އިސްރާއީލު ސިފައިން ހުޅަނގު އައްސޭރިއަށް އަރައި، ފަލަސްތީނުގެ ގިނަ ބަޔަކު ހައްޔަރުކޮށްފިއެވެ.

ފަލަސްތީނުގެ ނޫސް އެޖެންސީ، ވަފާއިން ރިޕޯޓްކޮށްފައިވާ ގޮތުގައި، އިސްރާއީލު ސިފައިން ވަނީ ނާބްލަސް ސިޓީއަށް ވަދެގަނެ އެ ރަށުން ތިން މީހަކު ހައްޔަރުކޮށްފައެވެ.

ނާބްލަސްގެ އިރުމަތީގައި އޮންނަ ސާލެމް އަވަށަށް އިސްރާއީލު ސިފައިން ދިން ހަމަލާއެއްގައި ފަލަސްތީނުގެ ޒުވާނަކު ހައްޔަރުކޮށް ކުރިއަށްގެންދިޔަ އޮޕަރޭޝަންގެ ތެރޭގައި އިސްރާއީލު ސިފައިން ބަޑިން ހަމަލާދީފައެވެ. މި ހަމަލާގައި އެ ޒުވާނާގެ ކާރަށް ބޮޑެތި ގެއްލުންތަކެއް ދީފައިވާ ކަމަށްވެސް ވަފާ ނޫސް އެޖެންސީން މަޢުލޫމާތު ދެއެވެ.

ރާމަﷲގެ އިރުއުތުރުގައި އޮންނަ އަލް-މުޣައްޔަރު އަވަށަށް އިސްރާއީލު ސިފައިން ވަދެގަނެ، ފަލަސްތީނުގެ ފަސް ޒުވާނަކު ވަނީ ހައްޔަރުކޮށްފައެވެ. ފަލަސްތީނުގެ ހުޅަނގު އައްސޭރީގެ އެކި ސަރަހައްދުތަކުގައި އިސްރާއީލުން ކުރިއަށްގެންދާ މިފަދަ ރޭޑްތައް ފަހަކަށް އައިސް ވަރަށްބޮޑަށް އިތުރުވަމުން އަންނަކަން ފާހަގަކޮށްލެވެއެވެ.

މީގެ އިތުރުން، ބެތުލެހެމްގެ ދެކުނު އިރުމަތީގައި އޮންނަ ތުޤޫ އަވަށަށް ވެސް އިސްރާއީލު ސިފައިން ވަނީ އަރައިގަނެފައެވެ. އެ ސަރަހައްދުގައި ހުންނަ އަލް-މަންޝިއްޔާ އަދި މަރާހް ރަބާ ސަރަހައްދުތަކަށް ވަދެވޭ ގޮތަށް ހުރި ދަގަނޑު ގޭޓުތައް ބަންދުކޮށް، އާންމުންގެ ދަތުރުފަތުރަށް ވަނީ ހުރަސް އަޅާފައެވެ.

އިސްރާއީލު ސިފައިންގެ ހަރަކާތްތަކުގެ އިތުރުން، ނާބްލަސްގެ ދެކުނުގައި އޮންނަ ގުސްރާ އަވަށުގައި އިސްރާއީލުގެ ވަޒަންވެރިން ވެސް ވަނީ ފަލަސްތީނު މީހުންނަށް އަމާޒުކޮށް ވަނީ ހަމަލާތަކެއް ދީފައެވެ. މި ހަމަލާގައި ފަލަސްތީނު ރައްޔިތުންގެ ގެދޮރަށް ގެއްލުން ދިނުމުގެ އިތުރުން، އާންމުންގެ ދެ އުޅަނދެއްގައި ވަނީ އަލިފާން ރޯކޮށްލާފައެވެ.

އިސްރާއީލުން ފަލަސްތީނަށް ދޭން ފެށި ހަމަލާތައް ހުއްޓާލުމަށް އެއްބަސްވެފައި އޮތް ނަމަވެސް، އިސްރާއީލުން ދަނީ ހަނގުރާމަ ހުއްޓާލުމުގެ އެއްބަސްވުމާއި ހިލާފަށް ފަލަސްތީނުގެ އެކި ސަރަހައްދުތަކަށް ހަމަލާދީ، ފަލަސްތީނުގެ ރައްޔިތުންނަށް އަމާޒުކޮށް ހަރަކާތްތަކެއް ހިންގަމުންނެވެ.