އައިލެންޑް ބެވަރޭޖަސް މޯލްޑިވްސް (އައިބީއެމް) ގައި މަސައްކަތް ކުރަމުންދިޔަ އުމުރުން 29 އަހަރުގެ މުޙައްމަދު ޝާހީން ރަމީޒް މިދިޔަ އާދިއްތަ ދުވަހު ކުއްލި ގޮތަށް ވަކިވެދިޔަ ޚަބަރަކީ އޭނާގެ ޢާއިލާ އަށާއި އެކުގައި މަސައްކަތްކުރި މީހުންގެ އިތުރުން ދަންނަ އެންމެނަށްވެސް ލިބުނު ބޮޑު ޝޮކެވެ. އެހާމެ ބޮޑު ހިތާމައެކެވެ.
ޝާހީންގެ މި ކުއްލި ވަކިވުމާއި ގުޅިގެން، އޭނާ ދަންނަ މީހަކު މީސްމީޑިއާގައި ކުރި ޕޯސްޓެއްގައި ލިޔެފައިވާގޮތުން، ޝާހީން އަކީ ވަޒީފާއަށް ފަރުވާތެރި، ހީވާގި އަދި އެހާމެ އަޚުލާގު ރަނގަޅު ޒުވާނެކެވެ.
ޝާހީންއަކީ ވަޒީފާއަށް ހޮވުނީ، އިންޓަވިއުގައި ދެއްކި ހިތްވަރާއި ސާބިތުކަމުގެ ސަބަބުންނެވެ. އެއީ އެންމެ ފަހު ވަގުތާ ޖެހެންދެންވެސް ވަޒީފާގެ މަސްއޫލިއްޔަތު ފުރިހަމައަށް އަދާކުރި ނަމޫނާ މުވައްޒަފެކެވެ.
ދުޅަހެޔޮ ޞިއްޙަތެއްގައި ހުރި ޝާހީންގެ ޞިއްޙީ އެއްވެސް މައްސަލައެއް ހުރިކަންވެސް ކުރިން އެނގިފައި ނުވާކަމަށް ޕޯސްޓް ލިޔުނު މީހާ ބުނެފައިވެއެވެ.
ނަމަވެސް، ޑިއުޓީ ނިންމާލުމަށްފަހު ގެއަށް ދިޔަތާ މާގިނައިރެއް ނުވެ މެޔަށް ތަދުވާތީ އައިޖީއެމްއެޗް ހޮސްޕިޓަލަށް ދިޔަ ކަމަށާ، ޝާހީން ކުއްލި ގޮތަކަށް ވެއްޓުނީ ހޮސްޕިޓަލުގެ ޓްރައޭޖް ކިއުގައި ހުއްޓައި ކަމަށް އެމީހާ ލިޔެފައިވެއެވެ. އަދި އޭގެ މާގިނަ އިރުތަކެއް ނުވެ އޭނާ ނިޔާވެފައިވާ ކަމަށްވެސް ބުނެފައިވެއެވެ.
ޝާހީންގެ ވަކިވުމަކީ މަރަކީ ވަގުތާއި އުމުރަށް ބަލާ އެއްޗެއް ނޫންކަން ހަނދާންކޮށްދިން ހިތާމަވެރި ހާދިސާއެކެވެ. އޭނާ މިދުނިޔެ ދޫކޮށް ދިޔައިރު އެންމެ 4 މަހުގެ ތުއްތު އަންހެން ކުއްޖަކާއި އަންބަކު އެބަހުއްޓެވެ. އެއީ އާއިލާއާއި ގާތް ރައްޓެހިންނަށް ފޫނުބެއްދޭ ވަރުގެ ހިތާމައެކެވެ.
އައިލެންޑް ބެވަރޭޖަސް މޯލްޑިވްސްއިން އެންމެ ފަހުން ބޭއްވި 'ގާލަ ނައިޓް' ގައި ނެގި ގުރުއަތުން އުމްރާ ދަތުރެއްވެސް ލިބުނީ ޝާހީންއަށެވެ. އެ އުންމީދީ ދަތުރަށް ނުދެވި އުޅެނިކޮށް، ޝާހީންއަށް ކުރިމަތިވީ އާޚިރަތުގެ ދަތުރެވެ.
ޝާހީންގެ ވަކިވުމާ ގުޅިގެން އައިލެންޑް ބެވަރޭޖަސް މޯލްޑިވްސް އިން އެކްސްގައި ކުރި ޕޯސްޓެއްގައި ބުނެފައިވަނީ، އެއީ ލޯބިވާ މުވައްޒަފެއް ކަމަށާ، އޭނާ ނިޔާވި ޚަބަރު އެހީ ވަރަށް ފުން ހިތާމައަކާއެކު ކަމަށެވެ. އަދި، މި ދަތި ވަގުތު އާއިލާއަށް އިޚްލާޞްތެރި ތަޢުޒިޔާ ފޮނުވާ ކަމަށެވެ.
ޝާހީންގެ ޖަނާޒާ އޮތީ އިއްޔެގެ އަސުރު ނަމާދަށްފަހު އާސަހަރާ މިސްކިތުގައެވެ.
Advertisement
This content is created and paid for by advertisers and does not involve Voice Journalists
