ދައުލަތުގެ ބަޖެޓުން ހޭދަކޮށްގެން މެންޓަލް ހޮސްޕިޓަލެއް އެޅުމަށް ނިންމާފައިވާކަން ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ރައީސް ޑރ.މުއިއްޒު ވިދާޅުވީ، ރާއްޖޭގައި މެންޓަލް ހެލްތުގެ މައްސަލައަކީ މިއަދު މުޖުތަމައުގައި ކަންބޮޑުވާ ދަރަޖައަކަށް ގޮސްފައިވާ ކަމެއް ކަމަށެވެ. ނަމަވެސް މިހާލަތުގައި މިކަން އޮތްނަމަވެސް މިއަދާހަމަޔަށް އާއިރު ސަރުކާރަކުންވެސް އަދި މުޖުތަމައުއިންވެސް މިކަމަށް ރަނގަޅުކުރުމަށް އެކަށީގެންވާ ގޮތެއްގައި މަސައްކަތްތަކެއް ކުރެވިފައި ނުވާކަން ރައީސް ވިދާޅުވިއެވެ.
މެންޓަލް ހޮސްޕިޓަލެއް އެޅުމަށް މަސައްކަތް ކުރަމުންދާކަން ފާހަގަކުރައްވަމުން ރައީސް ވިދާޅުވީ، ކުރިން މަސދައްކަތްކުރީ ބޭރުގެ އެހީ ހޯދައިގެން އެކަންކުރަންކަމަށެވެ. ނަމަވެސް މިހާރު ދައުލަތުގެ ބަޖެޓުން ހަރަދުކޮށްގެން މެންޓަލް ހެލްތު ހޮސްޕިޓަލް އެޅުމުގެ މަސައްކަތް ކުރިއަށްގެންދިއުމަށް ނިންމާފައިވާަކަން ރައީސް ވިދާޅުވިއެވެ.
ޕްރޮސީޖަރ ދިގުކަމުން ލޯނެއް ހަމަޖެހިގެން މި ޕްރޮޖެކްޓް އަދި މިކަހަލަ އެއްވެސް ޕްރޮޖެކްޓެއް ފެށޭގޮތް ނުވެ ލަސްވަމުންދާތީ، އަދި މި މައްސަލަ އިތުރަށް ވަރަށް ބޮޑަށް ރާއްޖޭގަ ބޮޑު ތުރު އިތުރު އެހީތެރިކަމެއް ބޭނުންވާ ހިސާބަށް ގޮސްފަވާ ބޮޑު މައްސަލައަކަށް ވާތީ އަޅުގަނޑުމެން މިހާރު މަޝްވަރާކޮށްފަ ސަރުކާރުގެ ބަޖެޓުން ސީދާ މި މެންޓަލް ހެލްތު ފެސިލިޓީ ހޮސްޕިޓަލް އެޅުމަށް މިހާރު މި ނިންމީ
ރައީސް ޑރ.މުއިއްޒު
ރައީސް ވިދާޅުވީ، މެންޓަލް ހެލްތު ދާއިރާގެ ކަންކަން ހައްލުކުރަން މިސަރުކާރުން ވަރަށް ބޮޑު އިސްކަމެއް ދޭކަމަށާއި، މިދާއިރާގައި ހުރި މައްސަލަތައް ހައްލު ކުރުމުގައި އެކަށީގެންވާ ކަންތައްތަކެއް ކުރުމަކީ ސަރުކާރުން ހާއްސަ އިސްކަމެއްދޭ ކަމެއް ކަމަށެވެ. އެގޮތުން ކުރަމުންގެންދާ މަސައްކަތުގެ ތެރެއިން މި ދާއިރާގެ ފަރުވާތައް އާސަންދައިން ދޭގޮތަށް ބަދަލުކޮށްފައިވާކަން ރައީސް ފާހަގަކުރެއްވިއެވެ.
ރައީސް ވިދާޅުވީ އެ ބަދަލަކީވެސް ރައްޔިތުންގެ އަތުންދާ ހަރަދުތަކަށް ލިބިގެންދިޔަ ވަރަށްބޮޑު ލުއިކަމެއްކަމަށެވެ.
Advertisement
This content is created and paid for by advertisers and does not involve Voice Journalists
