިކަން އިންޑިއާގެ ނޫސްތަކުން ވެސް ވަނީ ބޮޑު ސަމާލުކަމެއް ދީގެން ރިޕޯޓްކޮށްފައެވެ.

މި ލޯނު ދެއްކުމާއެކު އިންޑިއާ އިން އަލަށް ދޫކުރަން ނިންމި 30 ބިލިއަން ރޫޕީސްގެ ކަރަންސީ ސްވޮޕާ ގުޅޭގޮތުން ރާއްޖޭގައި ހުންނަ އިންޑިއާގެ ހައިކޮމިޝަނުން ބުނީ، މި ފެސިލިޓީގައި ރާއްޖެއަށް ގިނަ ލުއިތަކެއް ހިމެނޭނެ ކަމަށެވެ.

ދިވެހި ސަރުކާރުގެ ފޮރިން މިނިސްޓްރީން ވަނީ އިންޑިއާ ސަރުކާރުން ރާއްޖޭގެ މާލީ ހާލަތު ރަނގަޅުކުރުމަށް ދޭ އެއްބާރުލުމަށް ޝުކުރު އަދާކޮށްފައެވެ.