އެމްޑީޕީގެ ދާއިމީ ޗެއަރޕާސަން ހޮވުމަށް ބާއްވާ އިންތިޚާބުގެ ކެމްޕޭނުގައި، ޕާޓީގެ ޗެއަރޕާސަންގެ ނައިބު އިބްރާހީމް ވަހީދު (އިބުރޭ) ވަކި ކެންޑިޑޭޓެއްގެ ފަހަތްޕުޅުގައި އަމަލީ ގޮތުން ހަރަކާތްތެރިވަމުންދާތީ، އެކަމާ މެދު ފިޔަވަޅު އަޅައިދިނުމަށް އެ މަގާމަށް ވާދަކުރައްވާ ކެންޑިޑޭޓް އަދި ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް އެދިވަޑައިގެންފިއެވެ.

މީކާއިލް މިކަމަށް އެދިވަޑައިގަތީ އެމްޑީޕީގެ ވަގުތީ ޗެއަރޕާސަން އަބްދުލްޣަފޫރު މޫސާ ފޮނުއްވި ސިޓީއެއްގައެވެ.

މީކާއިލްގެ ސިޓީގައި ފާހަގަކުރައްވާފައިވާ ގޮތުގައި، އޭނާއާ ވާދަކުރައްވާ ކެންޑިޑޭޓް، ކުރީގެ ރައީސްު މުހައްމަދު ނަޝީދުގެ ކެމްޕޭން ހަރަކާތްތަކުގައި އިބުރޭ އަމަލީ ގޮތުން ބައިވެރިވާ ކަމުގެ ޝަކުވާ ލިބިފައިވާ ކަމަށާއި، މީޑިއާތަކާއި ސޯޝަލް މީޑިއާއިން ފެންނަ ފޮޓޯ އަދި ވީޑިއޯތަކުން އެކަން ކަށަވަރުވާ ކަމަށެވެ.

ޕާޓީގެ ޗެއަރޕާސަންގެ ނައިބު (އިދާރީ) އަކީ މެންބަރޝިޕްގެ ކަންކަމާއި އިންތިޚާބުތައް ހިންގުމާ ހަވާލުވެ ހުންނަވާ ފަރާތަށް ވާއިރު، އެ މަގާމުގައި ހުންނަވާ ބޭފުޅަކީ ވަކި އަތަކަށް ނުޖެހޭ، ނަޒާހަތްތެރި ބޭފުޅަކަށް ވާންޖެހޭނެ ކަމަށް މީކާއިލް ވިދާޅުވިއެވެ. އިބުރޭ ވަކި ކެންޑިޑޭޓަކަށް ތާއީދުކޮށް ކެމްޕޭނުގައި އުޅުއްވުމަކީ އެހެން ކެންޑިޑޭޓުންނަށް ނުލިބޭ ނާޖާއިޒު ފައިދާ އެ ކެންޑިޑޭޓަށް ފޯރުކޮށްދީ، އިންތިޚާބުގެ އިންސާފުވެރިކަން ގެއްލޭނެ ކަމެއް ކަމަށްވެސް އޭނާ ފާހަގަކުރެއްވިއެވެ.

"މިގޮތަށް ޕާޓީގެ ހިންގުމުގައި އިސް ދައުރެއް އަދާކުރައްވާ ބޭފުޅަކު ވަކި ބޭފުޅަކަށް ބައިއަތު ހިފުމަކީ، އެހެން ކެންޑިޑޭޓުންނާއި އާންމު މެންބަރުންގެ ހައްގުތަކަށް އަރައިގަނެވި، މެންބަރުންނަށް ވެވޭ ބޮޑު ބޭއިންސާފެއް،" މީކާއިލްގެ ސިޓީގައިވެއެވެ.

މީކާއިލް އިތުރަށް ވިދާޅުވީ، އޭނާ މި އިންތިޚާބަށް ކުރިމަތިލެއްވީ އާންމު މެންބަރުންގެ ގެއްލިފައިވާ އިތުބާރު ހޯދައިދީ، މިފަދަ ކަންކަން ތަކުރާރުވިޔަ ނުދިނުމަށް ކަމަށެވެ. އެހެންކަމުން، އިންތިޚާބުގެ ކެމްޕޭން މުއްދަތުގައި އިބްރާހީމް ވަހީދު މަގާމުގެ މަސްއޫލިއްޔަތުތަކުން ދުރުވުމަށް މީކާއިލް ވަނީ ގޮވާލައްވާފައެވެ.

މި މައްސަލަ ބައްލަވައި، ޕާޓީގެ އުސޫލުތަކާ އެއްގޮތަށް އަވަސް ފިޔަވަޅެއް އަޅުއްވައިދެއްވުމަށް ޗެއަރޕާސަންގެ ކިބައިން މީކާއިލް ވަނީ އިހްލާސްތެރިކަމާއެކު އެދިވަޑައިގެންފައެވެ.