މުޖުތަމަޢުގައި ފަހަކަށް އައިސް ހިނގަމުންދާ ނަފްސާނީ ގޮތުން އަސަރުކުރުވާފަދަ ހިތާމަވެރި ޙާދިސާތަކާ ގުޅިގެން، ޙަޤީޤަތާ ޚިލާފު ވާހަކަތައް ފެތުރުމުގެ ބަދަލުގައި އެކަކު އަނެކަކަށް އޯގާތެރިކަމާއި ހިތްވަރުދިނުމުގެ މެސެޖުތައް ފެތުރުމަށް މިނިސްޓްރީ އޮފް ހެލްތު، ފެމިލީ އެންޑް ވެލްފެއާއިން އިލްތިމާސްކޮށްފިއެވެ.
ހެލްތު މިނިސްޓްރީން ނެރުނު ނޫސް ބަޔާނެއްގައި ބުނެފައިވަނީ، ފަހަކަށް އައިސް ހިނގަމުންދާ ހިތާމަވެރި ކަންކަމާ މެދު ނުހަނު ބޮޑަށް ކަންބޮޑުވާ ކަމަށެވެ. އަދި ކޮންމެ އިންސާނެއްގެ ފުރާނައަކީ މަތިވެރި އަމާނާތަކަށް ވާއިރު، މިފަދަ ނާޒުކު ވަގުތުތަކުގައި މީސްމީޑިއާގައި ފަތުރާ ކަށަވަރުނުވާ މަޢުލޫމާތުތަކުގެ ސަބަބުން، ނަފްސާނީ ގޮތުން ބަލިކަށިވެފައިވާ ފަރާތްތަކަށާއި ވަކިވެދިޔަ ފަރާތްތަކުގެ ޢާއިލާތަކަށް ފޫނުބެއްދޭ ފަދަ ހިތްދަތި އަސަރުތަކެއް ކުރާނެ ކަމަށް މިނިސްޓްރީން ފާހަގަކޮށްފައިވެއެވެ.
އެހެންކަމުން، ޙަޤީޤަތާ ޚިލާފު ވާހަކަތަކާއި ހިތްދަތި މަންޒަރުތައް ފެތުރުމުން ދުރުހެލިވުމަށް ޢާންމުންނަށާއި މީޑިއާތަކަށް މިނިސްޓްރީން ވަނީ ބާރުއަޅާފައެވެ. އޭގެ ބަދަލުގައި، އެކަކު އަނެކަކަށް އުއްމީދާއި ހިތްވަރު ދިނުމަށާއި، އެކަކު އަނެކެއްގެ ޙާލުބަލައި، އޯގާތެރިކަމާއެކު މުޢާމަލާތް ކުރުމަށް ވަނީ އިލްތިމާސްކޮށްފައެވެ.
"އަނެކާގެ ވާހަކަ ކަނުލާ އަޑުއަހާލުމަކީ، ނުވަތަ ދެވޭ ކުޑަ އޯގާތެރިކަމަކީވެސް މީހެއްގެ ފުރާނަ ސަލާމަތްކުރުމަށް ލިބޭ ވަރަށް ބޮޑު ބާރަކަށް ވެގެންދާނެ،" ބަޔާނުގައިވެއެވެ.
ހެލްތު މިނިސްޓްރީން އިތުރަށް ބުނެފައިވަނީ، ޤައުމެއްގެ ޙައިސިއްޔަތުން އެކަކު އަނެކެއްގެ ދުޅަހެޔޮކަން ރައްކާތެރިކުރުމަކީ އެންމެންގެ ޝާމިލު ޒިންމާއެއް ކަމަށެވެ.
އަދި ނަފްސާނީ ގޮތުން ދަތި އުނދަގޫ ޙާލަތެއް ތަޙައްމަލު ކުރަމުންދާ ފަރާތްތަކުން ލަސްނުކޮށް އެހީތެރިކަން ހޯދުމަށްވެސް ވަނީ އެދިފައެވެ. އެގޮތުން، ނޭޝަނަލް މެންޓަލް ހެލްތު ހެލްޕްލައިންގެ ނަންބަރު 1677 މެދުވެރިކޮށް 24 ގަޑިއިރު ނަފްސާނީ އެހީތެރިކަން ލިބޭނެ ކަމަށް ބުނެފައިވެއެވެ.
މިނިސްޓްރީން އިތުރަށް ބުނިގޮތުން އެ މިނިސްޓްރީން މިހާރުވެސް ދަނީ ނަފްސާނީ ދުޅަހެޔޮކަމަށް ދެވޭ ޚިދުމަތްތައް އިތުރަށް ހަރުދަނާކުރުމަށް ފަންނީ ބޭފުޅުންނާއި ގުޅުންހުރި މުއައްސަސާތަކާއެކު މަސައްކަތް ކުރަމުންނެވެ. އަދި މުޖުތަމަޢަށް އެހީތެރިކަން ފޯރުކޮށްދެވޭނެ ހަރުދަނާ ނިޒާމެއް ބިނާކުރުމުގައި ދެމިތިބޭނެ ކަމުގެ ޔަޤީންކަން ހެލްތު މިނިސްޓްރީން ވަނީ އަރުވާފައެވެ.
Advertisement
This content is created and paid for by advertisers and does not involve Voice Journalists
