އެޗްޑީސީއާއި އެމްއައިޓީ ގުޅިގެން، ކަނބަލުންނަށް ގޭތެރޭގައި ހިފާ ގެންގުޅޭ ކަރަންޓު ސާމާނު މަރާމާތުކުރަން ދަސްކޮށްދޭ ހާއްސަ ކްލާސްތަކެއް ބޭއްވުމަށް ނިންމައިފއިެވެ.

އެޗްޑީސީން ބުނީ "ވިލުންވެރި ކަނބަލުން" ނަމުގައި ކުރިއަށްގެންދާ މި ޕްރޮގްރާމަކީ މުޖުތަމައުގައި އަންހެނުން ބާރުވެރި ކުރުވާ އަންހެނުންނަށް ތަމްރީނު ފުރުސަތުތައް ފަހިކޮށްދިނުމަށް ކުރިއަށްގެންދާ ތަމްރީނު ޕްރޮގްރާމެއްކަމަށެވެ.

މި ޕްރޮގްރާމްގައި ހިފާގެންގުޅޭ ކަރަންޓު ސާމާނު އަމިއްލައަށް މަރާމާތުކުރަން ދަސްކޮށްދޭނެއެވެ. އެގޮތުން، މި ޕްރޮގްރާމްގެ މައިގަނޑު މަޤްޞަދަކީ ގޭތެރޭގައި ދިމާވާ ކުދިކުދި ކަރަންޓު މައްސަލަތައް ހައްލުކުރުމުގެ ހުނަރު އަންހެނުންނަށް އުނގަންނައިދިނުމާއި، އެފަދަ ޙާލަތްތަކުގައި ކުރެވިދާނެ ކަންކަމަށް އަމިއްލަ ނަފްސު ތައްޔާރު ކުރުމެވެ.

އެޗްޑީސީން ވަނީ މީގެ ކުރިންވެސް މިފަދަ ޕްރޮގްރާމްތައް ކުރިއަށްގެންގޮސްފައެވެ. އެގޮތުން 2023 ވަނަ އަހަރު ކުރިއަށްގެންދެވުނު  ޕްރޮގްރާމްގައި 323 ފަރާތަކުން ބައިވެރިވެފައިވެއެވެ. މި ޕްރޮގްރާމަށް ލިބުނު ބޮޑު ތަރުހީބުގެ ސަބަބުން އެޗްޑީސީން ވަނީ މި އަހަރުގެ ތެރޭގައި މި ސިލްސިލާގެ އިތުރު ޓްރެއިނިންގްތަކެއް ކުރިއަށް ގެންދަން ނިންމާފައެވެ. އެގޮތުން، ޑޮމެސްޓިކް އެޕްލައެންސް ޓްރެއިނިންގްގެ އިތުރުން ސައިކަލުތަކަށް ދިމާވާ ކުދި ކުދި މައްސަލަތައް ހައްލު ކުރުމުގެ ޙާއްސަ ޓްރެއިނިންއެއް ވެސް މިއަހަރު ތެރޭގައި ބޭއްވުމަށް އެޗްޑީސީން ވަނީ ތާވަލު ކޮށްފައެވެ. މިއީ މާލެ ސަރަހައްދުގައި ދިރިއުޅޭ ގިނަ ކަނބަލުންނަށް މިފަދަ ފަންނީ ހުނަރުތައް ދަސްކުރުމަށް ލިބިގެންދާނެ ރަނގަޅު ފުރުސަތެއްކަން އެ ކުންފުނިން ފާހަގަކުރެއެވެ.

މިފަހަރުގެ ޕްރޮގްރާމަށް ކުރިމަތިލުމުގެ އެންމެ ފަހު ތާރީހަކީ އަންނަ މެއިމަހުގެ 7 ވަނަ ދުވަހެވެ. ކްލާސްތައް ކުރިއަށްގެންދިއުމަށް ތާވަލްކޮށްފައިވަނީ، މެއިމަހުގެ 14 އިން 16 ގެ ނިޔަލަށެވެ. މި ކްލާސްތަކުގައި ބައިވެރިވާން ބޭނުންވާ ފަރާތްތަކުން އެޗްޑީސީގެ ހާއްސަ ލިންކުން ރަޖިސްޓްރީ ކޮށްލެވޭނެއެވެ.