އައްޑޫ ސިޓީ ހިތަދޫ އުތުރު ދާއިރާގެ ގޮނޑި މުޙައްމަދު ސިނާން އަތުން ގެއްލުމުގެ ސަބަބުން ބާއްވާ ބައި އިލެކްޝަނުގައި، ޕީޕަލްސް ނެޝަނަލް ކޮންގްރެސް (ޕީއެންސީ) ގެ ފަރާތުން ވާދަ ކުރާ ކެނޑިޑޭޓް ހޮވުމަށްޓަކައި ބާއްވާ ޕީއެންސީގެ ބައި އިލެކްޝަން ޕްރައިމަރީ ފަށައިފިއެވެ.

ޕީއެންސީ ބައި އިލެކްޝަނުގެ ޕްރައިމަރީ ފަށާފައިވަނީ މިއަދު ހެނދުނު 9:00 ޖެހިއިރުއެވެ. އަދި ވޯޓުލާ ފޮށިތައް މިއަދު ހަވީރު 4:00 ޖަހާއިރު ބަންދުކުރާނެއެވެ.

މި އިންތިހާބުގައި އައްޑޫ ސިޓީ ހިތަދޫގައި ފޮށި ބެހެއްޓިފައި ހުންނާނީ ހިތަދޫ ސްކޫލްގައެވެ. އަދި މާލޭގައި ދިރިއުޅޭ އެ ދާއިރާގެ ރައްޔިތުން ވޯޓުލާން ދާން ޖެހޭނީ ކަލާފާނު ސްކޫލަށެވެ.

ޕީއެންސީގެ ޕްރައިމަރީގައި ޖުމްލަ 2 ކެނޑިޑޭޓުން ވާދަކުރާއިރު، އެ ދެ ކެނޑިޑޭޓުންނަކީ، ގޮނޑި ގެއްލުމުން އަލުން ވާދަކުރައްވާ ހުޅުދޫއާގެ، ސ. ހިތަދޫ މުޙައްމަދު ސިނާން އާއި ބަލީލް، ސ. ހިތަދޫ އަޙްމަދު ސަޢީދުއެވެ.

މުޙައްމަދު ސިނާން އަށް ގޮނޑި ގެއްލިފައިވަނީ، ސާބިތު ދަރަންޏެއް އޮތް ކަމަށް ސާބިތުވެ، ކޯޓުން އޭނާގެ ގޮނޑި ގެއްލުނު ކަމަށް ހުކުމް ކުރުމުންނެވެ. އަދި އޭނާ އަކީ، ޕީއެންސީގެ ފަރާތުން އެ ގޮނޑިއަށް ވާދަކޮށް ދިގު މުއްދަތަކަށް އެ ދާއިރާގެ މެންބަރުކަން އަދާ ކުރަމުންދިޔަ މުޙައްމަދު އަސްލަމް މަޖިލިސް އިންތިހާބުން ބަލިކޮށް، ގޮނޑި ކާމިޔާބު ކުރެއްވެވި ބޭފުޅެކެވެ.

އެމްޑީޕީގެ ފަރާތުން ބައި އިލެކްޝަނުގައި ވާދަކުރައްވާނީ، އައްޑޫ ސިޓީގެ ކުރީގެ މޭޔަރު، ޢަބްދުﷲ ޞާދިޤުއެވެ. އޭނާ އަކީ، އައްޑޫ ސިޓީގެ މޭޔަރެއްގެ ގޮތުގައި 10 އަހަރު ހޭދަކޮށްފައިވާ ބޭފުޅެކެވެ.